Fevralın 7-də Azərbaycanda keçirilən növbədənkənar prezident seçkisi beynəlxalq medianın diqqət mərkəzində qalmaqda davam edir.
Müxtəlif media orqanlarında Azərbaycanın son illərdə yürütdüyü siyasət, dövlət başçısının ölkənin ərazi bütövlüyünün bərpası istiqamətində fəaliyyətinin əhalinin seçkidə aydın qərar verməsinə və prezident İlham Əliyevin 92,05 faiz səslə qalib gəlməsinə aparıb çıxardığı vurğulanıb. Səsvermənin nəticələri elan olunduqdan sonra paytaxt Bakıda və regionlarda insanların böyük coşqu və sevinclə bayram etməsi, səsvermədən öncəki sorğuların seçkinin nəticələri ilə üst-üstə düşdüyü diqqətə çatdırılıb.
Bunlar fonunda qardaş Türkiyənin "Anadolu" agentliyi prezident İlham Əliyevin qələbəsinin xalqın liderinə verdiyi növbəti yüksək qiymət kimi qiymətləndirib: "Azərbaycanda keçirilən səsvermənin ilkin nəticələrinə görə, İlham Əliyev 92,05 faiz səslə qalib gəlib. Son 21 ildə İlham Əliyev beşinci dəfə seçki zəfəri yaşayıb. 2003-cü ildə keçirilən seçkilərdə qalib gələrək ilk dəfə prezident seçilən İlham Əliyev 21 illik hakimiyyətindən sonra "qalib xalqın qalib lideri" şüarı ilə iştirak etdiyi sonuncu seçkilərdə inamlı qələbə qazanıb. Heydər Əliyev siyasətini davam etdirən İlham Əliyev atasının vəsiyyətini yerinə yetirərək işğal altındakı Qarabağı və ətraf əraziləri erməni işğalından azad etməklə liderliyini zəfərlə taclandırıb". Yazıda son illər Azərbaycan ilə Türkiyə arasında inkişaf edən münasibətlərə də geniş yer verilib. Rusiyanın "lenta.ru" portal isə yazır ki, Azərbaycanda 7 namizədin iştirak etdiyi növbədənkənar prezident seçkiləri əvvəlkilərdən fərqlənib: "Qarabağın azad edilməsindən sonra ilk dəfə olaraq prezident seçkiləri ölkənin bütün ərazisini əhatə edib, 125 seçki dairəsi üzrə 6537 seçki məntəqəsində 6,5 milyondan çox seçici iştirak edib. Beynəlxalq ekspertlərin fikrincə, Azərbaycan cəmiyyətini çox narahat edən Qarabağ probleminin həllindən sonra İlham Əliyevin populyarlığı xeyli artıb. Bunu nəşrimizin müxbirinin seçkilərə bir neçə gün qalmış Bakı küçələrində keçirdiyi sorğular da təsdiqləyib. Yerli sakin Sahib Məmmədov "Lenta.ru"ya açıqlamasında qalan altı namizədin zəif olduğunu deyib: "O, çox balanslaşdırılmış daxili və xarici siyasət yürüdür. Onun Türkiyə prezidenti Rəcəb Tayyib Ərdoğan və Rusiya dövlət başçısı Vladimir Putinlə çox yaxşı dostluq münasibətləri var. Onun sözlərinə görə, bu məsələdə 1987-ci ildən azərbaycanlıların probleminə çevrilən Qarabağı azad etməsi mühüm rol oynayıb: "Dünyada hər hansı prezidentin öz torpaqlarını azad etməsi ilə bağlı başqa nümunə yoxdur. Bunu heç kim edə bilməz, amma bizim prezidentimiz, Ali Baş Komandanımız bunu edə bilib". Portal daha sonra yazır ki, bir qrup rusiyalı jurnalist azad edilmiş ərazilərdə üç seçki məntəqəsinə baş çəkib və heç birində qanun pozuntusu qeydə almayıblar: "Bütün seçicilər bir nəfər kimi İlham Əliyevi açıq şəkildə dəstəkləyərək doğma torpaqlarına qayıtmaq imkanına, yeni evlərə görə ona təşəkkürlərini bildiriblər". Digər Rusiya nəşri "gazeta.ru" yazır ki, hazırkı prezident İlham Əliyev inamlı qələbə qazanaraq digər namizədləri xeyli geridə qoydu: "MDB-nin baş katibi Sergey Lebedev bundan əvvəl bildirib ki, seçicilərin çoxluğu respublika sakinlərinin seçkiyə yüksək marağından xəbər verir. O, həmçinin, bunu Azərbaycan vətəndaşlarının sülhün, sabitliyin və əmin-amanlığın qorunması üçün əlindən gələni etməyə hazır olmasının nümayişi hesab edib. Rusiya prezidenti Vladimir Putin artıq İlham Əliyevə zəng edərək onu növbədənkənar prezident seçkisində inamlı qələbəsi münasibətilə ürəkdən təbrik edib və ona belə yüksək dövlət vəzifəsində fəaliyyətində yeni uğurlar arzulayıb".
