Xəyal Bəşirov: "Makron hakimiyyətə gəldiyi gündən bugünə qədər ölkə daxilində fransızlarla mübarizə aparır..."
Emmanuel Makronun yürütdüyü daxili və xarici siyasət artıq Fransa və fransızlar üçün böyük təhlükəyə çevrilir. Fransa daxilində sosial, siyasi böhranlar nəticəsində narazılıqlar artır və fransızlar bu böhranın səbəbkarı kimi Makronu görürlər.
Əlbəttə, bu ölkəyə rəhbərlik edirsə, baş verənlərin məsuliyyəti də onun yürütdüyü yaramaz siyasətin üzərinə düşür. Vəziyyət o şəkil alıb ki, artıq Makronun impiçment tələbi ortaya çıxıb.
Belə ki, Fransa "Vətənpərvərlər" Partiyasının rəhbəri Florian Filippo hökuməti ölkə Prezidenti Emmanuel Makronun impiçment olunmasına çağırış edib. Partiya sədri bu barədə "X" sosial şəbəkəsində yazıb.
Onun sözlərinə görə, Makron Fransaya nifrət edir və onu üçüncü dünya müharibəsinə sürükləməyə çalışır: "Deputatların hərəkətə keçməsi üçün petisiya hazırlanmalıdır. Konstitusiyanın müharibə məsələsi üzrə səsverməni tələb edən 35 və 68-ci maddələri impiçmentini nəzərdə tutur".
"Makronun impiçment edilməsi məsələsi, təbii ki, fransız xalqının haqlı tələbidir"
Siyasi və Hüquqi Araşdırmalar Mərkəzinin rəhbəri, politoloq Xəyal Bəşirov "Bakı-Xəbər"ə şərhində "Emmanuel Makronin Fransaya rəhbərlik etdiyi dönəmdə yürütdüyü siyasətin mahiyyətinə nəzər yetirəndə, əslində fransız xalqının və fransız siyasətçilərinin onun haqqında belə fikirlər səsləndirməsini normal qarşılamaq olur. Çünki Makron yürütdüyü siyasətlə təkcə ölkə daxilində deyil, həm də Fransanın xarici siyasətində çox böyük yanlışlara yol verir. Qeyd olunduğu kimi, əslində Avropanın ümumi maraqlarına zidd addımlar atır"-deyə bildirdi.
X.Bəşirovun sözlərinə görə, Fransanın tarixinə nəzər yetirsək görərik ki, həm Birinci, həm də İkinci dünya müharibəsində məğlubiyyətə uğramasına baxmayaraq, Fransa müharibədə qalib gələn dövlətlərin əldə etdiyi qənimətləri bölən tərəflərin sırasında yer alıb. O vurğuladı ki, əslində o zaman Fransaya rəhbərlik etmiş şəxslər bu siyasəti reallaşdırıb. "Bu gün Makron Fransanın ənənəvi siyasətinə qarşı çıxır, Fransanın yürütdüyü o siyasi proseslərin tam ziddinə addımlar atır. Məhz elə ona görədir ki, Makron hakimiyyətə gəldiyi gündən bugünə qədər ölkə daxilində fransızlarla mübarizə aparır, sosial və iqtisadi sahədə qanunvericiliyə dəyişikliklər edilməsi ilə bağlı vətəndaşlarla açıq şəkildə küçələrdə mübarizə aparır, polisdən, dəyənəkdən, atdan və itdən onlara qarşı istifadə edir. Yəni bu onun yürütdüyü siyasətin daxili hissəsidir. Bu, daxili siyasətə aid atdığı addımlardır ki, Makronun hakimiyyətə gəlməsi ilə paralel "sarı jiletlilər" də küçələrə axışıblar və onun hakimiyyəti ilə paralel olaraq onlar da küçələrdə mübarizələrini davam etdirirlər. Bu, ölkə daxilində Makron hakimiyyəti tərəfindən müxtəlif qanunvericiliklərə dəyişiklik edilməsinə etiraz əlamətidir. O, həm də ölkədə ayrı-ayrı etnik, dini mənsubiyyətə sahib olan insanlarla da bağlı yanlış və eyni zamanda mürtəce siyasət yürüdür. İslamofobiya Makronun hakimiyyəti dönəmində ən yüksək səviyyəyə çatıb. Görürük ki, türkəfobiya və Azərbaycanfobiya da onun siyasətinin əsas xətlərindən biridir".
