Elşad Həsənov: "Məqsəd Ermənistanı silahlandırmaq və bununla bağlı legitim hüquqi zəmin formalaşdırmaqdır"
Prezident İlham Əliyev Alman İqtisadiyyatının Şərq Komitəsinin sədri Mixael Harmsın rəhbərlik etdiyi nümayəndə heyətini qəbul edərkən dedi ki, Cozef Borrelin qeyri-adekvat bəyanatları bizi çox məyus edib.
Əvvəla, onun bu bəyanatları heç bir reallığı əks etdirmir və beynəlxalq hüququn normalarına ziddir. İkincisi, Azərbaycan tərəfi bu bəyanatları ölkəmizə qarşı pərdələnmiş təhdid kimi qiymətləndirir. Belə ki, Borrel bildirib ki, Azərbaycan Ermənistana hücum edərsə, bunun acı nəticələrini görəcək. Əvvəla, Borrel bu məlumatı haradan alıb ki, Azərbaycan Ermənistana hücum etməyi planlaşdırır? Bizdə belə planlar yoxdur. Onlar cənab Makronun insinuasiyalarıdır. Bütün bunlar Fransanın guya Azərbaycanın Ermənistana hücuma hazırlanması ilə bağlı ölkəmizin demonizə edilməsinə əsaslanan anti-Azərbaycan siyasətinin bir hissəsidir.
Maraqlıdır, Borrel və digər Avropa rəsmiləri Azərbaycanın Ermənistana guya hücum edəcəyi ilə bağlı bu ideyanı nə üçün uydururlar? Bu ideya onların gələcəyə hesabladıqları hansı planları örtmək məqsədilə uydurulub? Niyə və nədən ibarətdir? Bu ideya pərdəsi altında onlar nəyi həyata keçirmək istəyirlər və hədəf nədən ibarətdir?
"Hədəflərdən biri də Rusiya hərbi bazalarını oradan çıxarmaqdır"
Məsələ ilə bağlı "Bakı-Xəbər"ə açıqlama verən siyasi ekspert Elşad Həsənov hesab edir ki, bunda məqsəd Azərbaycanı gözdən salmaqdır: "Borrel dəfələrlə Azərbaycana qarşı əsassız ittihamlarla çıxış edib. Bu da Fransa prezidenti Makronun istəyi ilə həyata keçirilir. Çünki Avroittifaqda siyasi məsələləri gündəmə gətirən Fransadır. İqtisadi məsələlərdə isə Almaniya hegemonluq edir. Borrelin Azərbaycana yönəlik ittihamlarının heç bir əsası yoxdur. Ermənilərin özləri Qarabağı tərk edənlərin 100 nəfər olduğunu dedikləri halda, Borrel 150 min ermənidən dəm vurur. Guya Qarabağı 150 min erməni tərk edib. Bu dərəcədə əsassız və uydurma xarakterli fikirlər səsləndirirlər. Azərbaycana yaxşı məlumdur ki, ölkəmizə qarşı bu uydurmalar haradan qaynaqlanır. Belə yalanlar düşünülmüş şəkildə uydurulur və məqsəd Azərbaycanı gözdən salmaqdır. Fransa ilə yanaşı, Hollandiya və Belçikada olan müəyyən dairələr də bu qərəzli kampaniyanın içində yer alırlar. Ağıla gəlməyən yalanlar uydururlar. Guya yayda Avropa İttifaqı rəhbərliyi məzuniyyətdə olarkən Azərbaycan Zəngəzura hücum edəcək. Belə yalançı təbliğatda məqsəd həm də odur ki, Ermənistanı güclü şəkildə silahlandırsınlar və bununla bağlı legitim hüquqi zəmin formalaşdırsınlar. Pərdəarxası məqsədlərdən biri də bundan ibarətdir. Bütün bunlardan sonra Fransa müdafiə nazirinin Ermənistana səfəri, bir sıra müqavilələrin imzalanması məlum planların tərkib hissəsidir. Bundan əvvəl Ermənistan Hindistandan 245 milyon dollarlıq "Pinaka" reaktiv yaylım atəşi qurğuları və tank əleyhinə sistemlərin alması ilə bağlı müqavilə imzalayıb. Faktiki olaraq Ermənistan sürətlə silahlandırılır. Bütün bunların arxasında gizlənən məqsədlərdən biri də Rusiya hərbi bazalarını Ermənistandan çıxarmaqdır. Bütün bu siyasi oyunların mahiyyətini həm Azərbaycanda, həm də Rusiyada çox yaxşı bilirlər. Bir sözlə, bu yollarla sülh sazişinin imzalanmasını yubandırmaq və Ermənistanı müharibəyə hazırlamaq istəyirlər. Ermənistan təxribata uyub müharibəyə gedərsə, bu onun üçün fəlakətlə nəticələnəcək".
Vidadi ORDAHALLI
