Avropa Parlamenti yenə Azərbaycana qarşı sanksiyalar tətbiq edilməsinə çağıran qətnamə qəbul edib. Bu sənəd də beynəlxalq hüququn norma və prinsiplərinin aşılması, həmçinin suveren Azərbaycanın daxili işinə qarışılması kimi xarakterizə oluna bilər.
Uzun illər həllini gözləyən məsələləri bir kənara qoyaraq Ermənistanın yalanı üzərində qurulmuş bir kağız parçasının qəbul edilməsi Avropa Parlamentinin beynəlxalq hüquq normalarından uzaq olduğunun və erməni lobbisinin maliyyəsi hesabına qərarlar qəbul etməsinin bir sübutudur.
Ümumiyyətlə, Avropa Parlamenti tərəfindən Azərbaycana qarşı təşəbbüslərin və qətnamələrin artıq sayı-hesabı itib. Bir zamanlar Avropanın üzləşdiyi problemlərin qarşısının alınmasında mühüm rol oynayan Avropa Parlamenti son illərdə ancaq korrupsiya cinayətləri və Azərbaycana münasibətdə qərəzli addımları ilə gündəmə gəlir. Avropa Parlamentinin rəhbər şəxslərinin korrupsiya əməllərində dəfələrlə ittiham olunmasına baxmayaraq, bu təcrübə təəssüf ki, bu gün də davam etməkdədir. Yunanıstandan olan vitse-prezident Yeva Kaylinin milyonlarla dollarlıq korrupsiya cinayətində ittiham edilməsi Avroparlamentin tarixində qara ləkədir. Qeyd edək ki, qurumda aşkara çıxan korrupsiya əməllərindən sonra məşhurlaşan, eyni vaxtda Yunanıstan, Ermənistan və Lüksemburq vətəndaşı olan Kaspar Karapetyan bu gün də Avropa Parlamentinin bir çox deputatlarına təsir edir. Bu həmin Karapetyandır ki, vaxtilə Avropa Parlamentinin bir çox deputatlarının yalnız Ermənistana deyil, eləcə də işğal dövründə Qarabağa qanunsuz səfərlərini təşkil edib. Karapetyan Avropanın siyasi salonlarında işğal rejiminin legitimləşdirilməsi cəhdlərində mühüm simalardan biridir. Karapetyan öz fəaliyyəti üçün Avropa siyasətinin mərkəzi olan Brüsseli seçib. Gəncliyində ekstremist yunan və erməni təşkilatlarında fəal iştirak edib. Gəncliyini erməni terrorizminin qalası hesab olunan Beyrutda keçirib. "ASALA" terror təşkilatı ilə yaxın münasibətləri olub. Brilyant və almaz ticarəti ilə məşğul olduğunu iddia edən Karapetyan Avropa İttifaqı-Ermənistan dostluq qrupu Ədalət və Demokratiya uğrunda Ümumavropa Erməni Federasiyası (EAFJD) təşkilatı ilə Qərbdə fəaliyyətini həyata keçirir. Karapetyanın brilyant biznesindən qazandığı çirkli pullar bəzi deputatların gözlərini qamaşdırır. Rəhbərlik etdiyi təşkilat Avropada mövcud olan erməni diaspor və lobbi təşkilatlarının çətiri funksiyasını icra edir. Bu missiya isə ona təsadüfən həvalə edilməyib. Kaspar Karapetyan milyarder, oliqarx, mafiya qurucusu imkanlarından faydalanaraq, EAFJD adından istifadə edərək Avropada "Ermənistanın dostlarını" qidalandırır. O, dünyada təsirli trendlərdən sayılan "mafiya-lobbi" mexanizminin qurucularındandır.
Onu da qeyd edək ki, EAFJD öz fəaliyyətini Ermənistanın Aİ-dəki missiyası, diplomatik heyəti ilə koordinasiya edir. Bunun üçün maliyyə brilyant biznesindəndir. Karapetyan hələ də Afrikanın münaqişəli bölgələrindən çoxrəngli brilyantları qaçaqmalçılıq yolu ilə Avropaya daşıyır. O, Avropadakı digər bir radikal erməni qrupunun rəhbəri Vartan Sirmakes ilə koordinasiya edilmiş fəaliyyət göstərir. Vartan Sirmakesi İsveçrədə erməni mafiyasının xaç atası adlandırılır. 1998-ci ildə saatsaz Frank Müller ilə birlikdə "Franck Muller" şirkətini yaradıb. Mediada yayılan məlumatlara əsasən, bir vaxtlar Karapetyan Avropa Parlamentinin nüfuzlu deputatlarından olan Frank Enqelə gözəl qızlar bağışlamışdı. Sözsüz ki, erməni kəşfiyyatı ilə əlbir olan bu "kənizlər" intim səhnələri kameraların yaddaşına köçürmüşdülər. Gey olduğunu gizlətməyən Piter Omtzix isə elə özünə layiq hədiyyə almış, Karapetyan tərəfindən ona hədiyyə edilmiş homoseksual Karen Oqadcanyanla mükafatlandırılmışdı. Kaspar Karapetyanın brilyant biznesindən qazandığı çirkli pullarla gözü qamaşaraq beynəlxalq hüquqa, ədalətə hörmətsizlik edən Avropa Parlamenti həm də "konyak diplomatiyası"nın təsiri altındadır. Elə buna görə də həmin Avropa Parlamenti nəzərə almaq istəmir ki, regionda sülhün yaranmasına maneə törədən yeganə tərəf Ermənistandır. Ekspertlər hesab edir ki, Avropa Parlamenti artıq obyektiv olmalı və ermənilərin maliyyəsi hesabına qərarlar qəbul etməkdən çəkinməlidir. Düzdür, qurumun qəbul etdiyi qətnamə və qərarların Azərbaycan üçün heç bir əhəmiyyəti yoxdur. Azərbaycan bütün təzyiqlərə baxmayaraq güclənməkdə və öz haqlarını müdafiə etməkdə davam edəcək. Avropa Parlamentinin bir çox deputatları ikili standartlar mövqeyindən düşünməyə alışıblar. Həm də erməni lobbisinin maliyyə axınını əldə etmək lazımdır. Bu səbəbdən onilliklər ərzində Avropanın siyasi strukturları Azərbaycanın bu insanların taleyi və onların doğma torpaqlarına qaytarılması ilə bağlı müraciətlərini, tələblərini və xahişlərini qulaqardına vurublar. Azərbaycanın Qarabağ bölgəsindən didərgin düşmüş insanların 30 ildən çox doğma yurdlarından uzaqda yaşamalarına səssiz qalanlar bu gün öz xoşu ilə Qarabağdan gedən ermənilərin himayədarına çevriliblər. Xatırladaq ki, Azərbaycan bu dövr ərzində hər vəchlə avropalı məmurları qaçqın düşərgələrini ziyarət etməyə, dağıdılmış şəhər və kəndləri görməyə dəvət etsə də, bu mümkün olmayıb. Hətta bu yaxınlarda avropalı rəsmilər ölkəmizə səfərləri zamanı müxtəlif bəhanələrlə azərbaycanlı qaçqınlarla görüşdən imtina ediblər. Amma Karapetyanın pulları ilə Avropa Parlamenti Azərbaycana qarşı hər cür hədyan səsləndirir.
Tahir TAĞIYEV
