"Seçkilərə hazırlıq və səsvermə prosesi mükəmməl səviyyədə idi". Secki-2024.az xəbər verir ki, bu fikirləri Müstəqil Dövlətlər Birliyinin (MDB) Baş katibi Sergey Lebedev Azərbaycanda keçirilən növbədənkənar prezident seçkilərində apardıqları monitorinqin yekunlarına dair brifinqdə söyləyib.
"Seçkiləri müşahidə missiyamızda 160 üzv iştirak edib. Məlum səbəblərə görə missiyaya Ermənistan, Ukrayna və Moldova nümayəndələri daxil edilməyib", - deyən S.Lebedev seçki müşahidələrini bölüşüb: "Biz seçici aktivliyini gördük, səs vermək üçün növbələr yaranmışdı.Təşkilatçılar tərəfindən bütün proses səriştəli təşkil edilmişdi. Biz seçkilərin yaxşı səviyyədə keçirildiyini müşahidə etdik. Daha bir müşahidəm ondan ibarətdir ki, insanlar seçkiyə ürəkdən, həvəslə yanaşırdı. Seçki marafonuna qoşulan namizədlər əvvəllər prezident seçkilərində iştirak edən təcrübəli, səriştəli insanlar idi. Yəni, adi insanlar prezidentliyə namizədliyini irəli sürməmişdi. Azərbaycanda bu seçkilərin rəqabət mühitində keçirilməsi təqdirəlayiqdir. Namizədlərin hamısına özlərinin proqramları, ideyaları ilə təşviqat aparmaq üçün bərabər imkanlar yaradılmışdı".
"Azərbaycanda keçirilən növbədənkənar prezident seçkiləri azad, şəffaf, demokratik prinsiplərə əsaslanaraq keçirilib", - deyən Sergey Lebedev qeyd edib ki, 7 fevral seçkiləri qanunvericilik əsasında keçirilib: "Azərbaycanda keçirilən növbədənkənar prezident seçkiləri Seçki Məcəlləsinin tələblərinə tam cavab verirdi. MDBmüşahidəçiləri də hesab edir ki, seçkilərdə əsas istinad nöqtəsi hansısa amorf təşkilatların normativləri deyil, Seçki Məcəlləsi olmalıdır. Qərbi Avropada, ABŞ-da keçirilən seçkilərdə onların öz prinsipləri var. Onlar hesab edirlər ki, namizədlərdən biri mütləq qadın, biri mütləq qaradərili, biri LGBT, biri isə əlil olmalıdır. Bu, bizim üçün əsas sayıla biıməz. Hər bir dövlətin özünün milli Seçki Məcəlləsi əsas istinad sənədi kimi götürülməlidir. Bu sənəd milli qanunvericiliyin təməli kimi götürülməlidir. Biz heç zaman Azərbaycanın daxili işlərinə müdaxilə etməmişik. Bizim xalqlarımız dost və qonşudur. Ümid edirik ki, bu dostluq münasibətləri uzun müddət davam edəcək".
Çıxış edən nümayəndə heyətinin üzvləri də bu tarixi hadisə ilə əlaqədar Azərbaycan xalqını təbrik ediblər. Onlar seçkilərin şəffaf, beynəlxalq normalar çərçivəsində baş tutduğunu deyiblər. Müşahidəçilər həmçinin seçki prosesinin demokratik prinsiplər əsasında təşkilində yerli QHT, siyasi partiyalar və KİV-in rolunu da vurğulayıblar. MDB müşahidəçiləri seçkinin texniki təchizat baxımından yüksək səviyyədə təmin edildiyini, məntəqələrdə səsvermənin qanunun tələblərinə uyğun şəkildə baş tutması üçün bütün şəraitin yaradıldığını xüsusi qeyd ediblər.
