İbrahim Rüstəmli: "Paşinyan daxildə iğtişaş yaranmasından ehtiyatlanır və bu səbəbdən onları cəzalandırmaqdan yayınır"
Ermənistan sərhəd təxribatlarından əl çəkmək niyyətində olmadığını göstərir. 12 fevralda törətdiyi sərhəd təxribatından sonra aprelin 10-da da analoji addım atıb.
Aprelin 10-da, saat 15:20 radələrində Dövlət Sərhəd Xidmətinin (DSX) sərhəd qoşunlarının "Qubadlı" əlahiddə sərhəd diviziyasının Qubadlı rayonunun Cicimli yaşayış məntəqəsinin ərazisindəki sərhəd döyüş məntəqəsinin xidməti ərazisində qarşı ərazidəki Ermənistanın Nerkin Xnzoresk kəndi istiqamətindən 2 nəfərin dövlət sərhədini pozaraq, 200 baş mal-qaranı təxminən 300 metr Azərbaycan ərazisinə keçirməsi aşkar olunub.
Dövlət Sərhəd Xidmətinin baş leytenantı Ermənistan Silahlı Qüvvələrinin döyüş postundan açılan atəş nəticəsində yaralanıb. Bu barədə Dövlət Sərhəd Xidməti məlumat yayıb.
"Dövlət sərhədinin pozulmasının qarşısını alan sərhəd naryadımıza Ermənistan Silahlı Qüvvələrinin döyüş postundan atəş açılıb və nəticədə baş leytenant Rövşən Məmmədov yaralanıb. Hərbi qulluqçu təxirə salınmadan tibb müəssisəsinə təxliyə olunub.
Hazırda əməliyyat şəraiti sabitdir və bölmələrimizin nəzarəti altındadır.
Ermənistan tərəfinin bu növbəti təxribatına görə məsuliyyət tam şəkildə Ermənistanın hərbi-siyasi rəhbərliyinin üzərinə düşür", - məlumatda deyilir.
Ermənistan tərəfindən Azərbaycan sərhədçisinə atəş açmış hərbçilərə cinayət işinin açılması gözlənilirdi.
Halbuki, Azərbaycan başqa addımlar da ata bilərdi. Amma gözlənti o idi ki, Ermənistan araşdırsın və nəticəsini bəyan etsin.
Azərbaycan gözləyirdi ki, Ermənistan həmin o sərhəd təxribatçılarına qarşı cinayət işi açacaq. Amma bu heç də baş vermədi, Ermənistan onları cəzalandırmadı.
Nə baş verir? Ermənistan niyə belə edir? Niyə o hərbiçiləri cəzalandırmadı?
"Ermənistan normal, müstəqil, inkişaf etmiş ölkə, Paşinyan hökuməti öz sözünü deyən, öz mövqeyindən çıxış edə bilən hökumət olsaydı, əlbəttə, təxribatçıları cəzalandırardı"
Hərbi ekspert İbrahim Rüstəmli "Bakı-Xəbər"ə şərhində "Ermənistanda iqtidar-müxalifət münasibətləri çox gərgin bir şəkil alıb. Paşinyan hökumətinə etimad günü-gündən azalır. Xüsusilə Paşinyanı Qarabağı verməkdə ittiham edən qüvvələr fəallaşıblar. Xüsusilə Rusiya prezidenti Vladimir Putinin növbəti bəyanatlarından birində Ermənistanın Qarabağı Azərbaycanın tərkib hissəsi kimi tanımasını qabatması, eyni zamanda "siz Azərbaycanın ərazi bütövlüyünü tanıyırsız Rusiya nə edə bilər" kimi fikirləri daxili auditoriyada çox ciddi rezonans doğurub. Həmçinin bu rezonansın arxasında insanların zəif nöqtələrinə təsir çox güclüdür. Sadə insanlar bu məsələdə Paşinyanı daha çox günahkar hesab edirlər. Yəni bu gün Ermənistanın sərhəddə təxribat törədən, Azərbaycan hərbiçisinə atəş açan hərbiçiləri cəzalandırması Paşinyan hökuməti üçün çox ciddi problem yarada bilər. İstər sərhəddə törətdiyi təxribat, istərsə də daxildə və Cənubi Qafqazda baş verən proseslər Ermənistanın əleyhinə işləyir. Bu mənada, Ermənistanın təxribat törətmiş hərbçilərini cəzalandırmaması, onları cəzasız buraxması gözlənilən idi. Bu həm də Ermənistanın vahid siyasi mövqeyə sahib olmamasının göstəricisidir"- deyə bildirdi.
İ.Rüstəmli qeyd etdi ki, Paşinyan hökuməti bir növ öz kreslosunda laxlaya-laxlaya, külək hara əsdi ora yellənə-yellənə dayanan, öz iqtidarını bu şəkildə qoruyan bir hökumətdir, onun aşması üçün bəlkə də adi bir qığılcım bəs edəcək. "Ermənistanda Azərbaycana qarşı fəaliyyət göstərən xarici emissarlar, xarici ölkələrin kəşfiyyat orqanlarının nümayəndələri var. Onlar bu məsələlərdə çox fəaldırlar. Eyni zamanda Rusiya kəşfiyyatı Ermənistanda çox ciddi şəkildə işləyir. Paşinyanla Rusiya arasında münasibətlər barədə danışmağa dəyməz, çox gərgindir. Bu mənada Paşinyanın Ermənistan tərəfindən Azərbaycan sərhədçisinə atəş açmış hərbçiləri cəzalandırmaması öz hakimiyyətinin ömrünü uzatmağa bir cəhddir. Paşinyan daxildə iğtişaş yaranmasından ehtiyatlanır və bu səbəbdən onları cəzalandırmaqdan yayınır. Əslində, Ermənistan insident törətmiş hərbiçiləri cəzalandırmalı idi. Ermənistan normal, müstəqil, inkişaf etmiş ölkə, Paşinyan hökuməti öz sözünü deyən, öz mövqeyindən çıxış edə bilən hökumət olsaydı, əlbəttə, təxribatçıları cəzalandırardı. Amma bunu Ermənistandan gözləmək mümkün deyil"-deyə İ.Rüstəmli qeyd etdi.
İ.Rüstəmli hesab edir ki, Azərbaycan, həmişə olduğu kimi, bu dəfə də humanstlik göstərdi və Azərbaycan hərbçisinə atəş açanların Ermənistan tərəfindən cəzalandırılmasını gözlədi. Ermənistanın ötən günlər ərzində bu yöndə tədbir görmədiyini qeyd edən müsahibimiz bildirdi ki, Paşinyan hökuməti bununla özünü daha ağır duruma salır, törətdikləri sərhəd təxribatları onun özü üçün sonda ciddi problemlərə səbəb olacaq. Ekspert onu da vurğuladı ki, cinayət törətmiş caniləri Ermənistan cəzalandırmasa da, onlar heç zaman cinayət məsuliyyətindən yayına bilməyəcəklər, zamanı gələndə hər şey öz yerini tutacaq.
Müsahibimizin fikrincə, Ermənistanın bu istiqamətdə əməli addım atacağı gözlənilən deyil. Ermənistanın hələ də mifoloji aləmdə yaşadığını və "dənizdən-dənizə Böyük Ermənistan" xülyasında olduğunu deyən İ.Rüstəmli hesab edir ki, bütün bunlar boş, mənasız məsələlərdir.
İradə SARIYEVA
