Yeganə Hacıyeva: "AP-nin LGBT fraksiyasına üzv olan 157 deputat təmsil olunur ki, onlar da bu məqsədlərdə səfərbər olunub"
Avropa Parlamenti növbəti dəfə Azərbaycan əleyhinə qətnamə qəbul edib. Qətnamədə Avropa İttifaqından Azərbaycana qarşı siyasi-iqtisadi, hərbi sanksiyalar qoyulmasına çağırış edilib.
Araşdırmalar göstərir ki, Azərbaycana qarşı çıxan deputatlar bundan əvvəl də Avropa Parlamentində eyni mövqedən çıxış edənlərdir. Prezident İlham Əliyev Almaniya biznes nümayəndələrini qəbul edərkən bu iyrənc oyunları ifşa etmişdi.
Bu oyunların arxasında Makron kimiləri, Avropa Parlamentində olan islamafob, rasist və türkofob dairələr, səlibçi və neokolonial təfəkkürlü agentlər dayanır. Azərbaycanın Avropa Parlamenti qarşısında heç bir öhdəliyi yoxdur.
Politoloq Yeganə Hacıyeva "Bakı-Xəbər"ə açıqlamasında bildirdi ki, ümumiyyətlə, beynəlxalq təşkilatlarda uzun illərdir müxtəlif siyasi-iqtisadi lobbi qrupları təşəkkül tapıb, onlar hədəflərinə çatmaq üçün təhrif olunmuş informasiyalar əsasında qərəz və təzyiq kampaniyalarının aparılması təcrübəsini geniş tətbiq edirlər:
"Ancaq Azərbaycanın 44 günlük Vətən müharibəsində qazandığı tarixi Zəfər və ondan sonrakı dövrdə bir-birinin ardınca əldə etdiyi hərbi-siyasi qələbələr, o cümlədən ötən ilin sentyabrında lokal xarakterli antiterror tədbirləri nəticəsində ərazi bütövlüyünü və dövlət suverenliyini tam bərpa etməsi Qərbdəki anti-Azərbaycançı, islamofob və türkofob dairələri səfərbər edib.
Azərbaycan torpaqları 30 il ərzində işğal altında saxlanıldı. Bir milyon nəfər azərbaycanlı humanitar bohranın ən dəhşətli formasını yaşadı: qaçqına, məcburi köçkünə çevrildi; itkin düşdü; əsir və girov götürüldü.
Ermənistanın Azərbaycan torpaqlarını işğal altında saxladığı dövrdə səsləri çıxmayan, işğalçıya tutduğu torpaqlardan, hətta keçmiş Dağlıq Qarabağ Muxtar Vilayətinə heç bir aidiyyəti olmayan yeddi rayondan çıxması üçün heç bir təzyiq göstərməyən həmin dairələr gücümüz hesabına torpaqlarımızı düşmən tapdağından qurtarmağımızı ölkəmizə bağışlaya bilmirlər.
Təzyiqləri artırmaqla Azərbaycanı geri addım atmağa məcbur etmək istəyirlər. Rəsmi strukturlardan, dövlətlərarası təşkilatlardan başlamış təsirlərində olan QHT və KİV-lərə qədər ən müxtəlif komponentləri təzyiq prosesinə cəlb ediblər. Qərbin, Fransa başda olmaqla, bəzi dövlətləri, rəsmi Parisin təsir güclü olan regional təşkilatlar müxtəlif bəhanələrlə ölkəmizə əsassız hücumlar edir, böhtanlar atır və s.
Baş verənlər onu göstərir ki, Qərb zahirən dəyişsə, inkişaf etsə də, daxilən hələ də orta əsrlərin səlib yürüşçüsü təfəkküründədir, çünki belə kollektiv yanaşmalar orta əsrlərin səlib yürüşlərini xatırladır.
Qərb Ermənistanı Cənubi Qafqaz regionundakı əsas dayağı adlandırır. Rəsmi şəxslər dilə gətirməsələr də, ermənipərəst mədəniyyət və incəsənət xadimləri, jurnalistlər Ermənistanı üç tərəfdən müsəlman ölkələri ilə əhatə olunmuş "xristianlıq qalası" adlandırırlar.
Məsələn, Britaniyanın məşhur "Queen" qrupunun üzvü Brayan Mey 2022-ci ilin sentyabrında Ermənistanla Azərbaycan arasındakı sərhəd toqquşmasından sonra demişdi: "Ermənistan heç bir nefti, qazı və ya böyük sərvəti olmayan kiçik bir ölkədir.
Hər tərəfdən müsəlman rejimlərlə əhatə olunmuş xristianlıq və demokratiya adasıdır. Bu, dünyanın ən sülhsevər ölkələrindən biridir. Hazırda Ermənistan yenidən yer üzündən silinmək planı ilə təhdid edilir. "Azərbaycan–Türkiyə–Rusiya ittifaqına" qarşı Ermənistan tamamilə müdafiəsizdir və sağ qalmaq üçün Qərbin tam dəstəyinə ehtiyacı var" və s.
Avropa Parlamentinin qəbul etdiyi qətnamə və bəyanatlarda erməni işğalı ifadəsi əksini tapsa da, məsələdə Azərbaycana qarşı həmişə ikili standartlar siyasəti yürüdülüb. Qurum Ermənistana işğal etdiyi Azərbaycan torpaqlarından çıxması üçün heç vaxt təzyiq göstərməyib.
Heç bir halda işğalı təsdiqləyən BMT-nin qətnamələrinə riayətə və beynəlxalq hüququn normalarına və prinsiplərinə hörmətə çağırmayıb.
Avropa Parlamentində Sosialistlər, Demokratlar və Yaşıllar; Avropa Xalq Partiyası; Avropa üçün Liberallar və Demokratlar Alyansı; Avropa Mühafizəkarları və Demokratik Alyans; Birləşmiş Avropa Sol Qrupu və digərləri anti -Azərbayvan prosesdə aktiv rol oynayırlar. AP -nin LGBT fraksiyasına üzv olan 157 deputat təmsil olunur ki, onlar da bu məqsədlərdə səfərbər olunub".
Məhəmmədəli QƏRİBLİ
