Bəhruz Quliyev: "Rusiya Ermənistanı özündən asılı saxlamaq üçün hər zaman onun tərəfindən çıxış edib..."
Bir neçə gün əvvəl Azərbaycanda fitnes məşqçisi kimi tanınan Kamil Zeynallı Moskvada Ermənistanın sorğusuna əsasən saxlanılmışdı. Ermənilərin iddiasına görə, guya K.Zeynallı "ağır cinayət" törədib. Amma Azərbaycan hökumətinin müdaxiləsindən sonra K.Zeynallı sərbəst buraxıldı və vətənə qayıtdı.
Yəni Moskvanın əlaqədar qurumları Azərbaycanın müraciətini cavabsız qoymadı, vətəndaşımızı buraxdı. Məsələnin maraqlı tərəfi odur ki, Rusiyada Ermənistanın müraciəti əsasında Kamili belə operativ şəkildə həbs edənlər nə üçün bu operatvliyi Zori Balayanla, Robert Köçəryanla, Serj Sarkisyanla və başqa qatillərlə bağlı göstərmir? Azərbaycan 20 ildən artıqdır ki, onları İnterpol xəttilə beynəlxalq axtarışa verib. Bu məlumatlar Moskvada da olmamış olmaz, amma uzun illər keçmiş separatçı rejimin "rəsmiləri" də, Ermənistanın keçmiş rəhbərləri də sərbəst şəkildə Moskvaya, Rusiyanın digər şəhərlərinə gedib-gəliblər. Nə yaxşı indiyə qədər Moskvada onları bir dəfə də saxlayan olmayıb? Niyə, səbəb nədir? Bu fərqli, ikili standartlı yanaşma nə deməkdir?
Düzdür, Azərbaycanın müdaxiləsi ilə Kamili buraxdılar. Söhbət ondan gedir ki, Azərbaycanın bu tipli müraciətləri cavabsız qalıb, ancaq ermənilərin o tipli müraciətlərinə yarım saatlıq da olsun saxlamaqla reaksiya verilib. Səbəb nədir?
"Bunu Ermənistanın axtarışa verdiyi adamların Rusiyada saxlanmasının timsalında da görmək olar"
"Məlumdur ki, bütün dövrlərdə Rusiya Ermənistanı öz torpağı sayıb. Ermənistan da forpost olub. Eyni zamanda, Ermənistanda Rusiyanın kifayət qədər böyük vəsaiti var". Bu sözləri "Bakı-Xəbər"ə şərhində "Səs" Media Qrupunin rəhbəri, siyasi ekspert Bəhruz Quliyev deyib.
Bəhruz Quliyev sözlərinə belə davam edib: "Rusiya heç vaxt Ermənistana müstəqil dövlət kimi baxmayıb. Mən düşünürəm ki, Rusiyanın Ermənistana hər zaman dəstək çıxmasında xristian təəssübkeşliyi də rol oynayır.
Digər tərəfdən, Qafqazda sabitlik, sakitlik, qarşılıqlı əməkdaşlıq heç kimə sərf etmir. Bütün dünya, böyük super dövlətlər kiçik dövlətlərdə münaqişə ocaqları yaradaraq onlardan məharətlə təsir mexanizmi kimi istifadə edirlər. Qarabağ probleminin həlli də heç bir dövlətə sərf etməyib. Ona görə ATƏT-in Minsk qrupu, beynəlxalq təşkilatlar, BMT-nin qətnamələri heç vaxt icra olunmayıb. Onlar yalnız kağız üzərində qalıb. Yəni beynəlxalq təşkilatlar və böyük dövlətlər münaqişənin həlli istiqamətində heç vaxt addım atmayıb. Çünki bu onlara sərf etmir.
Rusiya Ermənistanı özündən asılı saxlamaq üçün hər zaman onun tərəfindən çıxış edib və verdiyi qərarlara hörmətlə yanaşıb. Elə bunu Ermənistanın axtarışa verdiyi adamların Rusiyada saxlanılmasının timsalında da görmək olar. Rusiya bilir ki, Azərbaycana təsir imkanları zəifləyib. Sözsüz ki, Qafqazda biz Rusiya ilə razılaşmaya borcluyuq. Reallıq budur. Rusiya super dövlətdir, Qafqazda liderdir və biz bunu qonşuluq siyasətimizdə nəzərə almalıyıq. Amma buna baxmayaraq, Rusiya tərəfdən Azərbaycanla münasibətlər qarşılıqlı bərabərhüquqlu müstəvidə qurulur. Bərabərhüquqlu müstəvidə də dövlətlər öz maraqlarını ortaya qoyduqda birtərəfli maraq göstərilir. Ona görə də Azərbaycanın beynəlxalq axtarışa verdiyi separatçılar Rusiyada saxlanılmır. Rusiya bir növ Ermənistana göstərir ki, mən həmişə sənə lazımam. O istəsə də forpostluqdan çıxa bilməz. Bu gün Rusiya ilə Ermənistan arasında ciddi problem yaranıb. İndiki Ermənistan hakimiyyəti Ermənistanı Rusiya forpostluğundan çıxarıb Qərbin tabeliyinə keçirmək istəyir. Rusiya isə buna imkan vermir. Rusiya bildirmək istəyir ki, sən Rusiya faktorunu həmişə nəzərə almalısan və bizsiz erməniyə həyat yoxdur".
İradə SARIYEVA
