Elnur Kəlbizadə: "Paşinyan başa düşür ki, daşnakların təfəkkürünə uyub tarixi ədalət arayışlarının dərinləşdirilməsi ermənilərə baha başa gələ bilər"
Ermənistanın Müstəqillik bəyannaməsi sülhün qarşısında böyük əngəl kimi dayanıb. Azərbaycan Prezidenti İlham Əliyev bu bəyannamənin sülhə mane olduğunu bəyan etdikdən sonra Ermənistanın Baş naziri Nikol Paşinyanyan da bunu etiraf edir ki, Ermənistan müstəqillik bəyannaməsini rəhbər tutsa, sülh mümkün deyil.
N.Paşinyan Ermənistan parlamentində "Biz dövlətimizin təməlində tarixi ədalət axtarışını qoymuşuq, amma tarixi ədalətin nə olduğunu formalaşdırmamışıq, çünki Ermənistanın müxtəlif siyasi qüvvələri və qrupları, ideologiyaları "tarixi ədalət" dedikdə tamam başqa şeyləri başa düşürlər" - deyə bildirib.
Onun sözlərinə görə, ümumiyyətlə, bu dövrdə mühüm vəzifə özünü dərk etmək olmalıdır.
"Müstəqilliyimizin ilk illərindən, sonrakı inkişaflardan başlayaraq, faciəvi şəraitə görə indi əldə etdiyimiz nəhəng məlumatları emal etməli və dərk etməliyik. Mən bu barədə 2020, 2021, 2022-ci illərdə danışmışam. Məqsəd odur ki, dövlətimizin məzmununda olan daxili ziddiyyətləri ortaya çxarmalı, onlarla üz-üzə gəlməli və bunun nə demək olduğunu anlamalıyıq. Qeyd edək ki, siyasi mətnlərin icrası, nəticəsi var. Həmin bəyannamənin preambulasına üç əsas istiqamət qoyulub, bunlardan biri erməni xalqının istəkləri, tarixi ədalət və ikincisi, Qarabağ məsələsidir. Tarixi ədalət nədir? Üstəlik, tarixi ədalətin müxtəlif yozumları ola bilər və problem də buradadır", - deyə Paşinyan qeyd edib. "Ermənistan müstəqillik bəyannaməsini rəhbər tutsa, sülh mümkün deyil" - deyən Paşinyan bildirib ki, Ermənistanın xarici və daxili əlaqələri dəyişib, fərqli mühit formalaşıb. "Gizli siyirmədə yazılmış konstitusiya yoxdur, biz onu hamıdan gizlədirik və başqa qapıdan keçirmək istəyirik. Problemi konseptual səviyyədə formalaşdırıram. Qalanı isə əlavə müzakirə mövzusudur", - deyə Paşinyan qeyd edib.
Ermənistan Baş naziri deyib ki, dünyada artıq Ermənistanın hazırkı konstitusiyası qəbul edilən zaman olan şəkildə heç nə qalmayıb:"Bəziləri belə bir tezis irəli sürür ki, konstitusiyaya dəyişiklik Azərbaycanla sülh müqaviləsi imzalamaq üçün edilir. Belə problemlər olsa belə, bunlar artıq həll olunub. Nəhayət, sülh müqaviləsinin mətnində razılaşdırılmış bir maddə var ki, tərəflər bu müqavilədən irəli gələn hər hansı öhdəliklərdən yayınmaq üçün öz qanunlarına istinad edə bilməzlər".
"Azərbaycan Prezidentinin dediklərini qəbul etməyəndə nə ola biləcəyini ən yaxşı Nikol Paşinyan bilir"
Paşinyanın bəyanatına şərh verən AMEA-nın Qafqazşünaslıq İnstitutunun Ermənişünaslıq şöbəsinin müdiri, dosent Elnur Kəlbizadə "Bakı-Xəbər"ə "Əslində Ermənistanda "erməni millətçiliyi" oyunu oynayanlar, ölkənin müstəqillik bəyannaməsinə və konstitusiyasına əsassız iddiaları salanların özləri də bilirlər ki, istədikləri şey tarixi ədalətin bərpası deyil. Tarixi ədalətin bərpası İrəvanın Azərbaycana qaytarılması deməkdir, tarixi ədalətin bərpası müxtəlif dövrlərdə müxtəlif ölkələrdən tarixi Azərbaycan torpaqlarına köçürülərək məskunlaşdırılan ermənilərin nəsillərinin yenidən həmin ölkələrə qaytarılmasından keçə bilər. Paşinyan başa düşür ki, daşnakların təfəkkürünə uyub tarixi ədalət arayışlarının dərinləşdirilməsi ermənilərə baha başa gələ bilər" - deyə bildirdi.
E.Kəlbizadə qeyd etdi ki, Ermənistan dalana dirənib, işğalçılıq siyasəti, əsassız iddialar şərq və qərb qonşuları - Azərbaycan və Türkiyə ilə sərhədlərin bağlanmasına, iqtisadi əlaqələrin kəsilməsinə gətirib çıxarıb. "Ermənistan sanksiyalar altında olan İrana, iqtisadi böhrandan Azərbaycan və Türkiyə ilə əməkdaşlıq edərək xilas olmuş Gürcüstana möhtac olub. Ermənistanın və onun havadarlarının bütün xülyalarına rəğmən Azərbaycan güclənib, beynəlxalq hüquqa uyğun ədaləti bərpa edib. "Dəmir yumruq"la beynəlxalq hüquqi ədalətin bərpası, tarixi ədalətin bərpası məsələsi gündəmə gəlməmiş bəzi erməniləri ayılmağa vadar edib. Nikol Paşinyan yaxşı bilir ki, İlham Əliyevin simasında Azərbaycan dövləti nəyi deyirsə onu da edir. Azərbaycan Prezidentinin dediklərini qəbul etməyəndə nə ola biləcəyini ən yaxşı Nikol Paşinyan bilir. Amma Ermənistan bəyanatlar kimi, fəaliyyətlərdə də, praktikada da səmimi olmalıdır. Bir tərəfdən sülhdən danışıb, digər tərəfdən Azərbaycana ərazi iddiaları irəli sürən təşkilatları maliyyələşdirməməli, onların fəaliyyətinə gizli və açıq dəstək verməməlidir. Bir tərəfdən sülhdən danışıb, digər tərəfdən "Gardaman-Şervan-Naxçıvan", "Arsax" kimi sarsaq layihələri dəstəkləmək, Vardan Voskanyan kimi şoumen-aktyorların iştirakı ilə "Vətən haradır" klipi çəkmək lazım deyil. Əgər Ermənistan hökuməti bu cür layihələrdə iştirak edənlərə yer tapmırsa onları İrəvandakı Myasnikyan xiyabanı 20 ünvanına, ya da Aqatanqeqosi 1 ünvanına göndərsin. Orada onlar özlərini daha yaxşı ifadə edə bilərlər" - alim bildirdi.
İradə SARIYEVA
