Şəmsəddin Əliyev: "Ermənistan bilməlidir ki, bu taktika ilə nəyəsə nail ola bilməyəcək"
Ermənilərin tələbi əsasında Moskvada saxlanılan azərbaycanlı fitnes məşqçisi Kamil Zeynallı sərbəst buraxılıb. Onun vəkili Ələkbər Qarayev Moskvada Azərbaycan mediasına bildirib ki, "Rusiya dövləti humanizm göstərib. Azərbaycan dövlətinin köməyi ilə, təkidi ilə o, Azərbaycana qayıdacaq". Artıq Kamil Zeynallı Bakıdadır.
İdmançı çərşənbə günü gecə saat 1 radələrində Moskva polisi tərəfindən Domodedovo aeroportunda saxlanılaraq polis bölməsinə aparılıb, bu barədə o, Instagram hesabında paylaşdığı videoda deyib.
Kamil Zeynallı həmin videoda deyir ki, "Ermənistanın onu beynəlxalq axtarışa verməsi səbəbilə saxlanılıb".
Ermənistan Daxili İşlər Nazirliyinin mətbuat katibi Narek Sarkisyan Azərbaycan vətəndaşı Kamil Zeynallının "qətldə ittiham olunaraq dövlətlərarası axtarışa verildiyini" təsdiqləmişdi.
Ermənistan Prokurorluğu isə bununla bağlı qurumda məlumat olmadığını bildirib.
Azərbaycan Xarici İşlər Nazirliyi məsələnin Rusiyadakı səfirliyin nəzarəti altında olduğunu demişdi.
Bəzi ekspertlər hesab edir ki, məşqçi Kamil Zeynallının Ermənistanın iddiası əsasında Moskvada saxlanması, bizim rəsmi qurumların və ictimaiyyətin təpkisindən sonra azad edilməsi ermənilərin planını pozmuş olub. Bildirilir ki, əslində ermənilər bu cür gedişlərlə hazırda Azərbaycanda həbsdə olan separatçıların liderləri və erməni əsilli milyarder Ruben Vardanyanla bağlı məsələdə əllərinə əlavə "kozırlar" almaq istəyirlər: "Görünən budur ku, onlar bizim də bir neçə tanınmış adamımızı müxtəlif saxta ittihamlar əsaslnda ələ keçirib məsuliyyətə cəlb edəndən sonra Arayik, Vardanyan kimi cinayətkarla dəyişməyə çalışacaqlar".
Ermənistanın bu planını bu dəfə poza bildik, belə halların gələcəkdə təkrarlanmaması üçün hansı addımları atmalıyıq?
Hüquqşunas Şəmsəddin Əliyev "Bakı-Xəbər"ə açıqlamasında bildirdi ki, onların məqsədi hazırda bizdə Cinayət Məcəlləmizdə göstərilən xüsusilə ağır cinayətlərə aid maddələrlə ittiham olunan şəxslərin gələcəkdə dəyişilməsi ilə bağlıdır: "Burada alternativ tədbirlərin görülməsini düşünmək çox çətindir. Ancaq yetərincə tanınmış adamlar, digər nüfuza malik olan insanlar ölkə hüdudundan çıxarkən ehtiyatlı olmalıdırlar. Getməmişdən qabaq bəzi məsələləri aydınlaşdırmalıdırlar, özləri haqqında Ermənistan tərəfinin xüsusi orqanında onlar haqqında hər hansı məlumatın olub-olmamasını öyrənməklə bu məsələləri əngəlləmək olar. Digər tərəfdən də bu baş verənləri beynəlxalq müstəvidə böyütmək lazımdır. Bu, vətəndaşların sərbəst hərəkət etmək imkanını buxovlamaq deməkdir. Bütövlükdə beynəlxalq hüquq assambleyası sırasına Helsinki Assambleyasının 1975-ci ildə insan hüquq və azadlıqları ilə bağlı bir prinsip əlavə olundu. Bütün dünyada insan hüquq və azadlıqlarının qorunması ilə bağlı tanınan normalara riayət olunmalıdır. Ermənistan da bu normaları pozacağı təqdirdə, ən azı onlara beynəlxalq qınaq olmalıdır. Bu məsələləri bir az da böyütmək lazımdır. Ermənistan necə istəyirsə elə də davranır. Bu, bütövlükdə hamılıqla tanınan beynəlxalq hüquqlara zidd hərəkətlərdir.
Bizdə saxlanılan separatçıların cinayətləri göz qabağındadır. Onlar bəşəriyyət əleyhinə cinayətlər törədiblər. Hansısa idmançını saxlayıb, onlarla müqayisə etmək yolverilməzdir. Ermənistan bilməlidir ki, bu taktika ilə nəyəsə nail ola bilməyəcək".
Məhəmmədəli QƏRİBLİ
