Faiq Ələkbərli: "İlham Əliyevin qələbəsinin Güney Azərbaycanda da geniş şəkildə alqışlanması, xoş hisslərin ifadə edilməsi təbii haldır"
İlham Əliyevin növbəti dəfə Azərbaycan Prezidenti seçilməsi Cənubi Azərbaycanda da böyük ruh yüksəkliyi ilə qarşılanıb. Belə ki, Təbriz küçələri Prezident İlham Əliyevin şəkilləri ilə bəzədilib. Bu barədə Azad İran Telegram kanalı məlumat yayıb. "Güney Azərbaycanda milli fəallar Prezident İlham Əliyevin qələbəsini qeyd ediblər.
Bu gün (8 fevral) Təbriz şəhərində milli fəallar Azərbaycan Prezidenti İlham Əliyevin seçkilərdə qələbəsini qeyd edib və şəhərin bir çox yerlərinə vərəqələr yapışdırıblar"-deyə telegram kanalı qeyd edib.
Güneylilər seçkilərdə qalib gəldiyi üçün İlham Əliyevi şəkillərini Təbriz küçələrinə vurmaqla təbrik ediblər.
Bundan başqa, Güney Azərbaycan təşkilatları da İlham Əliyevi seçkidə qələbə qazanması münasibətilə təbrik ediblər.
"İlham Əliyev təkcə Azərbaycan Respublikasının vətəndaşlarının deyil, 55 milyonluq Azərbaycan xalqının prezidenti olduğunu dəfələrlə sübut edib"
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini Faiq Ələkbərli "Bakı-Xəbər"ə "Azərbaycan Respublikasında keçirilən prezident seçkilərinin Güney Azərbaycanda da əks-səda doğurmasına təbii baxmaq lazımdır. Azərbaycanlılar 10-11 milyondan ibarət deyil, dünyada 50-55 milyon azərbaycanlı yaşayır. Yəni söhbət 50-55 milyonluq xalqdan gedir və onun da böyük bir qismi Güney Azərbaycanda və digər bölgələrdə yaşayır. Bu baxımdan prezident seçkilərinin və onun nəticələrinin Azərbaycanın Güneyində də rezonans doğurması və bunun nəticəsi olaraq soydaşlarımızın öz münasibətlərini, mövqelərini, sevinclərini müxtəlif şəkillərdə ifadə etməsinə normal yanaşmaq lazımdır. Xüsusən də prezident seçkilərindən qalib çıxan İlham Əliyevin fotoları ilə Güney Azərbaycanın müxtəlif şəhərlərinin, o cümlədən də Təbrizin bəzədilməsi təbii haldır. Biz bilirik ki, bütün azərbaycanlılar İlham Əliyevə öz prezidentləri kimi baxırlar. Onlar üçün Azərbaycan Respublikasının Prezidenti elə Güney Azərbaycanın da Prezidentidir. İlham Əliyev bütün Azərbaycan xalqının prezidentidir. Bu da təbiidir. Çünki bakılı, təbrizli, urumlu, ərdəbilli, gəncəli, şəkili və sair bir xalqın övladıdır. İlham Əliyevin qələbəsinin Güney Azərbaycanda da geniş şəkildə alqışlanması, xoş hisslərin ifadə edilməsi təbii haldır"-deyə bildirdi.
F.Ələkbərli qeyd etdi ki, Azərbaycan keçən 30-34 il ərzində bütövləşməyə doğru gedir. O bildirdi ki, xüsusən də İkinci Qarabağ müharibəsində qazandığımız qələbə və lokal antiterror tədbirləri nəticəsində Qarabağın tamamilə işğaldan azad edilməsi bütövlüyümüzü, birliyimizi daha da gücləndirib. "Sözün həqiqi mənasında Azərbaycan Respublikasının yenidən seçilən Prezidenti İlham Əliyevə dünya azərbaycanlıların da öz Prezidentləri kimi baxmaları bizim üçün böyük bir uğurdur.
Güney azərbyacanlılar həmişə Azərbaycan dövlətinə öz dövlətləri, İlham Əliyevə isə öz Prezidentləri kimi baxdıqlarını əvvəllər də ifadə ediblər. Biz onlarla görüşlərdə bunun şahidi olmuşuq. Ancaq indiki mərhələdə bu özünü açıq şəkildə büruzə verdi. Güneylilər haqlı olaraq öz sevinclərini ifadə edirlər. Çünki doğrudan da İlham Əliyev təkcə Azərbaycan Respublikasının vətəndaşlarının deyil, 55 milyonluq Azərbaycan xalqının prezidenti olduğunu dəfələrlə sübut edib. Qarabağın işğaldan azad olunması, Azərbaycan Respublikasının BMT tərəfindən tanınan ərazi bütövlüyünün tam təmin olunması Quzeylə yanaşı Güneydə də böyük qürur, fəxarət hissi yaradıb. Bütün bunlar onu göstərir ki, bizim bütövlüymüz, birliyimiz daha da güclənib. Prezident İlham Əliyev dəfələrlə qeyd edib ki, bütün dünya azərbaycanlılarının prezidentidir və bütün azərbaycanlıların taleyi onu düşündürür və o, azərbaycanlıların taleyinə biganə qalmır. O cümlədən də güneylilərin taleyinə İlham Əliyev heç zaman biganə qalmayıb, onların taleyini düşündüyünü ifadə edib. Əliyevin qələbəsi təkcə Təbrizdə yox, Urmuda, Makuda, Ərdəbildə, Xoyda, Zəncanda bu və digər şəkildə sevincə qarşılanır. Güney azərbaycanlıların, bütövlükdə dünya azərbaycanlıların şüurunda İlham Əliyevin bütöv Azərbaycanın Prezidenti olması fikri, düşüncəsi öz əksini tapıb"-deyə F.Ələkbərli vurğuladı.
İradə SARIYEVA
