Amid Əliyev: "Hər bir siyasi və iqtisadi əməkdaşlıq qarşılıqlı dividendlərə hesablanıb"
Almaniyanın Şərqi Biznes Assosiasiyasının icraçı direktoru Mixael Harmsın başçılıq etdiyi biznes nümayəndə heyəti ölkəmizdə işgüzar səfərdədir.
Münhendə Əliyev-Şolts görüşündən sonra Almaniyanın bir qrup iş adamının Bakıya göndərilməsi o demək deyilmi ki, Almaniya Fransa kimi düşünmür və Azərbaycanın bölgədə müharibə siyasəti apardığına, Ermənistana hücum hazırladığına inanmır? Axı, biznes, biznesmenlər müharibəni sevməz.
Siyasi şərhçi Amid Əliyev "Bakı-Xəbər"ə açıqlamasında bildirdi ki, Münhen konfransı çərçivəsində Azərbaycan və Ermənistanın iştirak edəcəyini bilən federal kansler bu şansı əldən verə bilməzdi: "Öz ərazisində iki dövlət başçısı arasında görüşü təşkil edən Almaniyanın əsas məqsədi, təbii ki, Qafqazdakı proseslərdən kənrada qalmamaqdır.
Burda Azərbaycanın da xüsusi rolu vardır. Belə ki, son zamanlar Almaniyanın Fransa ilə birgə Azərbaycana qarşı demarşlarda iştirakı son anda Almaniya tərəfdən səhv bir siyasət kimi qiymətləndirilib ki, bu gün Almaniya iş adamları Qarabağın yenidən qurulması prosesində iştirak etmək haqqında açıq şəkildə bəyanat verə bilirlər.
Təbii, biz hər zaman bildirmişik ki, proseslərə ədalətli yanaşan, düzgün mövqe nümayiş etdirən və sülh prosesinə töhfə verə bilən hər bir dövlətlə Azərbaycan əməkdlığa hazırdır. Almaniyanın Fransa cəbhəsindən ayrılması da məhz bu fikirlırin bariz nümunəsidir ki, son anda Almaniya Azərbaycanla iqtisadi bağların daha da möhkəmlənməsində maraqlı olduğunu bildirdi.
Bu cəbhədə də Fransa tək qaldı. İlk öncə Münhendəki görüşdə iştirakdan məhrum edildi, indi isə Azərbaycanla iqtisadi əməkdaşlığa Almaniyanın təklifinə Azərbaycan tərəfindən müsbət reaksiya verildi. Bütün bunlar onu deməyə əsas verir ki, Fransanın istənilən yolla bölgəyə nüfuz etmə cəhdləri Azərbaycanın diplomatik manevrləri ilə bərtəraf edilir. Nəticədə isə Fransa yenə də marionet Ermənistan üzərindən növbəti planlarını işə salmalı olur.
Almaniya isə Avropaya enerji təhcuzatında aparıcı mövqeyə malik olan Azərbaycanla keyfiyyətcə yeni əməkdaşlıq səhifəsi açmaqdadır. Bundan sonra isə növbəti addım kimi AŞPA-da nümayəndə heyətimizin də təsdiqlənməsi faktinin olacağını da etmək olar. Hər bir siyasi və iqtisadi əməkdaşlıq qarşılıqlı dividendlərə hesablanıb. Hesab etmək olar ki, bu məsələdə də Almaniya Azərbaycanı dəstəkləyəcək".
Azərbaycanda 180-ə yaxın alman şirkəti uğurla fəaliyyət göstərir, 2023-cü ildə Azərbaycanla Almaniya arasında ticarət dövriyyəsi 45,4% artaraq 1,8 milyard dollar təşkil edib.
Bu barədə bu gün Azərbaycan İqtisadiyyat Nazirliyində Almaniyanın Şərq Biznes Assosiasiyasının icraçı direktoru Mixael Harmsın rəhbərlik etdiyi nümayəndə heyəti ilə görüşdə bildirilib.
Görüşdə Azərbaycanda beynəlxalq tərəfdaşların, o cümlədən alman şirkətlərinin fəaliyyəti üçün əlverişli investisiya mühitinin olduğu, əməkdaşlığımızın uğurlu təcrübəsinin iqtisadiyyatın müxtəlif sahələrində əlaqələrin inkişafına təkan verdiyi bildirilib.
Məhəmmədəli QƏRİBLİ
