Günay Hüseynova: "Azərbaycanın tədbirlə bağlı gördüyü işlər, göstərdiyi fəallıq ölkəmizin ətraf mühitin mühafizəsinə böyük önəm verdiyinin göstəricisidir"
Martın 1-də Bakıda, "Gülüstan" sarayında Cənub Qaz Dəhlizi Məşvərət Şurası çərçivəsində nazirlərin 10-cu və Yaşıl Enerji Məşvərət Şurası çərçivəsində nazirlərin 2-ci iclasları keçirilib.
Prezident İlham Əliyev tədbirdə iştirak edib. Dövlət başçısı çıxışında bildirib ki, Azərbaycana COP29-a sahiblik edən ölkə olmaq şərəfinin nəsib olması bəzi dairələrdə qıcıq yaradıb:
"Keçən ilin dekabrında qərar qəbul olunan kimi biz dərhal, yalnız bir səbəbdən müxtəlif QHT-lər və media təşkilatlarının hücumuna məruz qaldıq. Çünki bizim neftimiz var və bu, bizim ən böyük nöqsanımız hesab olunmuşdur. Baxmayaraq ki, qeyd etdiyim kimi bu, qüsur deyil, Allahdan bir hədiyyədir. Lakin bizə hücum edərək dedilər ki, necə ola bilər qazıntı yanacağı ilə zəngin olan bir ölkə COP-a ev sahibliyi edə bilər. Gəlin, bu məsələyə başqa bir bucaq altında baxaq. Bəli, bizim kifayət qədər neftimiz, kifayət qədər qazımız var. Biz növbəti 100 il ərzində bərpaolunan enerji resursları olmadan yaşaya bilərik. Bizim bütün ehtiyatlarımız təsdiq edilib və hər kəs bunu bilir.
Lakin iqlim dəyişikliyi ilə bağlı olan bu qlobal tədbirə ev sahibliyi etmək istəyimizin olması faktı bizim iradəmizi nümayiş etdirir. Bizə buna görə hücum edilməməlidir, biz təqdir edilməliyik. Biz heç bir yanlış iş görməmişik, lakin qərar qəbul olunan kimi bizə qarşı dərhal əlaqələndirilmiş, konsolidasiya olunmuş və çox ədalətsiz hücum edildi.
Əvvəlki illərdə Azərbaycana qarşı çoxlu hücumlar olmuşdur, biz buna adət etmişik, biz özümüzü müdafiə edə bilərik. Lakin mən sizə, sadəcə, məlumat vermək istəyirəm ki, COP29-un Azərbaycanda təşkil edilməsi qərarı, yekdil qərar beynəlxalq birliyin ölkəmizə hörmətinin əlamətidir və bizim tədbirə ev sahibliyi etmək, bu işə töhfə vermək istəyimiz yaşıl gündəliyimizi nümayiş etdirir".
Göründüyü kimi, Prezident COP29-a ev sahibliyi etmək statusunun doğruluğunu tam əsaslandırmış olur. Buna görə bizi tənqid edənlərin arqumentlərini tam əsassız sayır. Bütün bunlar məhz bu kontekstdə Azərbaycana hücum edənlərin cəhdlərinin tam iflasa uğramasının əlaməti sayılırmı?
İqtisadçı Günay Hüseynova "Bakı-Xəbər"ə açıqlamasında bildirdi ki, hər il fərqli bir ölkənin ev sahibliyi etdiyi 29-cu "Tərəflərin Konfransı (COP)" noyabrın 11-dən 24-dək Bakıda keçiriləcək: "COP29 iqlim fəaliyyətini sürətləndirmək və Paris Sazişinin məqsədlərinə nail olmaq üçün keçirilən tarixi görüş hesab olunur. BMT-nin İqlim Dəyişikliyi Konfransı və ya COP29-un 2024-cü ilin noyabrında Azərbaycanda keçirilməsi elan ediləndən bəri rəsmi Bakı hazırlıq işlərinə start verib.
COP Tərəflərin Konfransı adlanır və adındakı 29 rəqəmi tədbirin sayca 29-cu olduğuna işarə edir.
Bundan əvvəlki tədbir - COP28 keçən il Birləşmiş Ərəb Əmirliklərinin Dubay şəhərində baş tutub.
COP29-un bir sıra iqlim dəyişikliyi məsələlərini müzakirə etmək və danışıqlar aparmaq üçün dünya liderlərini, hökumət rəsmilərini, alimləri, QHT-ləri və digər maraqlı tərəfləri bir araya gətirən böyük tədbir olacağı gözlənilir. Bəli, Azərbaycana hücumlar oldu ki, niyə belə tədbir neft və qazı olan bir ölkədə keçirilir? Çox cılız arqumentdir, çünki Azərbaycan alternativ enerjinin inkişafına böyük önəm verib. "Qara şəhər" adlanan bir yer indi cənnəti xatırladır, olub "Ağ şəhər". Fikir verin, bizdən əvvəlki tədbir Birləşmiş Ərəb Əmirliklərində olub. Bəyəm onlar neft ölkəsi deyil? Deməli, bizə edilən hücumlar heç də bu amildən qaynaqlanmır. Sadəcə, bunu bəhanə edirlər. Azərbaycan hansı nüfuzlu tədbirə ev sahibliyi edibsə, bizə belə hücumlar olub. Biz analoji təzyiqi idman yarışlarında da görmüşük. Hesab edirəm ki, belə tədbirlərin elə neft və qaz ölkəsində keçirilməsi daha zəruridir. Azərbaycanın tədbirlə bağlı gördüyü işlər, göstərdiyi fəallıq ölkəmizin ətraf mühitin mühafizəsinə böyük önəm verdiyinin göstəricisidir. Bir daha sübut olundu ki, bu yöndə ölkəmizi qaralamaq cəhdləri tam iflasa getdi. Birləşmiş Ərəb Əmirliklərindən keçmiş COP28 prezidenti Sultan əl-Caber də neft sənayesindən gəlmiş təcrübəli mütəxəssis idi. O COP28-i idarə edərkən, həm də Əbu-Dabi milli neft şirkətinin rəhbəri olaraq işinə davam etmişdi.
Ancaq vəzifəsilə bağlı narahatlıqlara baxmayaraq, o iştirakçı ölkələrlə "enerji sistemlərində fosil yanacağından uzaqlaşmaq" barədə razılaşma əldə edə bildi. Görürsünüz ki, burada kimin neft sahəsində çalışmasının və ya neft ölkəsi olmağın prosesə heç bir maneəsi ola bilməz".
Məhəmmədəli QƏRİBLİ
