Azər Həsrət: "...Hamı bir ağızdan eyni fikri təsdiqləyir ki..."
7 fevral növbədənkənar prezident seçkiləri ölkəmiz müstəqilliyini bərpa etdikdən sonra bütöv və suveren Azərbaycanda ilk dəfə baş tutub. Azərbaycan ictimaiyyətinin Zəfər seçkisi adı verdiyi bu prosesə Azərbaycan müşahidəçiləri ilə yanaşı xarici müşahidəçilər, media mənsubları da ciddi maraq göstərdilər.
Rəsmi məlumata görə, işğaldan azad edilən ərazilərdə 26 seçki məntəqəsi, xaricdə olan Azərbaycan vətəndaşları üçün 37 ölkədə səfirlik və konsulluqlarda 49 seçki məntəqəsi fəaliyyət göstərib. Məlumdur ki, azad ərazilərdə səsverməni xarici müşahidəçilər xüsusilə izlədilər və proseslə bağlı müsbət fikirlər söylədilər.
Prezident İlham Əliyev və ailə üzvləri də 122 saylı Xankəndi seçki dairəsinin 14 saylı seçki məntəqəsində səs verdilər.
Bütövlükdə, azad rayonlarda keçirilən seçki prosesi xarici müşahidəçilərin əsas diqqətində oldu. Xarici müşahidəçilərin azad rayonlarda keçirilən seçkiləri izləməsinin və proses barədə müsbət fikirlər bildirməsinin beynəlxaq əhəmiyyəti nədir? Bu, seçkini qaralamaq istəyənlərə layiqli cavab sayıla bilərmi? Çünki arada bəziləri yanlış məlumat yaymağa, seçkini qaralamağa çalışdı...
"...Seçki yüksək səviyyədə təşkil edildi və müxtəlif istiqamətləri təmsil edən beynəlxalq müşahidəçilər haqlı olaraq seçki ilə bağlı yüksək fikirlər söyləyirlər"
Siyasi şərhçi Azər Həsrət "Bakı-Xəbər"ə "Əlbəttə, azad edilmiş ərazilərdə seçkinin bu cür intizamlı bir şəkildə keçirilməsi, eyni zamanda seçicilərin böyük həvəslə gəlib orada iştirak etməsi, əlamətdar olaraq da Xankəndidəki 3 min seçicinin hamısının Prezident, müzəffər Ali Baş Komandan İlham Əliyevə səs verməsi və sair bizim əleyhdarlarımızı çox qıcıqlandırır, çox narahat edir. Yəni bizə qarşı olanlar bir qayda olaraq millətimizin bütövləşdiyi günləri görmək istəmirlər. Ona görə də şər, böhtan, yalan yayaraq bu seçkini gözdən salmağa çalışırlar. Hətta gecədən görürəm, bəzi qüvvələr belə bir tezis ətrafında yanlış rəy formalaşdırmağa çalışırlar, guya Azərbaycan iddia edib ki, azad edilmiş bütün ərazilərdə seçki təşkil edilib. Əks arqument kimi onu deyirlər ki, o ərazilərdə məskunlaşma getməyib və Azərbaycan hakimiyyəti "dünyanı aldadır". Halbuki, Azərbaycan dövləti, cənab Prezident özü də, biz özümüz də bəyan etmişik ki, bu seçkilər Azərbaycan Respublikası ərazilərinin bütövlüyün təmin edilməsi şəraitində keçirilir. Yəni bu o deməkdir ki, Azərbaycan dövləti özünün bütün ərazisində suverenliyini bərpa edib, təmin edib, biz seçkini bu şəraitdə keçiririk. Amma heç kim iddia etməyib ki, azad olunmuş bütün ərazilərdə keçirilir. Zatən keçirilə bilməz, çünki hələ minalardan təmizlənəcək çox böyük ərazilərimiz var" - deyə bildirdi.
A.Həsrətin sözlərinə görə, ümumiyyətlə, o ərazidə seçkinin keçirilməsi dosta güvən, düşmənə qıcıq verir, ona görə də düşmən könül bulandırmaq üçün ortalığa belə sərsəm, əllə tutula bilməyəcək iddialar atır. "Əlbəttə, biz də cavablarını veririk, verməkdə də davam edəcəyik. Hətta ermənilərin öndə gələnləri beynəlxalq ictimaiyyəti aldatmaq üçün iddia paylaşmışdılar ki, İlham Əliyev heç vaxt Xankəndidə yaşamayıb, amma necə olur, gəlib qeydiyyatda olmadığı, yaşamadığı bir şəhərdə seçkilərdə səs verir, bu "saxtakarlıqdır", "qanun pozuntusudur". Dünən mən tvitter üzərindən onların izləyicilərinə izah etdim ki, Azərbaycan Respublikasının qanunlarına, Seçki Məcəlləsinə görə, vətəndaş əgər səsvermə günü yaşadığı, qeydiyyatda olduğu ərazidə ola bilməyəcəksə, bunun üçün məntəqə seçki komissiyasından çıxarış alır və harda olacaqsa orada da səs verir, burada qanunsuz heç nə yoxdur. Yəni bu cür xırda ürəkbulandırma cəhdləri var. Amma ümumilikdə bizim bu prosesə heç nə və heç kəs kölgə sala bilməyəcək.
Xarici müşahidəçilərin çıxışlarını, fikirlərini də yaxından izlədim. Bir qayda olaraq, onlar seçkinin yüksək səviyyədə təşkil edildiyini, seçici marağının yüksək olduğunu, seçicilərin iradəsini azad şəkildə ifadə etməsi üçün hər cür şəraitin yaradıldığını qeyd edirdilər. Xarici müşahidəçilərin mövqeyi, rəyi birmənalı şəkildə müsbət oldu. Şəxsən mən özüm də seçki günü həm seçici kimi iştirak etdiyim məntəqələrdə, həm də olduğum başqa məntəqələırdə müşahidə aparmışam, medianın fəaliyyətini də izləmişəm. İlişilə biləcək bir məsələ yox idi. Bu baxımdan, seçki yüksək səviyyədə təşkil edildi və müxtəlif istiqamətləri təmsil edən beynəlxalq müşahidəçilər haqlı olaraq seçki ilə bağlı yüksək fikirlər söyləyirlər. Bu gün (8 fevral-red.) günortadan sonra ATƏT-in Demokratik Təsisatlar və İnsan Haqları Bürosunun beynəlxalq seçki müşahidə missiyasının da açıqlaması olacaq. Onu da gözləyirik. Əlbəttə ki, onların açıqlamalarına uyğun olaraq fikrimizi bildirəcəyik (biz yazını çapa hazırlayanda hələ ATƏT-in Demokratik Təsisatlar və İnsan Haqqları bürosu açıqlama yaymamışdı-İ.S). Amma bunu qeyd etməyi zəruri bilirəm ki, yalnız o qurumdan başqa yerdə qalan bütün beynəlxalq seçki müşahidə missiyaları fikirlərini, qiymətləndirməni açıqlayıblar. Biz hər hansı ciddi, neqativ yanaşmaya rast gəlməmişik. Sadəcə olaraq, hamı bir ağızdan eyni fikri təsdiqləyir ki, seçki doğrudan da yüksək səviyyədə təşkil edilib, azad iradə ifadəsi üçün bütn şərait yaradılıb" - deyə A.Həsrət qeyd etdi.
İradə SARIYEVA
