Elşən Mustafayev: "Bununla bir daha sübut olunur ki, Ermənistan öz ərazisini başqa ölkələrin qoşunları üçün münasibətlərin aydınlaşması platsdarmına çevirib"
Avropa İttifaqının Ermənistandakı müşahidə missiyasının rəhbəri Markus Ritter jurnalistlərlə görüşündə deyib ki, missiya Rusiya FTX-nin cavabdehlik zonasında olan Nerkin And ərazisi istisna olmaqla, Ermənistanın bütün ərazisinə səfər edə bilər:
"Biz öncədən də Nerkin Anda getməklə bağlı problemlərin yarana biləcəyini istisna etmirdik".
Jurnalistlər Aİ müşahidəçilərinin Nerkin Anda buraxılmamasının nə ilə izah olunduğunu soruşduqda, o belə cavab verib: "Bu sualı Rusiya tərəfinə vermək lazımdır. Biz Ermənistanda qonaq kimiyik. Bu məsələni Ermənistan həll etməlidir, çünki biz Ermənistanda yerləşən Rusiyanın sülhməramlı qüvvələri ilə əlaqə saxlamırıq".
Ritterin sözlərinə görə, belə bir problem yalnız Nerkin Andla bağlı mövcuddur:
"Rusiya sərhədçiləri Avropa İttifaqının müşahidə missiyasının nümayəndələrini "qaynar nöqtələrə" buraxmırlar".
Ermənistan Təhlükəsizlik Şurasının katibi Armen Qriqoryan bildirib ki, Rusiya sərhədçiləri Aİ-nin müşahidə missiyasının nümayəndələrini Nerkin And kəndinə buraxmırlar.
A.Qriqoryan Rusiyanı Nerkin And dağındakı insidenti dayandırmamaqda günahlandırıb: "Aİ missiyasının bu əraziyə çıxışı yoxdur, Rusiyanın isə var. Rusiya hadisənin qarşısını ala bilmədi. Aİ missiyası tənzimləyici rol oynayır. Biz onların fəaliyyətini dəstəkləməyə davam edəcəyik".
Xatırladaq ki, fevralın 12-də Ermənistan silahlı qüvvələrinin bölmələri Qafan rayonunun Nerkin-And yaşayış məntəqəsindən Azərbaycan ordusunun mövqelərini atəşə tutub, bundan sonra fevralın 13-də Azərbaycan silahlı qüvvələrinin bölmələri tərəfindən "Qisas əməliyyatı" keçirilib. Ermənistan Silahlı Qüvvələrinin atəşə tutulduğu döyüş məntəqəsi tamamilə məhv edilib.
Diqqət çəkən məqam budur ki, Ermənistandakı missiyanın rəhbəri Ermənistanın bütün ərazisində fəaliyyət göstərmək səlahiyyətinin olduğunu bəyan edib. Bəs onlar deyirdi ki, missiyanın fəaliyyəti iki ölkə arasındakı sərhədi monitorinq etmək olacaq? Belə çıxır ki, Ermənistandakı Avropa missiyası öz səlahiyyət həddini də aşmış olub?
Beynəlxalq məsələlər üzrə siyasi şərhçi Elşən Mustafayev "Bakı-Xəbər"ə açıqlamasında bildirdi ki, Avropa İttifaqının mülki missiyası 2022-ci ilin oktyabrında 2 aylıq müvəqqəti missiya adı ilə regiona gəlib və Azərbaycanla əldə olunmuş razılaşmalara zidd fəaliyyəti ilə seçilib: "Amma Ermənistanın "açıq qapı" siyasəti sayəsində regiona daxil olan Avropa İttifaqı bu missiyanı fürsət bilərək fəaliyyətini genişləndirmək, Azərbaycanın razılığı olmadan şərti sərhəddə mandatını və missiya üzvlərinin sayını özbaşına artırmaq yolu tutub. 2023-cü ilin dekabrında Avropa İttifaqı Xarici İşlər Şurasının Ermənistan-Azərbaycan sərhədində yerləşdirilən "mülki missiyasını gücləndirmək məqsədilə" oradakı əməkdaşların sayını 138-dən 209 nəfərə artırmaq barədə razılığa gəlməsi məhz bu siyasətin bir elementi idi. Digər tərəfdən, mülki missiya adı altında Avropa İttifaqı regiona ayrı-ayrı Avropa ölkələrinin keçmiş hərbçilərini, xüsusi xidmət orqanlarının əməkdaşlarını və s. yerləşdirməyə başladı.
Çoxşaxəli məqsədlər arasında Azərbaycan-Ermənistan şərti sərhədini yeni təmas xəttinə çevirmək, burada möhkəmləndirilmiş mövqelər yaratmaq, erməni hərbçilərini kəşfiyyat məlumatları ilə təmin etmək və s. daxil idi. Missiyanın daha bir öhdəliyi Avropa İttifaqının Ermənistana Qarabağın erməni sakinlərinə yardım adı ilə ayırdığı vəsaitin hərbi məqsədlər üçün bölüşdürülməsindən ibarətdir. Bu məqsədlə Avropa İttifaqı 27,2 mln. avro, bir neçə gün əvvəl isə daha 5,5 mln. avro vəsait ayırıb. Vəsaitin necə xərclənməsinə dair ümumiyyətlə heç bir nəzarət mexanizmi yoxdur.
İndi də açıq etiraf edirlər ki, onlar yalnız sərhəddə deyil, Ermənistanın bütün ərazisində fəaliyyət göstərirlər. Hətta bəzi yerlərdə Rusiya hərbçiləri ilə üz-üzə gəlmiş də olurlar. Bununla bir daha sübut olunur ki, Ermənistan öz ərazisini başqa ölkələrin qoşunları üçün münasibətlərin aydınlaşması platsdarmına çevirib".
Məhəmmədəli QƏRİBLİ
