Qabil Hüseynli: "Nəticədə İranda xaos olacaq və İranın taleyini də belə həll edəcəklər"
İsrail İranın Dəməşqdəki baş konsulluğunu dəqiq zərbə ilə vurduqdan sonra iki ölkə arasında müharibə gözləntisi hər keçən gün artır. Xarici mediada İranın istənilən vaxt İsrailə cavab zərbəsi endirəcəyi haqda məlumatlar yayılır.
İranın İSNA xəbər agentliyi birbaşa İsrailə atılacaq 9 raketin adını dərc edib. ABŞ kəşfiyyatı isə qarşıdakı bir həftə ərzində İranın cavab zərbəsi endirəcəyini düşünür.
Nəzırə alsaq ki, hazırda dünyanın bir çox ölkəsində qaynar ocaqlar mövcuddur, geopoltik anlamda dünya çalxalanır, bütün bunların fonunda İsraillə İran arasındakı ziddiyyətin dünya müharibəsinə çevrilmə ehtimalı nə qədərdir?
Siyasi şərhçi Qabil Hüseynli "Bakı-Xəbər"ə açıqlamasında bildirdi ki, dünya müharibəsindən danışmaq hələ tezdir: "İranın da hansısa raketlərin adını çəkərək ictimai rəyi çaşdırması nəyəsə yaramıyacaq. Mən əmin deyiləm ki, İranın İsraili vura biləcək, həmin ölkəyə xətər yetirə biləcək gücdə olan raketləri var. İran məgər düşünmürmü ki, İsraili vurmuş olsa, başının üzərində həm də ABŞ-ı görməli olacaq? Hətta bəzi Avropa ölkələri də bu prosesə qoşulmalı olacaq. Dünyanı "boğaza" yığmış bu ölkənin o qədər düşmənləri var. Hətta müsəlman ölkəsi olan Əfqanıstan belə, İranın məhvinə ikiəlli səs verə bilər. Buna görə də SEPAH-ın generallarının populist fikirlərinə əhəmiyyət vermək lazım deyil. Onların raketləri 1500 kilometr məsafədə hədəfi dəqiq məhv edə bilirsə, İran onu çoxdan sınaq adı ilə dünyaya nümayiş etdirmişdi. Mənə belə gəlir ki, İran kiçik təxribatlar törədə bilər. Məsələn , "husiləri" qızışdırıb, Avropa ölkələrinin gəmilərinə hücum etdirir. Özünün əli altında olan terrorçu təşkilatları qızışdırıb, kiminsə üzərinə salmaq istəyəcək. İran İsrailə 9 yox, bir belə raket ata bilsə, bu, İranın sonu demək olacaq. İranla rəsmi surətdə müharibə başlayacaq. Bu dünya müharibəsi olmayacaq və çox da uzun çəkməyəcək. Qısa müddətli bu müharibədə İranın böyük şəhərləri, siyasi rəhbərliyin oturduğu binalar, zavod və fabriklər vurulucaq. Nəticədə İranda xaos olacaq və İranın taleyini də belə həll edəcəklər".
ABŞ və İsrail İrandan mümkün hücum xəbərləri ilə əlaqədar qoşunlarını yüksək döyüş hazırlığı vəziyyətinə gətirib.
İsrail Silahlı Qüvvələri döyüş hissələrinin buraxılmasını ləğv edib. Həmçinin ehtiyatda olan bəzi əsgərlər hava hücumundan müdafiə bölmələrinə çağırılıb, GPS siqnalları bloklanıb.
İki İran rəsmisi isə bildirib ki, İrandakı silahlı qüvvələr də yüksək döyüş hazırlığı vəziyyətindədir. İran, Qəzzada atəşkəs əldə olunarsa, İsrailin Dəməşq konsulluğuna endirdiyi hava hücumuna cavab verməkdən imtina edəcəyi barədə ABŞ-ı məlumatlandırıb.
Qeyd olunur ki, bu məlumat Qahirədə İsrail və HƏMAS arasında atəşkəs və girovların azad edilməsi üzrə danışıqların getdiyi və Təl-Əvivin hava hücumuna mümkün cavab hazırlığını davam etdirməsi fonunda ortaya çıxıb. İranın ali dini rəhbərinin hərbi məsələlər üzrə müşaviri Yəhya Rəhim Səfəvi deyib ki, İsrailin İranın Dəməşqdəki səfirliyinin konsulluq bölməsinə endirdiyi zərbədən sonra Təl-Əvivin dünyanın müxtəlif yerlərindəki səfirlikləri artıq təhlükəsiz deyil.
Məhəmmədəli QƏRİBLİ
