Şəmsəddin Əliyev: "Məqsəd bir nəfəri edam etməklə bütün bu detalları bağlı saxlamaqdır"
Azərbaycanın İrandakı səfirliyinə hücum etmiş şəxs barəsində hökm çıxarılıb. İclasın əvvəlində təqsirləndirilən şəxsə hakim izahat verib və prokurorun nümayəndəsi ittiham aktını oxuyub.
Yayımlanan ittiham aktına əsasən, Azərbaycan Respublikasının səfirliyinə hücum edən şəxs səfirlik daxilində odlu silahdan istifadə etməklə Azərbaycan Respublikası vətəndaşını qəsdən öldürməkdə, qanunsuz silah saxlamaqda, gəzdirməkdə və ictimai asayişi pozmaqda ittiham olunur. Məhkəmə Yasin Hüseynzadə barəsində edam hökmü çıxarıb. Qeyd edək ki, yanvarın 27-də Azərbaycanın İrandakı səfirliyinə hücum edən şəxsin cinayət işi üzrə məhkəmə iclası keçirilib. Məhkəmə iclası təqsirləndirilən şəxs və onun vəkillərinin iştirakı ilə keçirilib. Məhkəmə iclasında Azərbaycan Respublikası səfirliyinin bir sıra məsul şəxsləri də iştirak edib. Prokurorun nümayəndəsi ittiham aktını oxuduqdan sonra təqsirləndirilən şəxs və vəkili müdafiə çıxışı edib.
Xatırladaq ki, 27 yanvar 2023-cü il tarixində Bakı vaxtı ilə səhər 08:30 radələrində səfirliyə silahlı hücum edən şəxs "Kalaşnikov" markalı avtomat silahla mühafizə postunu yararaq, mühafizə xidmətinin rəisi Orxan Əsgərovu qətlə yetirib. Səfirliyin mühafizə xidmətinin iki əməkdaşı - Vasif Tağıyev və Mahir İmanov hücumun qarşısını alarkən yaralanıb.
İranda səfirliyimizə hücum edənə edam hökmü verməklə hər şeyi bitmiş saymaq olarmı? Axı, bu terroru hazırlayanların kimliyi, əslində hansı məqsədlə həyata keçirildiyi məlum olmadı. Sanki bu məsələni bir nəfərin üzərinə yükləməklə prosesə terror yox, məişət görüntüsü verilməyə çalışılır. Bu qərar bizi qane edə bilərmi? Belə çıxır ki, terrorçu sirri də özü ilə birlikdə qəbrə aparacaq?
Hüquqşunas Şəmsəddin Əliyev "Bakı-Xəbər"ə açıqlamasında bildirdi ki, İranın cinayət məcəlləsində xüsusilə ağır cinayət əməlləri törədənə edam hökmü nəzərdə tutulur: "Bu, ən ağır cəza növü sayılır. Ancaq bu, sıradan bir cinayət əməli deyil. İki dövlət arasında münasibətlərin pozulmasına kimi aparıb çıxaran bir cinayət əməlindən söhbət gedir. Hətta bu cinayət hadisəsindən sonra Azərbaycan tərəfi öz diplomatik korpusunu İrandan çıxardı və diplimatik əlaqələri kəsdi. Təbiidir ki, bu terror aktının niyə törədilməsi ilə bağlı istintaq dəqiq faktı ortaya çıxarmayıb. Bəlkə də çıxarıb, ancaq bunu açıqlamır. İstinaq məhkəməyə qədər bu cinayətin əsl motivini öyrənməliydi. Bu əməlin törənməsinə vadar olunan səbəblər üzə çıxmalıydı. İndiyə qədər İranla ölkəmiz arasında bu dərəcədə gərginlik olmamışdı. Narazılıqlar mətbuat səviyyəsində qarşılıqlı ittihamlardan kənara çıxmırdı. Terrorun baş verdiyi ərazi Azərbaycanınkı sayılır. Ora edilən hücumun bütün detalları tam araşdırılmalı idi. Məhkəmə də bu məsələyə qiymət verməli idi. Bütün bu detallar örtülü qalıb. İstər ibtidai, istərsə də məhkəmə istintaqı obyektiv aparılmayıb. Əsas məsələ kənarda qalıb. Obyektiv araşdırılsaydı xüsusi qərardadla bu işə başqa adamlar da cəlb edilməliydi. Məqsəd bir nəfəri edam etməklə bütün bu detalları bağlı saxlamaqdır. Sanki bununla bizə göstərirlər ki, gördünüzmü, terror edəni edama göndərdik. Edamla əsl motivi qapadırlar. Təbiidir ki, bu yarımçıq qərar bizi qane edə bilməz. Bundan sonra kim zəmanət verir ki, bizim diplomatlarımıza qarşı bir də belə addım atılmayacaq?"
Məhəmmədəli QƏRİBLİ
