Abutalıb Səmədov: "...Siz İlham Əliyevin hansı uğurlara nail olduğunu və xalqın onun ətrafında necə birləşdiyini anlamaqda çətinlik çəkirsinizsə sizdən seçki müşahidəçisi olmaz"
Azərbaycanda keçirilən prezident seçkilərinə beynəlxalq səviyyədə yüksək qiymət verilsə də, ermənipərəstlikdən əl çəkə bilməyən ATƏT-in Demokratik Təsisatlar və İnsan Haqları Bürosunun (ATƏT/DTİHB) missiyası özündən növbəti nağıllar uydurub seçkiyə kölgə salmağa cəhd göstərdi.
Təşkilatın antiazərbaycan mövqeyi beynəlxalq səviyyədə narazılığa səbəb olub.
Məsələn, Rusiya Xarici İşlər Nazirliyinin (XİN) rəsmi nümayəndəsi Mariya Zaxarova Federasiya Şurasının dövlət suverenliyinin qorunması və Rusiyanın daxili işlərinə müdaxilənin qarşısının alınması üzrə komissiyasının iclasında ATƏT-in məlum institutunun rəyini tənqid edib: "ATƏT-in Demokratik Təsisatlar və İnsan Haqları Bürosunun (ATƏT/DTİHB) missiyasının seçkiləri müşahidə etmək barədə heç bir anlayışı yoxdur".
M.Zaxarova ATƏT/DTİHB missiyasının Azərbaycanda keçirilən növbədənkənar prezident seçkilərinin nəticələrinə dair hesabatını "şedevr" adlandırıb və onu şərh etməmək üçün özünü zorla saxladığını bildirib.
Onun sözlərinə görə, seçki keçirən ölkələr müxtəlif partiyalardan nə qədər namizəd qeydə alsalar da, hansı platformalara malik olsalar da, bunun ATƏT müşahidəçiləri üçün heç bir əhəmiyyəti olmayacaq:"Yəni onların bununla bağlı qərarları siyasi qərəz və əvvəlcədən müəyyən edilmiş nəticə olacaq. ATƏT/DTİHB-ə bir sualım var. Onlar hətta dövlət üçün kritik bir anda cəmiyyətin konsolidasiya konsepsiyası haqqında nəsə eşidiblərmi? Məncə, heç nə eşitməyiblər. Əgər belədirsə, deməli, seçkiləri necə müşahidə etmək barədə heç bir anlayışları yoxdur".
"...Qərb müşahidəçiləri axıra qədər dərk etmirlər ki..."
Bu məsələyə şərh verən "Alyans" Strateji Araşdırmalar Mərkəzinin sədri, siyasi ekspert Abutalıb Səmədov baki-xeber.com-a "ATƏT-in Demokratik Təsisatlar və İnsan Haqları Bürosunun missiyasının bundan əvvəlki hesabatları ilə də tanışıq. Çox halda əvvəlcədən demək olur ki, onlar yekun arayışlarında nə yazacaqlar. Hətta əvvəlcədən də arayışı yazıb hazırlayırlar. Daha çox müxalifətin iddialarını öz arayışlarına salırlar və müəyyən əlavələrlə çalışırlar ki, seçkilərin "antidemokratik" keçirilməsi haqqında rəy yaratsınlar. Ancaq çox qəribədir ki, Azərbaycandakı seçkilərin tənqid edən ATƏT-in missiyasının hesabatını kifayət qədər kəskin hesab etməyənlər də var. Düşünürlər ki, ATƏT daha kəskin hesabat təqdim etməli idi.
Zaxarovanın dediklərinə gəldikdə isə, o bir məsələyə diqqət çəkmək istəyib. Azərbaycan 35 il əziyyət çəkdiyi problemi heç kimin ağlına gətirməyəcəyi bir nəticə ilə aradan qaldırdı. Azərbaycan tarixinin ən böyük qələbəsini qazandı. Bu qələbəni Azərbaycana gətirən Prezident İlham Əliyev sekilərin qalibi oldu. Orda başqa bir nəticəni gözləməyin özü ağılsızlıq olardı. Çünki Azərbaycan xalqının ən böyük problemi Qarabağda erməni separatzimi, Azərbaycan torpaqlarının işğal altında olması, Azərbaycanın suverenliyinin və ərazi bütövlüyünün təmin olunmaması idi. Bunların hamısını Prezident İlham Əliyev həll etdi" –deyə bildirdi.
A.Səmədovun sözlərinə görə, təbiidir ki, vətəndaşlar da onun ətrafında birləşdi. A.Səmədovun fokrincə. seçkilərin nəticələrinə müəyyən şübhə ilə yanaşanlar bunu anlamırlar ki, Azərbaycan xalqı öz Prezidentinin, öz Ali Baş Komandanının ətrafında birləşib, hamı onun gördüyü böyük işi yüksək qiymətləndirir: "Hətta ən kəskin müxalifət mövqeyində olanlar da etiraf edirlər ki, İlham Əliyevin əldə etdiyi nəticə ağlagəlməzdir və tariximizin ən şərəfli səhifəsi kimi qalacaq. Azərbaycan xalqının 35 il ərazində üzləşdiyi son dərəcə dəhşətli bir problemi aradan qaldırdı. Xalq da buna dəyər verir. Ancaq müşahidəçilər ola bilsin ki, bunu anlamırlar. Zaxarova da buna diqqət çəkir, bunlara çatdırmaq istəyir ki, siz İlham Əliyevin hansı uğurlara nail olduğunu və xalqın onun ətrafında necə birləşdiyini anlamaqda çətinlik çəkirsinizsə sizdən seçki müşahidəçisi olmaz. Siz əvvəlcə bu məsələləri dərk etməlisiniz ki, Azərbaycan hansı problemləri həll edə bildi, burada həlledici rol Prezident İlham Əliyevə məxsusdur. Kimsə düşünürsə ki, İlham Əliyevə qarşı prezident seçkilərində ciddi rəqabət göstərə biləcək adam ola bilər, o bu məsələlərdən heç nə anlamır. İlham Əliyev Azərbaycan tarixinin 35 il davam edən faciəli və ağır dövrünə son qoydu. Prezident seçkiləri də bu dövrün yekununu rəsmiləşdirdi. Artıq yeni bir dövr başlayır. Bu inqilabi dəyişikliklər, islahatlar, islahatların daha da dərinləşdirilməsi, yeni şəxslərin, yeni simaların Azərbaycan hökumətində təmsil olunması dövrüdür. Bu dövrdə də Azərbaycana İlham Əliyevin rəhbərliyindən təbii heç nə olmaz. Bu məsələni ola bilsin ki, Qərb müşahidəçiləri axıra qədər dərk etmirlər. Zaxarova da ömründə bircə dəfə düzgün söz danışdı və Azərbaycan xalqının Prezident İlham Əliyev ətrafında sıx birləşdiyini onların nəzərinə çatdırmaq istədi".
İradə SARIYEVA
