Turab Rzayev: "Onun mövqeyini Qərbdən gələn təmayül kimi də izah edə bilmərik"
Gürcüstan həbsxanasında cəza çəkən Gürcüstanın sabiq prezidenti Mixeil Saakaşvili 7 fevralda keçirilən növbədənkənar prezident seçkilərində qələbəsi münasibətilə Azərbaycan Prezidenti İlham Əliyevə təbrik məktubu göndərib.
O, bu barədə sosial şəbəkə hesabında yazıb: "İlham Əliyevi qələbə münasibətilə təbrik edirəm. Heç kim Azərbaycan üçün Prezident İlham Əliyev qədər iş görməyib.
O, qalib İlham kimi tarixə düşəcək, onun prezidentlik illəri isə Azərbaycan tarixində qızıl dövr kimi qalacaq".
Hər halda, türmədən yazılan məktubda diplomatik davranış əlamətlərindən daha çox, səmimiyyət notları hiss edilir. Saakaşvili demokrat və Qərbin adamı kimi tanınır. Hazırda Qərbin Azərbaycana etdiyi təzyiqlər fonunda Saakaşvilinin bu mövqeyindən hansı qənaətləri çıxara bilərik?
Siyasi şərhçi Turab Rzayev "Bakı-Xəbər"ə açıqlamasında bildirdi ki, bu, Saakaşvilinin Azərbaycan dövlətinə və onun Prezidentinə qarşı müsbət notlarla yüklənmiş ilk mesajı deyil. Bundan əvvəl də biz Saakaşvilinin müsbət mesajlar verdiyinin şahidi olmuşuq. Həm Azərbaycan dövlətinin regionun gələcəyində oynaya biləcəyi rolla bağlı, həm də türk dünyasının gələcəyi və Gürcüstanın da bu məsələdəki rolu haqda müsbət çıxışları olub. O, hətta gənclərə türk dilini öyrənməyi tövsiyə edib. Bizim Gürcüstana yardımlarımız, hətta Rusiya ilə həmin ölkənin müharibəsi zamanı onlara etdiyimiz kömək göz önündə olub. Saakaşvilinin bu haqda da açıqlamaları var. Hiss olunur ki, burada səmimi bir münasibət var. O bilir ki, Azərbaycan dövləti Gürcüstana təzyiq edib, Saakaşvilini azad etdirmək gücündə deyil. Ona görə də, bu məqamla bağlı bizdən incik ola bilməz. Biz görürük ki, Qərbin böyük dövlətləri bu məsələyə aktiv müdaxilə edir, ancaq ortada heç bir nəticə yoxdur. Yaranmış vəziyyətlə bağlı Saakaşvili həm Azərbaycan hakimiyyəti ilə bağlı səmimi fikirlərini ifadə edib, həm də bir dövlət başçısı kimi regionda baş verən hadisələrlə bağlı mövqeyini ifadə edib. Saakaşvili özünü siyasətin içində görür. Özünü Gürcüstan hakimiyyətinə qarşı mübarizənin lideri sayır. Buna görə də, baş verən hadisələri dəyərləndirmək həm də onun borcudur. Saakaşviki heç də Qərbin bütün dairələrinə yaxın şəxs deyil. Məsələn, Saakaşvili hakimiyyətinin süqutunda sırf Obama hakimiyyətinin rolu oldu. Bu səbəbdən, onun mövqeyini Qərbdən gələn təmayül kimi də izah edə bilmərik. Bunu onun tam şəxsi mövqeyi saymaq olar. Bu o anlama gəlmir ki, onu Qərbdə dəstəkləyənlər bundan sonra Azərbaycana fərqli mövqe sərgiləyəcəklər. İstənilən halda, bunu obyektiv hal kimi qəbul edə bilərik".
Məhəmmədəli QƏRİBLİ
