Sahil Kərimli: "Onun uzaq Qərbdən, Avropadan təhlükəsizliyi üçün təminat axtarması da absurddur"
Ermənistan Təhlükəsizlik Şurasının katibi Armen Qriqoryan jurnalistlərə bildirib ki, Ermənistan təhlükəsizlik və xarici siyasətini şaxələndirir:
"Ermənistan xarici siyasətdə tərəddüd etmir. Ermənistan təhlükəsizlik və xarici siyasətini şaxələndirir. Biz bunu açıq şəkildə, siyasi mesajlar və hərəkətlərlə edirik".
Onun sözlərinə görə, diversifikasiya təkcə Qərbi deyil, Hindistanı və bir sıra digər ölkələri də əhatə edir:
"2020-2021-ci ilə qədər bir hissəsi olduğu təhlükəsizlik sisteminin işləmədiyini, tamamilə səmərəsiz olduğunu görən Ermənistan özü üçün təhlükəsizlik təminatları axtarır. Biz bu istiqamətdə fəaliyyətimizi davam etdirəcəyik. Siyasətimizdə qətiyyətliyik və bu istiqamətdə bütün məqsədlərimizi reallaşdıracağıq".
Ermənistan çoxvektorlu siyasət kursunu sona qədər həyata keçirə biləcəkmi?
Siyasi şərhçi Sahil Kərimli "Bakı-Xəbər"ə açıqlamasında bildirdi ki, Ermənistan xarici siyasətini qurmaq üçün ilk növbədə Azərbaycanla münasibətlərini normallaşdırmalıdır: "Bu gün Ermənistan heç cür çoxşaxəli xarici siyasət yürütmək iqtidarında olan bir ölkə deyil. Çünki ilk növbədə Ermənistan həm daxili, həm xarici siyasətində müstəqil xətt həyata keçirə bilmir. O, Qərbin və Avropa dairələrinin ciddi təzyiqləri altındadır, həmin siyasi dairələrin diqtəsi ilə hərəkət edən ölkədir. Ona görə də, mən hesab edirəm ki, Ermənistan müstəqil və ya çoxşaxəli xarici siyasəti bacara bilməz və ilk növbədə bölgə ölkələri ilə, Cənubi Qafqazda yerləşən ölkələrlə, xüsusilə də Azərbaycanla münasibətləri normallaşdırmalıdır. O ki qaldı Ermənistanın təhlükəsizlik məsələsinə, bu da ilk növbədə Azərbaycanla sülh müqaviləsi imzalamasından keçir. Çünki Ermənistan öz təhlükəsizliyi üçün Qərbdən, Avropa İttifaqından nələrsə gözləməkdənsə, bölgədə sülhə və təhlükəsizliyə dəstək olmalıdır, bunun üçün də əməli addımlar atmalıdır. Yeganə yol da Türkiyə və Azərbaycanla münasibətlərin normallaşdırılması, sülh müqaviləsinin imzalanmasından keçir. Ermənistan nə qədər qeyri - konstruktiv mövqe nümayiş etdirsə, özünü daha böyük təhlükə altına alacaq, Ermənistan adlı bir dövlətin gələcəyi çox böyük sual altına düşəcək. Onun uzaq Qərbdən, Avropadan təhlükəsizliyi üçün təminat axtarması da absurddur. Çünki yüz kilometrlərlə uzaqda yerləşən, heç bir təsir imkanları olmayan ölkələrin yalnız quru vədlərini, sözdə bəyanatlarla dəstəklərini görmək mümkündür. Yenə də qeyd etmək istəyirəm ki, Ermənistan bir dövlət kimi təhlükəsizliyini təmin etmək, bölgədə sülh və rifah içərisində yaşamaq istəyirsə, yeganə yolu Azərbaycanla münasibətləri normallaşdırmaq, sülh müqaviləsi imzalamaqdır".
Ermənistan hakimiyyəti nə etdiyini özü də bilmir, indi erməni hakimiyyəti kənardan müəyyən olunmuş göstərişlərə əməl edir. Bu da regiondakı vəziyyəti qəlizləşdirir. Ermənistanın bu zəifliyi Cənubi Qafqazın bir çox xarici maraqların toqquşma meydanına çevrilməsinə səbəb olub. Təəssüf ki, bu hakimiyyətin xarici siyasət konsepsiyası yoxdur. Belə davam edərsə, Ermənistan xaricilərin idarə etdiyi əraziyə çevriləcək. Əgər Ermənistan Azərbaycana qarşı hər hansı bir hərbi əməliyyata cəhd etsə, onun mövcudluğu şübhə altına düşə bilər.
Məhəmmədəli QƏRİBLİ