Rusiyanın "İzvestiya" nəşri isə yazır ki, Azərbaycanda prezident seçkilərinin əsas özəlliyi səsvermənin Qarabağda ilk dəfə baş tutması idi: "Seçki günü Rusiya nümayəndə heyəti Qarabağa yollanıb. Azərbaycanın hər bir kəndinin girişində şəhidlərin – 2020-ci il müharibəsi zamanı həlak olan hərbi qulluqçuların fotoşəkilləri olan stendlər var. Kənd qəbiristanlıqlarında ayrıca xiyabanlar var, orada qəbirlər xüsusi dam örtükləri altındadır, məkan dövlət bayraqları ilə bəzədilib. Qarabağa daxil olarkən təhlükəsizlik qüvvələri pasportları yoxlayır, sonra ayrı-ayrı rayonların sərhədlərində nəzarət-buraxılış məntəqələri var. Regionda yolların kənarında minalanmış ərazilərin olduğuna dair xəbərdarlıq lövhələri var. Məlumdur ki, 2020-ci il müharibəsindən sonra 350 nəfər partlayıcı qurğuların qurbanı olub. Yol kənarlarında dağılmış və tərk edilmiş evlər görünür. Eyni zamanda minalardan təmizlənmiş ərazilərdə tikinti texnikası işləyir, yeni yollar, körpülər tikilir. İlk dayanacağımız Laçın rayonunun Zabux kəndidir. Burada seçki məntəqəsi məktəb binasında yerləşir, yerli sakinlər girişdə sıxlıq yaradıblar. Onlardan biri jurnalistlərlə danışmağa razılaşır. "Bu gün tarixi gündür! 1992-ci ildə, 30 yaşım olanda buradan ayrılmışdım. Keçən ilin payızında qayıtdım. Dövlət bizə pulsuz şəkildə evlər tikib verib, işıq, qaz, rabitə xətləri çəkilib. Ölkə rəhbərliyinə yalnız təşəkkür edə bilərəm", - Şakir adlı sakin deyir. Ardından Laçın şəhərinə gedirik, burada da seçki məntəqəsinin ətrafında ajiotaj var. Kütlə arasında tələbələr də var. Onlardan biri "İzvestiya"ya bildirib ki, hazırda iki şəhərdə - Bakı və Laçında yaşayır. "Paytaxtda Dövlət Bədən Tərbiyəsi İnstitutunda oxuyuram. Amma ali məktəbi bitirdikdən sonra tamamilə Qarabağa köçməyi planlaşdırıram və məktəb müəllimi kimi işə düzəlmək istəyirəm", - o deyib. Maraqlıdır ki, həmsöhbətimiz rus dilində də yaxşı danışır". "Rossiyskaya qazeta" isə yazır ki, Azərbaycanda prezident seçkiləri başa çatıb. Heç bir sürpriz olmayıb: qalib rekord seçici fəallığının qeydə alındığı növbədənkənar prezident seçkilərində 92 faizdən çox səs toplayan hazırkı dövlət başçısı İlham Əliyev olub. Bildirilib ki, Azərbaycan cəmiyyətində misli görünməmiş konsensus hökm sürür: "İnsanlar əmindirlər ki, indi ölkə iqtisadiyyatın inkişafı, eləcə də dost ölkələrlə əlaqələrin möhkəmləndirilməsi ilə daha da intensiv məşğul olmalıdır". Qeyd edilib ki, fevralın 7-də keçirilən prezident seçkilərdə maraqlı yeniliklər də var idi: "Məsələn, qeyri-qanuni təkrar səsvermə ehtimalını aradan qaldırmaq üçün seçki məntəqələrinin girişində hər bir seçicinin baş barmağı skan edilərək onun biometrik məlumatları xüsusi məlumat bazasına daxil edilib. Buna görə də hər hansı seçki məntəqəsinə yenidən daxil olub ikinci dəfə səs vermək mümkün deyildi".
Nahid SALAYEV
