Elşən Manafov: "Hər şey perspektivdə Qərbin Rusiyanın regionda gələcək təmsilçiliyi ilə bağlı məsələlərə konkret..."
Rusiya xarici işlər nazirinin müavini Mixail Qaluzin bildirib ki, Qarabağda sülhməramlıların məsələsi yalnız Azərbaycan tərəfi ilə müzakirə olunur:
"Tərəfdaşlarla dialoqumuz konstruktiv xarakter daşıyır. Biz yaranan bütün məsələləri qarşılıqlı razılaşma əsasında həll edirik. 2025-ci ilin noyabrından sonra Rusiya sülhməramlı kontingentinin səlahiyyətlərinin uzadılmasına gəlincə, bu, regiondakı vəziyyətdən, tələblərdən, Bakı ilə müvafiq razılaşmalardan asılı olacaq".
Məlum məsələdir ki, bütün bu deyilənləri Qərb də yaxından diqqətlə izləyir. O baxımdan maraqlıdır, Qərb ölkələrinin bu məsələyə münasibəti necə olacaq? Qərb ölkələri Rusiya sülhməramlılarının Azərbaycanda qalış müddətinin uzadılması ilə bağlı danışıqlarda hansı mövqeni tutur və Qaluzinin açıqlamasına hansı reaksiyalar olacaq?
"Bu konfiqurasiyanın formalaşmasında iştirak etmədiyindən, onun formalaşmasına imkan vermək istəmir"
Sözügedən məsələ ilə bağlı fikirlərini "Bakı-Xəbər"lə bölüşən politoloq Elşən Manafov buna bir neçə aspektdən yanaşdı: "Regionun təhlükəsizlik problemlərinin perspektiv həllinə dair Azərbaycanın mövqeyi Rusiya və diğər region dövlətlərinin mövqeyi ilə üst-üstə düşür. O cumlədən, Şuşa bəyannaməsi ilə hərbi əməkdaşlıq sahəsində münasibərlərimizi Qars müqaviləsinin məlum bəndlərinə nəzərən bugünkü formata gətirmiş Türkiyənin mövqeyi ilə üst-üstə düşür. Söhbət region dövlətlərinin birgə səyləri və əməkdaşlığı ilə bölgə ətrafına çəkiləcək yeni təhlükəsizlik kəmərindən gedir. Onun geosiyasi mahiyyət və məzmun daşıyacağı bəllidir. Regionun təhlükəsizlik problemlərinin həllində 3+2 formatında əməkdaşlığın bölgədə yaradacağı yeni geosiyasi konfiqurasiya Qərbi qane etmir. Qərb bu konfiqurasiyanın formalaşmasında iştirak etmədiyindən, onun formalaşmasına imkan vermək istəmir. Söhbət regionda nüfuz dairəsi uğrunda mübarizədən gedir. Rusiya xarici işlər nazirinin muavini Qaluzin də qeyd edib ki, Cənubi Qafqazın Rusiya üçün həyati əhəmiyyəti var. Əgər kimlərsə guman edirlər ki, Rusiya bu regiondan mübarizəsiz çəkiləcək yanılırlar. Bu, Rusiya diplomatının regionun geosiyasi konfiqurasiyasını pozmaq üçün cəhdlərini gizlətməyən bəlli dairələrə ismarıcı kimi qəbul olunmalıdır. Azərbaycanda Rusiya sülhməramlılarının statusuna isə, Qaluzinin qeyd etdiyi kimi, Kremlin rəsmi Bakı ilə konstruktiv zəmində əməkdaşlığı aydınlıq gətirəcək. Regionun təhlükəsizlik problemlərinin həllinə münasibətdə ortaq baxışlar Rusiya sülhməramlılarının gələcək müqəddəratı ilə bağlı problemlərin həllində müstəsna əhəmiyyət kəsb edəcək. Hər şey perspektivdə Qərbin Rusiyanın regionda gələcək təmsilçiliyi ilə bağlı məsələlərə konkret hüquqi sənədlər vasitəsilə verə biləcəyi təminatlardan asılı olaraq həllini tapacaq. Qərbin regionu Ermənistan vasitəsilə özünün təhlükəsizlik sisteminə inteqrasiya cəhdləri Rusiya tərəfindən adekvat addımların atılmasına səbəb olacaq. Azərbaycan özünün çoxvektorlu xarici siyasəti ilə müasir dövrün qlobal təhlükəsizliklə bağlı çağırışlarına öz milli təhlükəsizlik maraqları baxımından indiyədək ugurla cavab verib. Qarabag ugrunda mübarizəmizdə qələbəmizin bir mühüm səbəbi də məhz bu olub. Bu mənada, Azərbaycanın Rusiya hərbi kontingentinin perspektiv statusu ilə bağlı məsələyə mövqeyi regionu təhdid edə biləcək geosiyasi faktorlardan asılı olacaq".
Vidadi ORDAHALLI
