Natiq Muxtarlı: "Azərbaycanı heç kim Olimpiya Oyunlarından uzaqlaşdıra bilməz"
Azərbaycanın öz ərazi bütövlüyünü, torpaqları üzərində suverenliyini təmin etməsi erməniləri və onların havadarlarını, onları separatçılığa həvəsləndirənləri elə narahat edib ki, quyruğu yanmış siçan kimi özlərini ora-bura vururlar.
Dünyada o təşkilat qalmayıb ki, antiazərbaycan düşmənləri özlərini ora dürtməsin, Azərbaycana qarşı "tədbir görülməsini" tələb etməsin.
Uzun illərdir idmandan, mədəniyyətdən, sənətdən siyasi məqsədlər üçün istifadə edən ermənilər, onların "böyük bacısı" Fransa gecə-gündüz çalışır ki, Azərbaycana pislik etsinlər, amma qazdıqları quyuya özlərinin düşəcəyi şübhəsizdir.
Gecə-gündüz "danos" yazmaqdan bezməyən separatçı qalıqları, daşnak sürüsü və onların yandaşları indi də Beynəlxalq Olimpiya Komitsinin zəhləsini tökməklə məşğuldur. İndi də özlərinə əl qatırlar ki, Azərbaycan 2024-cü ildə Parisdə keçiriləcək Olimpiya Oyunlarında iştirakdan məhrum edilsin.
Belə ki, qondarma "Avropalılar Arsax uğrunda" hərəkatı BOK-u Azərbaycanın 2024-cü ildə Parisdə keçiriləcək Yay Olimpiya Oyunlarında iştirakını qadağan etməyə çağırıb.
Erməni mediası yazır ki, "Avropalılar Arsax uğrunda" hərəkatı Beynəlxalq Olimpiya Komitəsinin (BOK) prezidentinə məktub göndərərək Azərbaycanın 2024-cü ildə Parisdə keçiriləcək Yay Olimpiya Oyunlarında iştirak hüququndan məhrum edilməsini və bu ölkənin iştirakına qarşı konkret tədbirlər görülməsini istəyiblər. Məktub, həmçinin Fransa Prezidentinə, Fransa Milli Olimpiya Komitəsinə, Fransanın Olimpiya Oyunlarının Təşkilat Komitəsinə, Paris meriyası və idman, olimpiya və paralimpiya oyunları nazirinə göndərilib.
Erməni mediası onların Azərbaycana qarşı iddialarını da əks etdirib və o iddialar boş və mənasız, qazan dınqıltısını xatırladan bir nəsnə olduğu üçün ona əhəmiyyət vermirik. Çünki yenə də erməni səsi ilə köhnə bayatı çağırırlar...
"Azərbaycana qarşı irəli sürdükləri iddia hər kəsdə gülüş doğurur"
İdman mütəxəssisi Natiq Muxtarlı "Bakı-Xəbər"ə şərhində "Ermənilərin belə iddiaya düşməsi həm gülüncdür, həm də tipik erməni xarakterinin göstəricisidir.
Azərbaycana nəinki müharibədə, müharibədən sonra da bütün siyasi platformalarda məğlub olan ermənilərin saman çöpündən yapışmaqdan başqa əlacı qalmayıb.
Əslində bunu "saman çöpündən yapışmaq" da adlandıra bilmərik. Çünki ortada "saman çöpü" də yoxdur.
Azərbaycanı heç kim Olimpiya Oyunlarından uzaqlaşdıra bilməz. Bunu nəinki Ermənistan, hətta bütün Fransa tələb etsə də. Çünki bunun heç bir hüquqi əsası yoxdur"-deyə bildirdi.
N.Muxtarlının sözlərinə görə, sadəcə əlləri hər şeydən üzülən ermənilər qondarma "artsax" məsələsini gündəmdə saxlamaq üçün belə gülünc variantlara əl atmağa məcburdurlar. "Amma inanın, onlar belə iddialarına heç özləri də ciddi yanaşmırlar. Yəni dəqiq bilirlər ki, heç nəyə nail ola bilməyəcəklər.
Amma sarsıdıcı məğlubiyyətlə barışa bilmirlər, üstəlik, əllərində oyuncaq olduqları dövlətlər də erməniləri vadar edirlər ki, bu havaya oynayın. Onlar da oynamalıdırlar, məcburdurlar, amma ritmi tuta bilmirlər.
Ona görə də, Azərbaycana qarşı irəli sürdükləri iddia hər kəsdə gülüş doğurur. Belə iddialara heç bir beynəlxalq təşkilat, o cümlədən Beynəlxalq Olimpiya Komitəsi reaksiya verməz. Çünki bununla həmin təşkilat imicinə sarsıdıcı zərbə vurar. Bu məqamları nəzərə alaraq, ermənilərin belə iddialarından qətiyyən narahat olmağa dəyməz. Özləri deyib, özləri eşidirlər"-deyə N.Muxtarlı əlavə etdi.
İradə SARIYEVA
