Avropanın qərəzli siyasəti Azərbaycan cəmiyyətini islama daha çox meylləndirir...
Məhərrəm Zülfüqarlı: "Ölkəmizə qarşı ədalətsiz siyasət həm də xristian təəssübkeşliyindən irəli gəlir"
Prezident İlham Əliyev Alman İqtisadiyyatının Şərq Komitəsinin sədri Mixael Harmsın rəhbərlik etdiyi nümayəndə heyətini qəbul edərkən dedi ki, Ukrayna öz ərazi bütövlüyünü bərpa etmək istəyir. Almaniya və digər ölkələr Ukraynaya silahlar göndərir:
"Siz hamınız bəyan edirsiniz ki, Ukrayna öz ərazi bütövlüyünü təmin etməlidir. Bəs bizim ərazi bütövlüyümüz?! Məgər bu məsələ Ukrayna məsələsindən daha az önəmlidir? Əfsuslar olsun ki, biz Cənubi Qafqazda ayırıcı xətlərin qurulması cəhdlərini görürük. Bununla bağlı Azərbaycanda bir çox insanlar belə düşünürlər ki, Avropa institutları tərəfindən Cənubi Qafqazda Gürcüstan və Ermənistanı çox yaxın qəbul etdikləri, Azərbaycanın isə demonizə edildiyi bir şəraitdə yeganə çıxış yolu bizim İslam dinimizdir. Mən demirəm ki, bu mənim şəxsi fikrimdir, insanların çoxu belə düşünür".
Maraqlıdır, Avropanın bu ikili standartı Azərbaycanda islamın radikallaşması və siyasiləşməsi perspektivlərinə necə təsir göstərə bilər?
"Cəmiyətimiz çıxış yolunu islam həmrəyliyində, müsəlman ölkələrlə yaxın əlaqələrin qurulmasında görür"
Sözügedən məsələni "Bakı-Xəbər"ə şərh edən AVCİYA-nın vitse-prezidenti, professor Məhərrəm Zülfüqarlı buna bir neçə prizmadan yanaşdı: "Prezident Əliyevin qaldırdığı məsələ çox aktualdır. Ölkə başçısı çox böyük və təcrübəli siyasətçi olduğuna görə, bütün bu incəlikləri yaxşı bilir. Zaman-zaman Qərb ölkələri ilə görüşlərdə bunları deyir. Bəli, Azərbaycan indiki dövrdə dünyaya bir nümunə göstərdi. Öz gücünə ölkənin ərazi bütövlüyünü bərpa etdi. Ancaq bir sıra böyük dövlətlər, xüsusən də Fransa, o cümlədən ABŞ Azərbaycanın bu mövqeyini bir qədər fərqli dəyərləndirir. Bu da nədən ibarətdir? Ondan ibarətdir ki, onların öz daimi maraqları var. Onların əsas hədəfi Rusiyadır, Çindir. Azərbaycan bu istiqlal savaşında ermənilərlə yanaşı, ruslarla da vuruşdu. Yəni Qarabağ müharibəsində Rusiya Ermənistana hərbi yardım edib. Əfsuslar olsun ki, Qərb bütün bunları görməzdən gəldi. Gəncənun, Bərdənin raket atəşinə tutulmasına biganə yanaşdı. Azərbaycan öz ərazi bütövlüyünü təmin edirdi, torpaqları işğaldan azad edirdi. Qərb Gürcüstanın, Ukraynanın ərazi bütövlüyünün təmin edilməsinə dəstək verdiyi halda, Azərbaycana fərqli yanaşır. Bu, sadəcə riyakarlıqdır. Azərbaycan ərazilərinin işğalı ilə bağlı BMT Təhlükəsizlik Şurasının 4 qətnaməsi olub. Bunları yox saymaq beynəlxalq hüquqa tüpürmək deməkdir. Qərbi qıcıqlandıran odur ki, Rusiyanın forpostu olan Ermənistanı biz məğlub etmişik. Qərbi narahat edən odur ki, Azərbaycan müstəqil siyasət yeridir. Azərbaycan dünyəvi dövlətdir və xalqımız tolerant millətdir. Ancaq o da var ki, ölkəmizə qarşı ədalətsiz siyasət həm də xristian təəssübkeşliyindən irəli gəlir. Qərb hər vasitə ilə Ermənistanı himayə etməyə çalışır. Bütün bunlar, əlbəttə ki, cəmiyyətimizin diqqətindən yayınmır və çıxış yolunu islam həmrəyliyində, müsəlman ölkələrlə yaxın əlaqələrin qurulmasında görürlər. Bütün bunlarla yanaşı, düşünmürəm ki, xalqımız aşırı dərəcədə radikallaşsın. İslam fundamentalizminə qapılsın. Çünki bizim cəmiyyət həmrəyliyə önəm verən xalqdır".
Vidadi ORDAHALLI
