Bu günlərdə Türkiyə Milli Kəşfiyyat Təşkilatı Fransa casus şəbəkəsinə qarşı əməliyyat keçirib, üç şübhəli saxlanılıb. Onların Suriya əsilli olduqları qeyd edilib.
Yayılan məlumata əsasən, Milli Kəşfiyyat Təşkilatının İsrail, İran və Rusiya məxfi xidmət orqanlarının fəaliyyətinə qarşı Türkiyədə həyata keçirdiyi casusluq əməliyyatlarından sonra Fransa Xarici Kəşfiyyat Xidmətinin casusları da ifşa edilib.
O da bildirlir ki, üç nəfərlik qrupa Ahmet Katie adlı şəxs rəhbərlik edirmiş. Onlar Türkiyədən xaricə getmək istəyən qaçqınlara işgəncələr verilməsi haqqında saxta infomasiyalar toplayıb Fransa kəşfiyyatına ötürürmüşlər. Vurğulanıb ki, onlar Fransa kəşfiyyatına bir ildir casusluq edirmişlər. Bütün bunlar Fransa kəşfiyyat orqanlarının növbəti fiaskosu hesab olunur. Bundan əvvəl isə Azərbaycan Fransa casus şəbəkəsinə ciddi zərbə vurmuşdu. Yeri gəlmişkən qeyd edək ki, Bakıda həbs olunan casus Martin Rayan ətrafında qalmaqal yeni detalları ilə Fransa gündəmindən düşmək bilmir. Fransa mətbuatının nüfuzlu mətbuat orqanları Martin Rayanın casusluq məqsədləri üçün istifadə edilməsini və buna görə məsuliyyət daşımalı olanları davamlı tənqid edir. Elə bu günlərdə Martin Rayanın valideynlərindən geniş məlumat almış erməniəsilli aktivist-jurnalist Leo Nikolianın müsahibəsi də bunun təsdiqidir. Fransa xarici kəşfiyyat qurumunun rəhbərinin qeyd olunan hadisələrlə əlaqədar işindən məlum kənarlaşdırılması faktı ilə yanaşı, müsahibədə Fransa xarici işlər nazirinin də istefası və istefadan əvvəl Martin Rayanla bağlı atdığı addım, diplomatik örtüklü kəşfiyyatçılar tərəfindən Martin Rayanın biznes şəbəkə fəaliyyətindən İran, Amerika və digər ölkələrə qarşı aktiv casusluq məqsədləri üçün istifadə olunduğuna ilkin eyhamlar vurulması və bir çox daha əvvəl məlum olmayan detallara toxunulub. Qeyd edək ki, son illər Martin Rayan qədər ikinci bir casus dünya mətbuatında bu qədər müzakirə predmeti olmamışdı. Leo Nikolia özü bu barədə qeyd edir: "Fransa xüsusi xidmət orqanları Martin Rayanı ziyarətə gəliblər. Onlar Fransa səfirliyinin iki diplomatı idi. Onların diplomatik pasportu var, bilməlisiniz ki, bütün səfirliklərin bir neçə əməkdaşı olur, onların bəziləri isə diplomatik pərdə altında casuslardır. ABŞ-ın Mərkəzi Kəşfiyyat İdarəsi, İsrailin MOSSAD-ı, Rusiyanın FTX-si, Fransanın DGSE-si var... DGSE-dən olan bu iki nəfər onu görməyə gedir, özlərini təqdim edir və ondan onlara işləyərək məlumat verməsini tələb edirlər. Martin imtina edir: "Mənə maraqlı deyil, mənim artıq işim var". Belə olan halda bu adamlar ona cavab verirlər: "Sənin seçimin yoxdur. Tez bir zamanda bir bədbəxt hadisə baş verə bilər, atanızı və ya ananızı düşünün. İntihar edənlər də olur..." Sonra onlar əlavə edirlər: "Biz sizin biznesinizi məhv edə bilərik, çünki Fransadan gələn mallarınızı gömrükdə bloklaya bilərik və sizi Bakıda didərginə çevirə bilərik". Martin ilk dəfə imtina edir. Amma təzyiq canavarın ovunun boynunu dişləməsi kimi daimi olur. Və sonda Martin könülsüz olaraq təslim olur... Məni qəzəbləndirən odur ki, bizim hökumət heç nə etmir. Ümid edirəm ki, yeni baş nazirimiz Qabriel Attal bu istiqamətdə hərəkət edəcək. Xarici işlər naziri Ketrin Kolonna getməzdən əvvəl sadəcə olaraq Azərbaycandan bu Fransa vətəndaşının azad edilməsini xahiş etdi, baxmayaraq ki, bu adamı öz nazirliyi və səfirliyi vasitəsilə tələyə salan da o idi! Bu vəziyyətə görə məsuliyyəti Fransa dövləti daşıyır. Fransa vətəndaşını qorxutduq, ailəsinə təzyiq etdik. Evlənmək üzrə idi və özünü burada tapmışdı. Mən onun dostları və vəkili ilə əlaqə saxlayıram. Bu, çox aktuallaşan bir məsələdir. Bütün KİV-lər bu haqda danışmağa başlayır və ümid edirəm ki, biz bununla daha çox maraqlanacağıq. Azərbaycanın Fransadakı səfiri Leyla Abdullayeva AFP-yə açıqlama verərək reaksiyasını bildirib. Bu, həqiqətən də incə məsələdir. O, nəyisə etməyə məcbur edilib, başına faktiki silah dayamışlar. O, bunu öz əqidəsi ilə etməyib"
Beləliklə, bütün bunlar Fransanın çirkin oyunlarının təzahürləridir. Azərbaycan və Türkiyə fransız casus şəbəkəsinə ciddi zərbə vurmağı bacarıb. Burada qeyd edək ki, Azərbaycan İkinci Qarabağ müharibəsi nəticəsində ərazilərini Ermənistanın işğalından azad etməsi ilə Fransanın ölkəmizə və Türkiyəyə qarşı siyasətinə yeni bir "çalar" əlavə etdi. Təbii ki, bu məsələdə Fransadakı güclü erməni lobbisinin də təsiri var. Emmanuel Makronun hazırda Azərbaycan-Türkiyə əlaqələrinə qarşı yürütdüyü siyasət Fransanın xarici siyasətində düşünülmüş bir türkofobiya strategiyası olaraq dəyərləndirilməlidir. Xarici siyasətində türk dünyasına qarşı düşmənçilik münasibəti nümayiş etdirən ölkələr arasında ilk sırada indi Fransa qərarlaşıb. Xüsusilə son dövrlərdə islamofob siyasət yürüdən Fransanın xarici siyasətində türkofobiya da açıq şəkildə görünməkdədir. Əgər əvvəlki illərdə Fransanın türk dünyası əleyhinə fərqli strategiyalar həyata keçirən hökumətləri bunu daha çox "diplomatik" çərçivədə nümayiş etdirirdilərsə, Makronun dövründə bu xətt diplomatiyadan uzaq və açıq düşmənçilik yanaşması kimi dəyərləndirilməkdədir. Bu fonda o da məlumdur ki, Rəsmi Paris Azərbaycanın dəfələrlə etdiyi çağırışlara məhəl qoymayaraq, Ermənistanda revanşist əhval-ruhiyyəni qızışdırmağa, bu ölkəyə hərbi dəstək verməyə və Azərbaycanla Ermənistan arasında sülh müqaviləsinin imzalanmasını əngəlləməyə çalışır. Məqsədinə nail olmaq üçün casus şəbəkəsindən yararlanır. Amma bu istiqamətdə də iflasa uğrayır.
Nahid SALAYEV
