Samir Hümbətov: "Hər vəziyyətdə Ermənistanın Azərbaycana və Rusiyaya qarşı Avropa İttifaqının əli ilə tutduğu mövqe…"
Ermənistan Xarici İşlər Nazirliyinin mətbuat katibi Ani Badalyan məlumat verib ki, gündəlikdə Aİ-nin xarici işlər və təhlükəsizlik siyasəti üzrə ali nümayəndəsi Cozep Borrelin Ermənistana səfəri var ki, bu da Ermənistan Respublikası tərəfindən müsbət qarşılanır;
"Artıq qeyd etdiyimiz kimi, biz Ermənistan-Aİ tərəfdaşlığını daha da dərinləşdirmək imkanlarını araşdırırıq. Səfərin konkret tarixlərini səfərə yaxın elan edəcəyik".
Xatırladaq ki, Aİ-nin Ermənistandakı missiyasının rəhbəri, səfir Vasilis Maraqos Avropa Komissiyasının sədr müavini, Aİ-nin xarici işlər və təhlükəsizlik siyasəti üzrə ali nümayəndəsi Cozep Borrelin Ermənistana səfər etmək istədiyini bildirib.
Borrel Ermənistanda Rusiya və Azərbaycan əleyhinə nə hazırlaya bilər?
Siyasi şərhçi Samir Hümbətov "Bakı-Xəbər"ə açıqlamasında bildirdi ki, Ermənistanda Avropa İttifaqının özünün xüsusi maraqları var: "Görünən odur ki, Avropa İttifaqının Şərqə doğru genişlənməsində Ermənistan böyük rol oynayır. Gürcüstan baş nazirinin son bir açıqlamasına rast gəldim ki, orada Rusiyaya qarşı sanksiyalara qoşulmayacaqlarını bildirdilər. Rusiyanın Gürcüstan ərazisini işğal etməsinə baxmayaraq, o, vəziyyəti daha da gərginləşdirmək istəmir. Azərbaycan isə bölgədə öz maraqları prizmasından siyasət aparır. Ona görə də, burada ən zəif halqa Ermənistandır və onun üzərindən Avropa İttifaqı bölgədə gərginliyi davam etdirməkdə maraqlıdır. Ola bilsin ki, Ermənistan boşluq yaradarsa, yenə də sərhəddə təxribatlar törətməyə çalışsın. Avropa İttifaqı kiçik miqyasda bölgədə gərginlik yaratmaq istəyirsə, böyük miqyasda da Rusiyanı Ermənistandan çıxarmağa çalışır. Bunun da zərbəsi Ermənistanla Azərbaycanın arasında gərginliyin yaranmasından ibarət olacaq. Mən hesab edirəm ki, Avropa İttifaqı və onun xarici siyasət və təhlükəsizlik məsələləri üzrə komissarı Borrelin Ermənistana səfəri bu baxımdan nəzərdə tutulmuş ola bilər. Azərbaycan bu məsələni diqqətdə saxlamalıdır. Amma Ermənistan anlamalıdır ki, onun tək çıxış yolu Azərbaycanla münasibətləri normallaşdırmaqdır. Bölgəyə əbədi sülhün gəlməsi üçün Ermənistan Azərbaycanın şərtlərini yerinə yetirməyə borcludur. Görünən odur ki, Ermənistan hazırda Avropa İttifaqının mülki missiyasının artırılmasında maraqlıdır. Bu da onun öz marağı yox, Avropa İttifaqınln marağıdır. Eyni zamanda o, Fransa, Avropa İttifaqının vasitəsi ilə özünü burada möhkəmlətməyə çalışır. Hər vəziyyətdə Ermənistanın Azərbaycana və Rusiyaya qarşı Avropa İttifaqının əli ilə tutduğu mövqe onun özünün böyük problemlərlə üzləşəcəyinə ciddi işarə kimi görünür".
Qərbin Rusiyanı Cənubi Qafqazdan sıxışdırıb çıxarmağa hesablanmış oyunları tam sürətlə yeni fazaya qədəm qoyub. Kollektiv Qərb regionda maraqlarını təmin etmək üçün qurbanlıq keçi kimi Ermənistanı seçib. Artıq İrəvan iki tərəfin maraq münaqişəsinin mərkəzinə çevrilib. Bu ölkənin hökuməti isə Rusiya əleyhinə ittifaqa qoşulmaq üzrədir və bunun ölkə üçün dağıdıcı nəticələrə səbəb olacağını unutmuş kimi görünür. Qərb, xüsusən də ABŞ və Fransa özünü Ermənistanın himayədarı kimi aparsa da, əslində sülh prosesini pozmaq, sabotaj etməkdən başqa bir işə yarayan fəaliyyət göstərmir.
Məhəmmədəli QƏRİBLİ
