Əli Mustafa: "Bu, Ermənistan hakimiyyətinin fitnəkarlığını göstərir"
Münhendə Azərbaycan və Ermənistan dövlət başçılarının görüşündən sonra sülh sazişi üçün müsbət imkanlar yaranıb. Ancaq bu, daha çox Ermənistanın siyasi iradəsindən asılı olan məsələdir. Yəni Ermənistan sülh prosesində nə dərəcədə ardıcıl olacaq.
Biz ümid edirik və inanırıq bu görüşdən sonra nəsə baş verəcək, amma təəssüf ki, hələ də Ermənistanda sülh üçün maneələr qalır. Ermənistanda sülhə zərbə vuracaq addımlar atılır. Fevralın 20-də Dağlıq Qarabağda separatizmin başlanğıcının növbəti ildönümü ilə bağlı mövcud olmayan "Arsax prezidenti" və "rəsmiləri" yenidən üzə çıxıb. Keçmiş qondarma separatçı rejimin müəyyən simvolikalarını yaşadırlar. Bununla bağlı tədbirlər keçirilir, separatçı qurumun "rəhbərləri" üçün hələ də fəaliyyət şəraiti yaradılır. Qarabağda erməni separatizminin başlanma ildönümünün müxtəlif səviyyələrdə keçirilməsinə dövlət səviyyəsində maneçilik törədilmir. Bütün bunlar Münhendə sülh üçün yaranan fürsətləri baltalayır. Hələ də Qarabağda separatizmin başlanması ildönümünün qeyd edilməsi, separatçılara rəhbərlik edənlərə meydan verilməsi və buna göz yumulması sülh sazişinin imzalanması yolunda ciddi maneə yaradır.
"Rəsmi İrəvan Azərbaycana qarşı ərazi iddiası ilə çıxış edən leqal qurumların fəaliyyətini məhdudlaşdırmalıdır"
Sözügedən məsələ ilə bağlı fikirlərini "Bakı-Xəbər"lə bölüşən Demokratik Dəyişim Partiyası Təşkilat Komitəsinin sədri Əli Mustafa hesab edir ki, Ermənistandan belə fitnəkarlıq gözlənilən idi: "Münhen Təhlükəsizlik Konfransında Azərbaycan və Ermənistan dövlət başçılarının görüşü həqiqətən münasibətlərin yenidən istiləşməsinə, qarşılıqlı etimad mühitinin yaranmasına bir əlverişli təkan oldu. Təbii ki, iki ölkə arasında sülh müqaviləsi konteksində. Bu baxımdan, əlbəttə, Ermənistan tərəfi də çalışmalıdır ki, münasibətlərin sahmana düşməsini qoruya bilsin. Burada, necə deyərlər, bir qədər sabitqədəm davransın və iki ölkə münasibətlərini yenidən zədələyən hərəkətlər reallaşmasın. Bir məsələni qeyd edək ki, Ermənistan Konstitusiyasında, habelə müstəqillik aktında Azərbaycana yönəlik ərazi iddialarının olması dövlətlərarası münasibətlərin normallaşmasına ciddi maneədir. İlk baxışdan Ermənistan hakimiyyəti bütün bunları anlayırmış kimi özünü göstərir. Qanunvericiliyində dəyişikliklər etməyi və və ərazi iddialarını aradan qaldırmağı düşünür. Yaxud da bu istiqamətdə hansısa təşəbbüslərlə çıxış edir. Ancaq bununla bağlı gərəkən addımlar tam atılmır, Qarabağ separatçılarına yönəlik məhdudlaşdırıcı tədbirlər görmür. Qarabağ separatçıları açıq pozucu fəaliyyət göstərir, rəsmi İrəvan bunun qarşısını almır. Bu da dolayısı ilə Azərbaycana yönəlik ərazi iddiasının elementi kimi ortaya çıxır. Ona görə də hesab edirəm ki, Ermənistan hakimiyyəti həqiqətən də sülh danışıqlarında, sülh müqaviləsinin imzalanmasında səmimidirsə, Qarabağ separatçılarının fəaliyyətini məhdudlaşdırmalıdır. Azərbaycana qarşı ərazi iddiası ilə çıxış edən leqal qurumların fəaliyyətini məhdudlaşdırmalıdır. Bir tərəfdən Azərbaycanla sülh istəyib, digər tərəfdən ölkəmizə qarşı ərazi iddiası irəli sürən, separatçıları himayə edən hakimiyyətə inanmaq olmaz. Bu, Ermənistan hakimiyyətinin fitnəkarlığını göstərir. Bir sözlə, rəsmi İrəvan seçim etməlidir. Ya Azərbaycanla sülhə getməlidir, ya da separatçıların yanında olduğunu açıq deməlidir. Ki, biz də öz işimizi bilək".
Vidadi ORDAHALLI
