Elşad Həsənov: "Onlar Ermənistanın tərəfdaşı kimi davranırlar"
Avropa İttifaqının Ermənistanda yerləşən Monitorinq Missiyası il ərzində 1720 patrul xidməti həyata keçirərək sərhədyanı rayonlarda sülh və təhlükəsizliyə töhfə verib.
Bunu Aİ-nin Ermənistandakı müşahidə missiyasının birinci ildönümünə həsr olunmuş tədbirdə Aİ-nin Ermənistandakı müşahidə missiyasının rəhbəri Markus Ritter deyib.
O xatırladıb ki, müşahidə missiyasının fəaliyyətinin ilk aylarında Yexeqnadzorda qərargahı və İcevandan başlayaraq Qafanda bitən 6 aparıcı dayaq məntəqəsi yaradılıb: "Aİ-nin monitorinq missiyası indiyədək sərhəd bölgələrində sülh və təhlükəsizliyə töhfə verən 1720 patrul fəaliyyəti həyata keçirib. Mən siyasi dəstəyə görə Aİ-yə üzv dövlətlərə, eləcə də ekspert göndərdiyinə görə Kanadaya dərin minnətdarlığımızı bildirmək istərdim. Çətin əməliyyat mühitinə baxmayaraq, missiya sərhəd bölgələrində mühüm sabitləşdirici rol oynayır, gərginliyin və insidentlərin sayının azaldılmasına kömək edir".
Bir sözlə, Ritter iddia edir ki, sərhədlərdə sabitliyə töhfə vermişik, özümüzü tərəfsiz oyunçu kimi göstərə bilmişik və s. Bütün bu deyilənlər nə dərəcədə düzdür və həqiqəti özündə əks etdirir? Doğrudanmı Aİ missiyası tərəfsizdir?
"Markus Ritterin missiyanın tərəfsiz olması ilə bağlı dedikləri boğazdan yuxarı fikirlərdir"
Sözügedən məsələyə aydınlıq gətirən siyasi ekspert Elşad Həsənov "Bakı-Xəbər"ə açıqlamasında buna birmənalı yanaşmadı: "Markus Ritterin rəhbərlik etdiyi missiyanın fəaliyyətinin bir illiyini elə təqdim edirlər ki, sankı bu müddət ərzində çox böyük işlər görüblər. Bütün bunlarla yanaşı, missiya üzvlərinin sayını daha da artırmaq istəyirlər. Hətta belə bir ideyanı ortaya atıblar ki, Avropa İttifaqına üzv olan ölkələrin hər birindən orada nümayəndələr təmsil olunsun. Bununla yanaşı iddia edirlər ki, guya onların sərhəddə işi ancaq müşahidə aparmaqdır. Əslində isə bnun belə olmadığını biz yaxşı bilirik. Onların Monitorinq Missiyası adı altında işi əsasən kəşfiyyat məlumatları toplamaqdır. Əgər bunlar həqiqətən də obyektiv monitorinq aparırdılarsa, o zaman nəyə görə fevralın 12-də erməni snayperin əsgərimizi yaralamasına göz yumdular? Niyə belə halın baş verməsini önləmək üçün gərəkən addımları atmadılar? Deməli, Markus Ritterin missiyanın tərəfsiz olması ilə bağlı dedikləri boğazdan yuxarı fikirlərdir. Utanmadan məlum hadisəni onunla əlaqələndirirlər ki, bəs Rusiya onları Qafan istiqamətində müşahidə aparmağa buraxmadığı üçün bu baş verib. Hesab edirəm ki, bu deyilənlərin reallıqla heç bir əlaqəsi yoxdur. Obyektiv olsaydılar, bu özünü hansısa formada göstərərdi. Onlar Ermənistanın tərəfdaşı kimi davranırlar. Binoklla sərhədimizə baxaraq hərbçilərimizin dislokasiya yerlərini müəyyən etməyə çalışırlar. Bir sözlə, Ritterin səsləndirdiyi fikirlərin reallıqla heç bir əlaqəsi yoxdur".
Vidadi ORDAHALLI
