Rəşad Bayramov: "Görünən budur ki, onlar qondarma "Artsax"a bağlı mövcud simvolikaların tam məhvini istəmir"
Hazırda Ermənistanda yaşayan "Artsax" adlı qondarma qurumun saxta "prezidenti" kimi təqdim olunan Samvel Şahramanyan Ermənistanın Korrupsiyaya Qarşı Mübarizə Komitəsi tərəfindən dindirilməyə dəvət olunub. Erməni mediası yazır ki, Şahramanyan ilk dəfə deyil dindirilməyə dəvət olunur:
"O, ikinci dəfədir ki, özünün təqdim etdiyi hesabat əsasında dindirməyə çağırılır".
Görünən budur ki, Şahramanyanın istintaqa çağrılmasında hansısa ciddi əsaslar yoxdur. Ancaq Ermənistan belə addımları ilə həm də qondarma qurumun dolayısı ilə piarını aparmış olur ki, onun yaşadığını, tam məhv olmadığını cəmiyyətə çatdırsın. Görünən budur ki, onlar qondarma "Artsax"a bağlı mövcud simvolikaların tam məhvini istəmir. Güya Şahramanyanı istintaqa çağırmağla öz fəaliyyətlərini ört-basdır edirlər. Bu adamın mühafizə ilə gəzməsi, özünü "Artsax" rəhbəri kimi təqdim etməsinə münasibət bildirilməyib. Ən azından, Ermənistanın rəsmi qurumları bəyanat verə bilər ki, Şahramanyanın özünü "prezident" kimi təqdim etməsi yolverilməzdir və iki ölkə arasındakı münasibətlərə təsir edir. Bunu etmirlərsə, demək ki, əl altdan separatizmə hər vasitə ilə dəstək verirlər.
Ermənistanın separatizmlə bağlı həyata keçirdiyi bu siyasətlə bağlı fikirlərini "Bakı-Xəbər"lə bölüşən siyasi şərhçi Rəşad Bayramov hesab edir ki, Azərbaycan ərazisində özünü müstəqil elan edib, 30 il davam etmiş "Dağlıq Qarabağ Respublikası" yanvarın 1-də ləğv olunmalı idi:
"Bu barədə fərmanı "DQR"-in son prezidenti Samvel Şahramanyan Azərbaycanın bir günlük hərbi əməliyyatlarından sonra vermişdi və sənəd 2024-cü il yanvarın 1-dən qüvvəyə minməli idi.
Amma ötən ilin sonuna az qalmış - dekabrın 22-də o, sözünü geri götürdü və separatçı respublikanın qanunvericiliyində dövlət institutlarının ləğvini dəstəkləyən heç bir sənədin olmadığını bəyan etdi.
Fikrini tez bir zamanda dəyişməsinə baxmayaraq, Şahramanyanın əlində nəzarət etmək üçün torpaq artıq yoxdur və Ermənistanda separatçı hökumətin de-fakto fəaliyyəti üçün şərait yaradılır.
Şahramanyan Qarabağı könüllü tərk edən ermənilərlə birlikdə İrəvana köçüb. Sentyabrın 28-də o, "Dağlıq Qarabağ Respublikasının buraxılması" barədə fərman imzalayıb.
Oktyabrın 19-da, demək olar ki, ermənilərin hamısı Qarabağı tərk etdikdən sonra Şahramanyan Ermənistanda başqa bir fərman imzalayıb və fərmana görə, separatçı prezident, dövlət naziri və digər separatçı rəsmilər maaş almadan fəaliyyətlərini Ermənistanda davam etdirəcəklər. Ermənistan Baş naziri Nikol Paşinyan bildirib ki, o, Qarabağ ermənilərinin öz müqəddaratını təyin etmə haqları üçün mübarizə aparmaqdansa, öz ölkəsinin gələcəyinə üstünlük verəcək. Ancaq bu, sözdə belədir və görürük ki, Şahramanyanın "prezident" kimi təqdimatına şərait yaradılır.
"Dağlıq Qarabağ Respublikası" dünyada heç zaman tanınmayıb, hətta Ermənistanın özü belə, verdiyi hərbi və maliyyə dəstəklərinə baxmayaraq, qurumu tanımayıb.
Ermənistan 2020-ci il 2-ci Qarabağ müharibəsindən sonra ilk dəfə keçən il Azərbaycanın ərazi bütövlüyünü tanıdığını da bəyan edib. Parlament spikeri Alen Simonyan noyabr ayında deyib ki, Ermənistan Azərbaycanın suverenliyini tanıyır. O halda Şahramanyan oyunu nəyə lazımdır?"
Məhəmmədəli QƏRİBLİ
