Sahil Kərimli: "Onlara ən layiqli və sərt cavabı növbələrə düzülərək öz qalib liderinə səs verən Azərbaycan xalqı verdi"
7 fevral növbədənkənar prezident seçkiləri ölkəmiz müstəqilliyini bərpa etdikdən sonra bütöv və suveren Azərbaycanda ilk dəfə baş tutub. Azərbaycan ictimaiyyətinin Zəfər seçkisi adı verdiyi bu prosesə Azərbaycan müşahidəçiləri ilə yanaşı xarici müşahidəçilər, media mənsubları da ciddi maraq göstərdilər.
Müşahidəçilərin ümumi rəyi budur ki, seçkilər azad və demokratik şəraitdə keçib. Ancaq təəssüflər olsun ki, bəzi Qərb müşahidıçiləri və onların daxildəki şəbəkəsi seçkilərlə bağlı "qara piar" kampaniyası aparır.
Qərbin bəlli dairələrinin, təşkilatlarının iküzlülüyü, riyakarlığı, Azərbaycana qarşı qərəzli münasibəti yeni hadisə deyil. İllərdir, istər Qarabağ, istərsə də insan haqları, demokratiya və s. məsələlərdə Qərbin Azərbaycana yanaşması ifrat ikilii standartlar çərçivəsindən zərrə qədər olsun kənara çıxmayıb. Edilən etirazlara rəğmən, Qərbin daşlaşmış riyakar simasında hər hansı dəyişiklik baş verməyib.
Əksinə, görünən odur ki, Azərbaycanı qaralamaq, ləkələmək kampaniyası son illər daha geniş vüsət alıb. Bu isə səbəbsiz deyil. Qarabağın işğaldan azad olunması və Azərbaycanın güclənməsi erməni ağzı ilə danışan Qərb təşkilatlarını ölkəmizə qarşı daha da aqressivləşdirib. Bu yaxınlarda Azərbaycan nümayəndə heyətinə qarşı AŞPA-da qəbul olunan qərar bunun daha bir bariz nümunəsi idi. Bütövlükdə Qərbin əsas hədəfi Azərbaycanda keçirilən növbədənkənar prezident seçkilərini bütün mümkün vasitələrlə gözdən salmaq, demokratiya pərdəsinə bürünərək ölkəmizə təzyiqlər etməkdir. Onların seçkini qaralamaq cəhdləri baş tutacaqmı?
Siyasi şərhçi Sahil Kərimli "Bakı-Xəbər"ə açıqlamasında bildirdi ki, Qərb və bəzi Avropa dairələri, Azərbaycana qarşı qərəzli mövqedən çıxış edən bir sıra beynəlxalq qurumların seçkilərə qara yaxacağı əvvəldən bəlli idi: "Çünki həmin qüvvələr yaxşı bilirdilər ki, Azərbaycan xalqı seçki günü kütləvi şəkildə məntəqələrə axışacaq və birmənalı olaraq İlham Əliyevə səs verəcək. Ona görə də bu qurumlar ölkəmizə qarşı düşmənçilik mövqelərini daha da sərtləşdirdilər və bu gün biz eyni siyasəti izləyirik. Qərbi və Avropanı daim narahat edən Azərbaycan liderinin müstəqil, milli maraqlara əsaslanan siyasət yütüməsi olub. Digər tərəfdən Qarabağ Zəfəri, ərazi bütövlüyümüzün tam bərpası həmin qüvvələrin ciddi qısqanclığı ilə qarşılanıb. ABŞ-dakı bəzi rəsmi dairələr, Avropanın bəzi ölkələri və siyasi təşkilatları Zəfərimizi, müstəqil siyasətimizi və xalqın indiyədək görünməmiş faizlə Prezident İlham Əliyevə etimad göstərməsini həzm edə bilmirlər. Ona görə də bu cür cəfəng, qərəzli və ədalətsiz mövqe sərgiləyirlər. Azərbaycan dövləti daim bu təhdidlərin və təzyiqlərin qarşısında qətiyyətli mövqe nümayiış etdirib və tam əminliklə demək olar ki, bundan sonra da belə olacaq. Hər ötən gün güclənən və dünya çapında özünə layiqli yer tutan Azərbaycan bundan sonra da milli maraqlara söykənən siayasətindən bir addım belə geri çəkilməyəcək. Həmin dairələr bunu yaxşı anlasınlar. Onlara ən layiqli və sərt cavabı növbələrə düzülərək öz qalib liderinə səs verən Azərbaycan xalqı verdi".
Məhəmmədəli QƏRİBLİ
