"Bu, Azərbaycan Respublikasının bütün beynəlxalq səviyyədə tanınmış ərazisində keçirilən ilk seçki idi". Bu fikirlər fevralın 8-də ATƏT-in Demokratik Təsisatlar və İnsan Hüquqları Bürosunun (DTİHB) Seçki Müşahidə Missiyasının (SMM) Azərbaycanda keçirilən növbədənkənar prezident seçkisi ilə bağlı ilkin müşahidələrinə həsr edilən mətbuat konfransında açıqlanıb.
Məlumatı Azadlıq Radiosu yayıb.
Aydın Quliyev: "ATƏT müşahidəçiləri 7 Fevral seçkilərinin Azərbaycanın beynəlxalq birlik tərəfindən tanınmış bütün ərazilərərində keçirilən ilk seçki olduğunu xüsusi vurğuladılar"
"Bakı-Xəbər" Media Qrupunun rəhbəri, politoloq Aydın Quliyev öz Facebook səhifəsində bu barədə fikirlərini bölüşüb:"Məlum olduğu kimi, fevralın 7-də Azərbaycanda olduqca yüksək seçici fəallığı şəraitində baş tutan növbədənkənar prezident seçkiləri uğurla başa çatdı. Bu seçkilər ilk dəfə olaraq Azərbaycanın bütün bölgələrini əhatə etməklə tarixə keçdisə də, eyni zamanda beynəlxalq müşahidçilərin də yüksək dəyərləndirməsi ilə yadda qaldı. ATƏT müşahidəçiləri 7 Fevral seçkilərinin Azərbaycanın beynəlxalq birlik tərəfindən tanınmış bütün ərazilərərində keçirilən ilk seçki olduğunu xüsusi vurğuladılar".
ATƏT müşahidəçiləri mətbuat konfransında bu seçkinin Azərbaycanın beynəlxalq səviyyədə tanınan ərazilərində keçirilən ilk seçki olduğunu bəyan etdilər. Təbii ki, qurum bununla Azərbaycanın ərazi bütövlüyünü tanıdığını etiraf və qəbul etdiyini de-fakto açıqladı.
Mehman İsmayılov: "ATƏT-in Azərbaycanın ərazi bütövlüyünü və bütün ərazilərində suveren hüquq və haqlarını de-fakto tanımaqdan başqa yolu qalmayıb"
Politoloq Mehman İsmayılov "Bakı-Xəbər"ə şərhində "ATƏT hüquqi cəhətdən Azərbaycanın ərazi bütövlüyünü onsuz da tanımışdı. Ancaq ATƏT-dən başqa da beynəlxalq institutlar Azərbaycanın ərazi bütövlüyünü de-yure tanımışdılar. Amma faktiki olaraq torpağın üstündə onlar Azərbaycanın ərazi bütövlüyünü hər zaman şübhə alıtına alan siyasət aparırdılar. ATƏT-in fəaliyyətdə olan sədrinin nümayəndəsi, ATƏT-in Minsk qrupunun həmsədrlik institutu daima Azərbaycanın işğal edilmiş ərazilərinin ilhaqa çevrilməsi, bu işğalın qanunləşdirilməsi üçün addımlar atırdılar. 28 il aparılan danışıqlar heç bir nəticə vermədi, Azərbaycan güc tətbiq etmək yolu ilə öz torpaqlarını azad edib ərazi bütövlüyünü təmin edəndən və özünün suveren hüquqlarını bütün ölkə ərazisində bərqərar edəndən sonra ATƏT Azərbaycanın ərazi bütövlüyünü de-fakto tanımaq zorundadır. Ona görə də ATƏT-in müşahidəçiləri bu fikri səsləndiriblər ki, ilk dəfə Azərbaycanın bütün ərazilərində seçkilər keçirilib. 7 Fevral seçkiləri Azərbaycanın tarixinə qızıl hərflərlə yazılacaq bir tədbir idi. ATƏT-in Demokratik Təsisatlar və İnsan Hüquqları Bürosunun müşahidəçilərinin Azərbaycanda keçirilmiş seçkilər barədə fikirləri isə öncədən planlaşdırılmış "sən nə edirsən et mən səndə qüsur tapacağam" yanaşmasının təzahürüdür. Azərbaycanda seçkilər azad, demokratik, şəffaf, alternativ namizədlər olduğu şəraitdə keçirilib. Amma fakt odur ki, Azərbaycanda bu gün müzəffər Ali Baş Komandan İlham Əliyevin nə rəqibi yoxdur, nə alternativi yoxdur, nə xalq xalq İlham Əliyevdən başqa heç kəsin üzərində vurğu vurmazdı. Azərbaycan xalqı müdrik xalqdır. Azərbaycan xalqı tarixə öz möhürünü basdı Müzəffər Ali Baş Komandanı yenidən hakimiyyətin ən yüksək zirvəsində görmək istədi"-deyə bildirdi.
M.İsmayılov bildirdi ki, bu, Azərbaycan xalqının qərarıdır, xalqın səsi Allahın səsidir, heç kəs Azərbaycan xalqına necə seçim etməyi öyrədə və göstərə bilməz. Azərbaycan xalqının 5 min illik dövlətçilik tarixi olduğunu deyən M.İsmayılov vurğuladı ki, Azərbaycan xalqı öz müdrik seçimini etdi. "ATƏT-in bizdə qüsurlar axtarmaq həvəsi hər zaman olub. Ümumiyyətlə, avropalı siyasətçiləri, Qərb siyasətçiləri yenicə azadlığını əldə etmiş Azərbaycan kimi dövlətləri öz mexanizmləri, rıçaqları ilə sıxmaq, daima onlarda qüsur axtarmaq, onlara göstəriş vermək kimi bir havaya girirlər. Azərbaycan AŞPA nümayəndələrini seçkini izləməyə dəvət etməməkdə çox doğru addım atdı. Xatırlayırsınızsa, 23 aprel 2023-cü ildə Azərbaycan Laçın rayonu ərazisində dövlət sərhədində sərhəd keçid məntəqəsi yerləşdirəndən sonra AŞPA-nın dalbadal iki antiazərbaycan bəyanatı oldu. Bundan sonra AŞPA-nın nümayəndələrinin Azərbaycana qarşı münaisbətlərini bu yaxınlarda gördük ki, AŞPA necə neqativ, necə planlaşdırılmış, necə bir antiazərbaycan havasına köklənmiş bir təşkilata çevrilib. Ona görə Azərbaycan haqlı olaraq AŞPA nümayəndələrini seçkini izləməyə dəvət etmədi. ATƏT-in isə Azərbaycanda keçirilən seçkilərə mikroskop altında baxmasının səbəbləri bizə aydındır. Amma indi Azərbaycanın torpaq bütünlüyünün ATƏT tərəfindən de-fakto tanınması o deməkdir ki, ATƏT-in 28 il müddətində həll etmək istəmədiyi problemi Azərbaycan dövləti, onun Ali Baş Komandanı və Müzəffər Ordusu həll etdi. ATƏT-in Azərbaycanın ərazi bütövlüyünü və bütün ərazilərində suveren hüquq və haqlarını de-fakto tanımaqdan başqa yolu qalmayıb. Bu səbəbdən müşahidəçilər bu fikirləri bildirdilər. Açıqlamanın qüsur axtarmaq hissəsinə gəlincə, orada bizdə nəyə görə "qüsur" axtarılmasının səbəbləri aydındır"-deyə M.İsmaylov vurğuladı.
İradə SARIYEVA
