Akif Nağı: "Son 6 ayda sərhəddə iki dəfə atəşkəsin pozulması, Azərbaycana qarşı təxribatların törədilməsi birbaşa Fransanın təhriki, sifarişi ilə baş verib"
Fransa öz daxilindəki vəziyyətə nəzarət etmək, vətəndaşlarının problemlərini həll etmək, əsarətdə saxladığı xalqların azadlıq arzularına yol açmaq əvəzinə burnunu Cənubi Qafqaza tərəf uzadır və ona aid olmayan işlərə qarışır.
İkinci Qarabağ mühribəsi dövründə Ermənistana hərtərəfli yardımlar edən Fransa bununla kifayətlənməyib sonrakı dönəmlərdə də Ermənistana, bu terror ölkəsinə dayaq durmaqda davam etdi. Əlbəttə, burada söhbət Fransanın Ermənistana səmimi münasibətindən, can yandırmasından getmir, Fransanın Ermənistan vasitəsilə Cənubi Qafqaza soxulmaq niyyətlərindən gedir. Fransa bu gün Cənubi Qafqazda pozuculuq fəaliyyəti ilə məşğul olur. Makron hökuməti bütün gücü ilə çalışır ki, Cənubi Qafqazda yeni bir münaqişə ocağı yaransın, özü də Ermənistanın guya müdafiəçisi rolunda meydanda peyda olsun. O, Ermənistanı qanunsuz şəkildə silahlandırmaqla, bu ölkədə müxtəlif vasitələrlə revanşizm əhvalını alovlandırmaqla məşğul olur. Ermənistana hərbi yardım edən, silahlandıran Makron Cənubi Qafqazda sabitlik, sülh istəmir. Öz məkrli niyyətlərini həyata keçirmək üçün Ermənistanı belə qurban verməyə hazırdır, necə ki, buna doğru gedir də.
Fransa bütün hallarda çalışır ki, Azərbaycanla Ermənistan arasında sülh müqaviləsi imzalanmasın. Bunu Makron dəfələrlə öz hərəkətləri ilə göstərib. İki ölkə arasında münasibətlərin normallaşması qətiyyən Makrona sərfəli deyil. Çünki Ermənistan və Azərbaycan arasında normallaşma prosesi baş verərsə Makronun bütün məkrli niyyətləri suya düşər. Bütün dünyada nüfuzdan düşən, vaxtilə müstəmləkəsi olan bir çox ölkələrdən qovulan, digər müstəmləkələrində daşa basılan Makron hökuməti öz neokolonialst niyyətlərini Ermənistan vasitəsilə bizim bölgədə gerçəkləşdirmək istəyir. Amma təbii ki, Makronun bu niyyətləri heç cür hasil ola bilməz.
Makron da bunu anladığından, Ermənistanı yenidən müharibəyə təhrik edir, həvəsləndirir. Makron Paşinyanın ağlını başından o dərəcədə alıb ki, o, rəsmi Parisin təxribatlarını görməzdən gəlir. Son 6 ayda Ermənistan-Azərbaycan sərhədində baş verən insidentlər buna əyani misaldır.
Bildiyimiz kimi, son 6 ay ərzində sərhəddə iki dəfə insident baş verib. Hər ikisi Fransanın təhriki ilə olub.
Görsənir ki, kənar qüvvələr olmasa, bölgədə sabitlik həmişə ola bilər. Amma rəsmi Paris rahat durmayıb, Ermənistanı sərhəd insidentinə təhrik edib.
Ekspertlərə görə, əgər Fransa Ermənistanı təhrik etməsəydi doğrudan da hər şey qaydasında olardı.
"Fransa çalışır ki, daha geniş müstəvidə Azərbaycana qarşı təhdidlər sərgiləsin, təxribatlar törətsin"
Azad Vətən Partiyasının sədri Akif Nağı "Bakı-Xəbər"ə şərhində "Çox təəssüf ki, regionda sabitliyə əsas təhlükə Fransa tərəfindən gəlir. İndiyə qədər Rusiya həmişə sabitliyi pozan, situasiyasını nəzarətdə saxlamağa çalışan tərəf kimi ortada idi. Bir qədər də ABŞ müəyyən məqamlarda öz mənfi rolunu oynayırdı. Azərbaycanın İkinci Qarabağ müharibəsindəki qələbəsindən sonra Fransa təşəbbüsü ələ alan tərəf kimi görsənir. Fransa regiona gəlmək istəyir. Regiona gəlmək üçün Fransanın taktikası belə görsənir ki, bölgədə sabitlik olarsa o regiona girə bilməyəcək, Azərbaycanla Ermənistan arasında münasibətlər normallaşarsa, sülh müqaviləsi imzalanarsa Fransanın da üzünə qapılar bağlanacaq. Fransa istəyir ki, regiona gəlmək üçün həm burada öz maraqlarını təmin etsin, həm də onun bura gəlməsi üçün Rusiya regiondan çıxmalıdır. Yəni Rusiya çıxmasa Fransanın bölgəyə gəlməsinin və Ermənistanda oturmasının mənası olmayacaq. Belə deyək, Rusiya Ermənistandadır, orada hərbi bazası var, sərhədləri Rusiya hərbiçiləri qoruyur, digər gözəgörünməz qüvvələr də var. Orada illərdir Rusiya xüsusi xidmət orqanlarının əməkdaşları da işləyir, onların oradan çıxarılması çətin məsələdir. Fransa gəlib orda müyyən şəkildə otursa da, yenə də Rusiya tərəfindən həmişə onlar üçün təhlükə olacaq"-deyə bildirdi.
