İranın “müsəlman təəssübkeşliyi” problemi var - Qarabağ, Qəzza...
Məhəmməd Əsədullazadə: "Bax, budur molla rejiminin əsl mahiyyəti..."
Hər zaman olduğu kimi, bu dəfə də İran səmimiyyətdən uzaq siyasət yeridir. Molla rejimi illərdir İranı dünyada bir nömrəli "müsəlman təəssübkeşi" kimi təqdim edir. Ancaq reallıq tamam fərqlidir.
Məsələ ondadır ki, 30 il Azərbaycanın 20 faizə yaxın əraziləri işğal altında qaldı. Bu müddətdə yaşayış məntəqələri məhv edildi. Məscidlər dağıdıldı, islam abidələri təhqir olundu, İran bir dəfə buna etiraz etmədi. Tam əksinə, 30 illik işğal zamanı Ermənistanla işbirliyi yaratdı. 44 günlük Vətən müharibəsindən sonra da analoji mövqedən çıxış etdi. 44 günlük müharibədən sonra belə Qarabağ ermənilərinə İran nömrəsi olan maşınlar yanacaq daşıdılar. Qarabağ ərazisinə 32 İran vətəndaşı gizli səfər edərək separatçılarla birgə fəaliyyət göstərdilər.
Qarabağ məsələsində olduğu kimi, Fələstin məsələsində də İran qeyri-səmimilik nümayiş etdirir. Fələstində on minlərlə müsəlmanın qətlinə yalnız "bəyanatlarla" cavab verməsi də bu ölkənin "müsəlman təəssübkeşliyi"nin olmadığını göstərir. Yəni quru bəyanatlar verməklə məşğuldur və Qəzzadkı müsəlmanlara faktiki olaraq real dəstək verilmir.
"İran müsəlman həmrəyliyindən çıxış etsəydi, HƏMAS-ı himayə edib insanları qırğına verməzdi"
Sözügedən məsələni "Bakı-Xəbər"ə şərh edən politoloq Məhəmməd Əsədullazadənin sözlərinə görə, İran 1979-cu ildən üzübəri fars şovinizminə xas məzhəb siyasəti aparır: "İran özünü elə aparır ki, sanki müsəlman dünyasının lider dövlətidir. Ancaq reallıq bunun əksini göstərir. Fars molla rejimi bu gün Cənubi Qafqazda və Yaxın Şərqdə təhlükəsizliyi təhdid edir. İran terrorçu təşkilatlar, proksi qüvvələr yaratmaqla Fələsində, Livanda, Suriyada, Yəməndə beynəlxalq təhlükəsizliyi təhdid etməkdədir. İran müsəlman həmrəyliyindən çıxış etsəydi, HƏMAS-ı himayə edib insanları qırğına verməzdi. Livanın bombalanmasına zəmin yaratmazdı. HİZBULLAH-ın arxasında dayanan dövlət məhz İrandır. İran özünü güclü hesab edirsə, o zaman niyə baş verənlərə müdaxilə etmir? Çox yaxşı bilir ki, belə bir addım ona baha başa gələcək və bu, molla rejiminin sonu olacaq. İran həm də ölkəmizə qarşı "Sepah Hüseyniyyə" terror təşkilatı yaradır və Azərbaycanın konstitusiya quruluşunu, dövlət müstəqilliyini, suverenliyini təhdid edir. Bu, İran rejiminin dəyişməyən xüsusiyyətidir. Biz dərindən baxsaq görərik ki, İran ancaq müsəlman ölkələrinə qarşı düşmənçilik siyasəti aparır. Özünü nə qədər müsəlman təəssübkeşi kimi göstərsə də, pərdə arxasında proksi qüvvələri, terrorçu təşkilatları yaradan, onları himayə edən İrandır. Azərbaycanın timsalında biz bunu yaxşı bilirik. Ərazilərimiz işğal altında olanda Ermənistanı himayə edən ölkələrdən biri də İran idi. İndi də sülhə mane olan Tehrandır. Müsəlman təəssübkeşliyindən dəm vuran İran hava yolu ilə Ermənistana silah daşıyır. Bunlar İran rejiminin terrorçu mahiyyətini ortaya qoyur. Qəzzada bu gün baş verənlərə Tehran rejimi quru bəyanatlarla reaksiya verir. Yaxud da yumruğunu sallayır. Bax, budur molla rejiminin əsl mahiyyəti".
Vidadi ORDAHALLI
