Bakı ilə İrəvan arasında Almaniyanın sülh təşəbbüsü hansı nöqtəyədək gedə biləcək?
Rəşad Bayramov: "Berlində tətəflər arasında müsbət atmosfer yaradılsa da, yenə Paris Paşinyana təzyiqlər edə və sərhəddə gərginlik yarada bilər"
Azərbaycan və Ermənistan nazirləri iki ölkə arasında sülh quruculuğu üçün ilk dəfədir ki, Berlində bir araya gəlirlər. Buna qədər tərəflər Moskva, Brüssel, Vashinqton formatlarında sülh danışıqları aparıblar.
Amma indi görünən odur ki, Brüssel və Vaşinqtonu Berlin formatı əvəzləyir.
Nazirlərin bu görüşü fevralın 17-də keçirilmiş Münhen Təhlükəsizlik Konfransında Azərbaycan və Ermənistan liderlərinin ikitərəfli görüşündə razılaşdırılıb. Almaniyanın sülh təşəbbüsü hansı nöqtəyədək gedə biləcək?
Politoloq Rəşad Bayramov "Bakı-Xəbər"ə açıqlamasında bildirdi ki, buna ən dəqiq qiyməti Prezident İlham Əliyev verdi: "Ölkə başçısı Alman İqtisadiyyatının Şərq Komitəsinin sədri Mixael Harmsın rəhbərlik etdiyi nümayəndə heyətini qəbul edərkən dedi ki, Almaniya Fransadan fərqli olaraq sülh prosesində neytrallıq nümayiş etdirir.
Prezident keçən il Berlinə səfəri zamanı Almaniya kansleri ilə görüşündə əlaqələrin geniş gündəliyinə daxil olan məsələlərin, o cümlədən iqtisadi əməkdaşlıq məsələlərin müzakirə olunduğunu qeyd edib.
Eyni zamanda dövlət başçısı kansler Şoltsun təşəbbüsü ilə bu yaxınlarda Münhendə Ermənistanın baş naziri Nikol Paşinyanla keçirilən görüşün sülh prosesinə dinamizm gətirilməsi baxımından önəmini vurğulayıb.
Bununla yanaşı, İlham Əliyev Almaniya tərəfinin təklifi ilə xarici işlər nazirləri arasında Berlində görüşün keçirilməsinin də Azərbaycan tərəfindən dəstəkləndiyini qeyd edib. Belə ki, Almaniya qonşuluğunda yerləşən, necə deyərlər, alovun üstünə benzin tökən və Ermənistanı öldürücü silahlarla təchiz edən Fransadan fərqli olaraq, sülh prosesində neytrallıq nümayiş etdirməyə çalışır. Almaniya paytaxtının sülh dialoqunun yeni platforması kimi təşəbbüsü ələ almağa çalışdığı göz qabağındadır. Bakının sülh danışıqlarının bu platformasından praqmatik alman dəqiqliyinə ümid bəsləməsi əbəs deyil.
Sonuncu Münhen görüşündə də müsbət atmosfer yaradılandan sonra Fransa özünün pozuculuq fəaliyyətini davam etdirdi. Paşinyan Parisə çağırıldı, orada hərbi yardımla bağlı beynini doldurdular. Baş nazir elə oradaca təxribatçı bəyanatlar verdi, Azərbaycanı Ermənistana təcavüzə hazırlaşmaqda ittiham elədi. Bu dəfə də oxşar situasiya yarana bilər. Berlində tətəflər arasında müsbət atmosfer yaradılsa da, yenə Paris Paşinyana təzyiqlər edə və sərhəddə gərginlik yarada bilər".
Məhəmmədəli QƏRİBLİ
