Elxan Şıxəliyev: "Fransa Ermənistanı nə qədər qızışdırsa ki bizə qarşı müharibə etsin, bu mümkün olmayacaq"
Fransa Ermənistana müdafiə təyinatlı hərbi texnikanın verilməsinə razılıq verib. Bunu Fransa prezidenti Emmanuel Makron Ermənistanın baş naziri Nikol Paşinyanla birgə mətbuat konfransında deyib:
"Ermənistanla müdafiə sahəsində əməkdaşlığı davam etdirəcəyik. Fransa müdafiə təyinatlı hərbi ləvazimatların tədarükünə razılıq verib və heç bir gərginlik istəməyərək tam məsuliyyətlə buna davam edəcək".
Fransa lideri qeyd edib ki, ölkəsi Cənubi Qafqazın sülh, inteqrasiya və əməkdaşlıq regionu olmasını istəyir: "Biz Cənubi Qafqazın sülh və əməkdaşlıq regionu olmasını istəyirik və bu mənada regional kommunikasiya kanalları inteqrasiya faktoru olmalıdır".
E.Makron fevralın 12-də Ermənistanla şərti sərhəddə azərbaycanlı hərbçinin yaralanmasından təəssüfləndiyini vurğulayıb:
"Fransa regionda sülh və sabitliyin bərqərar edilməsinə yönəlmiş səylərə töhfə verməyə davam edəcək. Buna yalnız beynəlxalq hüquqa, suverenliyə, sərhədlərin toxunulmazlığına və ölkələrin ərazi bütövlüyünə hörmət etməklə nail olmaq olar".
Bütün bunlar onu deməyə əsas verirmi ki, Makron Paşinyanla həm də yeni müharibə planı müzakirə edib?
Hərbi-siyasi ekspert, ehtiyatda olan polkovnik-leytenant Elxan Şıxəliyev "Bakı-Xəbər"ə açıqlamasında bildirdi ki, Ermənistan baş nazirinin Parisə səfərini bir neçə istiqamətdən dəyərləndirmək olar: "Münhen konfransındakı görüşdə İlham Əliyev Paşinyan qarşısında konkret şərtlər qoydu. Sərhədlərin dəqiqləşməsi, Zəngəzur yolunun açılması, anklav kəndlərin qaytarılması bu qəbildən olan tələblər sırasındadır. Ermənistana çatdırıldı ki, ya bunları həll etsin, ya da Azərbaycan bu məsələni özü həll edəcək. Makronla aparılan müzakirələrdə bu mövzulara toxunulub. Rusiyanın Ermənistan daxilində Paşinyana etdiyi təzyiqlər də müzakirə mövzusu ola bilər. Ermənistanın sürətli silahlanma ilə bağlı Parisdən istədikləri var. Fransa Ermənistanı silahlandırmaqda maraqlıdır. Ermənistanı bu çoğrafiyada cəsarətləndirən amil məhz Makrondur. Onlar revanş adı ilə Cənubi Qafqazda münaqişənin davamını istəyirlər. Bütün platformalarda Makron canfəşanlıq göstərirdi ki, iki ölkə arasında aparılan danışıqlarda moderatorluq etsin. Azərbaycan bunu rədd edib. Buna görə də Makron çox qəzəblidir. Fransa bu hikkəni Azərbaycandan iki istiqamətdə çıxmaq istəyir. Birinci, Ermənistanı sürətli silahlandlrıb Paşinyanı müharibəyə sürkləmək. Gələcəkdə olacaq müharibədə Fransanın birbaşa Ermənistana dəstək verəcəyi ilə bağlı vədlər verilir. İkinci istiqamət olaraq bizə beynəlxalq təşkilatlarda Qarabağdan köçən ermənilərin hüquqları adı ilə təzyiqlər göstərir. Bu təzyiq mexanizminə dair nümunələri biz çox görmüşük. İstənilən halda onlar bu amilləri əllərində təzyiq rıçaqı kimi saxlayacaqlar. Azərbaycan və Türkiyə Şuşa Bəyannaməsi ilə müttəfiqliyi elə rəsmiləşib ki, heç bir üçüncü ölkə bizə təzyiq və təhdid yarada bilməz. Fransa Ermənistanı nə qədər qızışdırsa ki, bizə qarşı müharibə etsin, bu mümkün olmayacaq. Biz öz təhlükəsizliyimizi Türkiyə ilə bərabər şəkildə sığortalamışıq. Beynəlxalq aləmdə isə Fransa bizi sıxışdırmağa cəhd edəcək. Bunu da biz diplomatik səylərimizlə neytrallaşdırmağı bacarmalıyıq. Avropa ölkələri ilə fərdi şəkildə nünasibətləri gücləndirməliyik ki, Avropa İttifaqındakı həmlələri neytrallaşdıra bilək".
Məhəmmədəli QƏRİBLİ