A.Nağının qeyd etdiyinə görə, Fransa Aİ-nin missiyası qismində tədricən regiona gəlir, o həm də Ermənistanda Rusiyanın mövqeyinin hansı dərəcədə yüksək olduğunu, hansı zəif cəhətlərinin olduğunu, bura gəlmək üçün hansı addımlar atmalı olduğunu öyrənmək üçün Aİ missiyası vasitəsilə kəşfiyyat aparır. "Onlar Aİ-nin missiyası vasitəsilə hələ bunu yoxlayırlar. Ona görə də, hələlik onların gəldiyi nəticə odur ki, stabillik olmamalıdır, əgər stabillik olarsa, bunlar regiona gələ bilməyəcəklər. Fransanın canfəşanlığı bununla bağlıdır. Fransa bütövlükdə həm Qərbin sifarişini yerinə yetirir, həm də öz maraqlarını güdür.
Son 6 ayda sərhəddə iki dəfə atəşkəsin pozulması, Azərbaycana qarşı təxribatların törədilməsi birbaşa Fransanın təhriki, sifarişi ilə baş verib. Hətta Rusiya rəhbərliyi tərəfindən Dmitri Medvedev səviyyəsində ittiham da səsləndirildi ki, Moskvada azərbaycanlı iş adamının nəzarətində olan ərazidə, mərkəzdə o cür qanlı terrorun törədilməsində də Fransanın izləri görünür, Makronun adı da çəkilir. Bu, dövlət səviyyəsində səsləndirilən bir fikirdir, yəni fakt yoxdursa Medvedev o fikri səsləndirməz.
Deməli, Fransa çalışır ki, daha geniş müstəvidə Azərbaycana qarşı təhdidlər sərgiləsin, təxribatlar törətsin…"-deyə A.Nağı qeyd etdi.
Azərbaycanla Ermənistan arasında müəyyən proseslərin getdiyini deyən A.Nağı hesab edir ki, Fransa bu proselərə çənfi mənada təsir edir. O vurğuladı ki, sülh müqaviləsinin imzalanması ilə bağlı Ermənistanın baş naziri, xarici işlər naziri açıqlamalar verir, hansısa məsələlərin müzakirə olunduğunu, Azərbaycanla Ermənistan nümayəndələri vasitəçilərsiz görüşə bilərlər, görüşürlər kimi fikirlər söyləyirlər. "Normallaşma istiqamətində gedən bu proses də Fransanı ciddi şəkildə narahat edir. Harada mümkündürsə, Fransa bu cür mənfi və mənfur rolunu oynayır. Azərbaycan bunu başa düşür, görür, Prezident səviyyəsində Fransaya qarşı dəfələrlə mövqe də bildirilib. Hesab edirəm, bu proses daha da diqqətlə izlənilməlidir, Fransanın bütün cəhdlərinin iflasa uğrması üçün müəyyən yollar tapılmalıdır. Digər tərəfdən, Ermənistan tərəfi də çalışmalıdır ki, Azərbaycanla normal münasibətlər qursun, regionda stabiliyə nail olunsun. Əks halda onlar ya Fransanın, ya da başqa dövlətlərin əlində yenə də alət olaraq qalacaqlar. Öz maraqlarından çıxış etsələr özləri üçün də yaxşı olar. Amma onlar görünür ki, alət kimi istifadə edilməyi, Fransanın sifarişlərini yerinə yetirməyi üstün bilir. Seçim onların özlərinə aiddir. Amma Azərbaycan istənilən təxribatın qarşısını almağa, təhlükəni məhv etməyə qadirdir. Onu da başa düşsünlər ki, Ermənistan bir qədər də uduzacaq. Fransa orada nə isə oyun törədirsə, təxribat həyata keçirirsə uduzan tərəf yenə də həmişə Ermənistan olacaq. Ermənistan da bunu başa düşməlidir"-deyə A.Nağı əlavə etdi.
İradə SARIYEVA