X.Bəşirovun sözlərinə görə, onun xarici siyasəti ziyanlı olduğu kimi, daxili siyasəti də ziyanlıdır, etnik mənsubiyyətinə görə Korsikada, Yeni Kalendonyada və hələ də Fransanın müstəmləkəsində olan başqa yerlərdə, adalarda xalqlar öz müstəqillikləri uğrunda mübarizə aparırlar. "Amma Makron hakimiyyəti onların səslərini boğur. O, bu gün öz vətəndaşları ilə bağlı sosial qanunvericiliyə dəyişikliklər edərək, onların gəlirlərinin azaldılması hesabına olsa belə Ukraynaya, Ermənistana və bir sıra digər dövlətlərə silah verir. Eyni zamanda Ukraynaya verdiyi silahların bir hissəsini Ermənistana yönəldir. Yəni Makron hakimiyyəti əslində dünyada baş verən proseslərə tam ədalətsiz və qərəzli yanaşır. Ukraynada tamamilə fərqli müharibə gedir, Ukrayna dövləti öz ərazi bütövlüyü uğrunda mübarizə aparır. Amma Ermənistan isə Azərbaycana qarşı revanşist müharibə istəyindədir. Makron hakimiyyəti həm Ukraynaya, həm də Ermənistana silah verir. Yəni burdan o anlaşılır ki, Makronu əsas maraqlandıran müharibədir, fərqi yoxdur, müharibə ədalətlidir, yaxud ədalətsizdir, haqlıdır və yaxud haqsızdır. Bu prizmadan yanaşanda Makronun siyasəti də uğursuzluğa düçar olamalıdır. Bu məntiqi nəticədir. Məhz ona görədir ki, Fransanın bu gün dünyada baş verənn proseslərə heç bir təsir mexanizmi yoxdur, Fransa Afrikadan, Nigerdən və zamanında Fransanın müstəmləkəsi olmuş digər dövlətlərdən biabırcasına qovulmaqdadır. Təbii ki, Makron bu uğursuz siyasətini Cənubi Qafqazda proseslərə təsir göstərməklə dəyişməyə, diqqətləri yayındırmağa çalışır. Ancaq bu gördüyümüz kimi uğursuzluğa düçar olur. Makronun impiçment edilməsi məsələsi təbii ki, fransız xalqının haqlı tələbidir. Düşünürəm ki, Fransız xalqı Makron hakimiyyətinə layiq olan xalq deyil və onlar bu hakimiyyətdən qurtulmaq imkanlarını bir an öncə reallaşdırsalar bu onların maraqlarına xidmət edə bilər. Çünki Makronun hakimiyyətdə olduğu hər an, hər saat, hər gün Fransa dövlətinin nüfuzdan düşməsinə, beynəlxalq aləmdə imicinə xələl gəlməsinə, eyni zamanda Fransanın həm daxili, həm xarici siyasətdə uğursuzluğa düçar olmasına gətirib çıxarır. Bunun da əsas səbəbkarı Makronun cılız siyasətidir. Bu, kənar müdaxilələr olmadan fransız xalqının öz seçimi olmalıdır. Fransız xalqı, təbii ki, bu məsələdə dediyini ortaya qoyub Emmanuel Makron hakimiyyətindən və ümumlikdə Fransanın həm daxili, həm də xarici siyasətindəki uğursuz tendensiyadan qurtula biləcəklər"-deyə X.Bəşirov qeyd etdi.
İradə SARIYEVA
