Məlum olduğu kimi, Rusiya prezidenti Vladimir Putin ölkəsinin Qərbdəki hədəfləri vurmaq üçün silaha malik olduğunu bildirərək, Qərb dövlətlərinin Ukraynaya qoşun yeritməsinin faciəli nəticələri barədə xəbərdarlıq edib:
"Qərb dövlətləri başa düşməlidirlər ki, bizim də onların ərazisindəki hədəfləri vura biləcək silahlarımız var. Bütün bunlar həqiqətən də nüvə silahından istifadə edilməsi ilə münaqişə və sivilizasiyanın məhvi təhlükəsini yaradır. Onlar bunu başa düşmürlərmi?".
Qeyd edək ki, bu günlərdə Fransa prezidenti Emmanuel Makron bildirib ki, Qərb qoşunlarının Ukraynaya döyüşmək üçün göndərilməsi planı olmasa da, bu ehtimal qalmaqdadır: "Bu gün rəsmi, təsdiq olunmuş şəkildə yerlərə qoşunların göndərilməsi ilə bağlı konsensus yoxdur. Amma dinamika baxımından heç nəyi istisna etmək olmaz". Avropanın əksər liderləri ABŞ kimi Makronun ideyasına qarşı çıxıb. Çünki bu hal nüvə müharibəsi ehtimalını yüksəldir. Bu, Putinə Qərbi nüvə silahları ilə hədələməyə imkan verir: "Vaxtilə öz kontingentini ölkəmizin ərazisinə göndərənlərin taleyini xatırlayırıq. Ancaq indi mümkün müdaxiləçilər üçün nəticələr daha faciəli olacaq". Putin bəyan edir ki, suveren, güclü Rusiya olmadan sabit dünya nizamı ola bilməz: "Rusiyaya müdaxilə etmək istəyənlərin üzləşəcəyi nəticələr keçmiş dövrlərlə müqayisədə daha faciəli olacaq. Ölkəmizə yeni müdaxilə cəhdləri nüvə silahının tətbiqi ilə genişmiqyaslı münaqişə təhlükəsi yaradır". Putin onu da vurğulayır ki, Rusiyanın strateji nüvə qüvvələri istifadəyə tam hazır vəziyyətdədir. Rusiya lideri qeyd edib ki, silahlanma sahəsində planlaşdırılan məsələlərin demək olar ki, hamısı həllini tapıb: "2018-ci ildə səsləndirdiyim müraciət zamanı bəhs etdiyim silahlanma sahəsində planlaşdırdıqlarımızın hamısı yerinə yetirilib və ya bir hissəsi tamamlanmaq üzrədir. Beləliklə, hipersəs aviasiya kompleksi "Kinjal" nəinki istifadəyə verilib, həm də havadan zərbə endirilən zaman xüsusilə vacib hədəfləri məhv etmək üçün yüksək səmərəliliklə istifadə olunur. 2018-ci ildə ünvanlanan müraciətimdə yer almayan "Zirkon" hipersəs zərbə kompleksi artıq döyüşlərdə də istifadə olunub və bu sistem artıq işləyir". Putin bir sıra digər silahların da Silahlı Qüvvələrin arsenalına daxil edildiyini diqqətə çatdırıb: "Qitələrarası diapazonlu "Avanqard" hipersəs bölmələri və "Peresvet" lazer sistemləri döyüş növbətçiliyindədir. "Burevestnik" qeyri-məhdud mənzilli qanadlı raketin və "Poseydon" pilotsuz sualtı aparatının sınaqları tamamlanır". Putin onu da qeyd edib ki, "Sarmat" ağır çəkili ballistik raketləri də orduya təhvil verilib: "Tezliklə biz onları hərbi əməliyyat zonalarında nümayiş etdirəcəyik. Bir sıra digər perspektivli silah sistemləri üzərində işlər davam edir. Alimlərimizin və silah ustalarımızın yeni nailiyyətləri haqqında gələcəkdə də xəbər tutacağıq". O, Rusiya Hərbi Hava Qüvvələrinin bu yaxınlarda nüvə silahı daşımağa qadir 4 hipersəs bombardmançı təyyarəni təhvil aldığını qeyd edib: "Bu gün strateji nüvə qüvvələrində müasir silah və texnikanın payı artıq 95 faizə çatıb, "nüvə triadası"nın dəniz komponenti isə demək olar ki, 100 faizdir". Döyüş hazırlığı vəziyyətinin artırılmasının vacibliyini vurğulayan Rusiya Prezidenti ordunun müasir silahlarla təchiz ediləcəyini vurğulayıb.
ABŞ Silahlı Qüvvələrinin Strateji Komandanlığının rəhbəri general Entoni Kotton isə qeyd edir ki, Rusiya bütün dünyada ən böyük və ən müxtəlif nüvə arsenalına malikdir. Onun sözlərinə görə, bu qənaətə gəlməyə səbəb keçən il Rusiya Federasiyası ordusunun "RS-28 Sarmat" qitələrarası ballistik raketi arsenalına qəbul etməsi olub: "Bundan əlavə, Rusiya qanadlı raketləri daşıyan nüvə sualtı qayıqlarını yaratmağa və qəbul etməyə davam edir. O, öz nüvə potensialını müasirləşdirir və genişləndirir".
Bunlar fonunda Nüvə Silahlarının Ləğv edilməsi üzrə Beynəlxalq Təşkilatın (ICAN) siyasət və tədqiqat koordinatoru Alisiya Sanders-Zakre bildirib ki, Ukraynadakı münaqişə qəsdən və ya bilməyərəkdən nüvə müharibəsinə çevrilə bilər və bu xüsusda təhlükəli davranışlar artmaqdadır: "İki il ərzində beynəlxalq ictimaiyyət tərəfindən geniş şəkildə qınanılan nüvə eskalasiyası ilə bağlı ritorika və təhlükəli davranışların artması müşahidə olunub. Belə eskalasiya təsadüfi və ya qəsdən nüvə münaqişəsi risqini artırır. Bütün nüvə silahına malik dövlətlər və onların müttəfiqləri qısamüddətli ritorika və hərəkətlərində ehtiyatlı olmalı və nüvə arsenallarını ləğv etməlidirlər ki, bu da nüvə eskalasiyasının qarşısını almağın yeganə etibarlı yoludur". Onun sözlərinə görə, hazırda nüvə silahından istifadə risqi xüsusilə yüksəkdir. Nüvə silahına malik olan bütün dövlətlər yeni, daha təhlükəli nüvə silahları yaradırlar. Bundan əlavə, bir neçə nüvə silahına malik dövlətlər aktiv münaqişədə iştirak edir. Ekspert vurğulayıb ki, nüvə silahlarının ləğvi nüvə eskalasiyasının dayandırılması və nüvə müharibəsinin qarşısının alınmasının təminatı olaraq qalır. Amma Rusiyanın müdafiə naziri Sergey Şoyqu isə deyib ki, Qərb Rusiyanı zəiflətmək üçün Ukraynada hərbi əməliyyatları mümkün qədər uzatmağa çalışır. O, 27 ölkənin Ukraynaya silah tədarükünə artıq 97 milyard dollar xərclədiyini söyləyib: "NATO qərargah zabitləri, artilleriyaçılar və digər mütəxəssislər Ukraynada cəbhədədir, Kiyev üçün NATO-nun 500-dən çox peyki işləyir. ABŞ-ın 800-dən çox kosmik aparatı Ukrayna Silahlı Qüvvələrinin maraqları üçün işləyir".
Nahid SALAYEV
