Əli Orucov: "Paşinyan komandası əvvəlki kimi manoloit görünmür"
Son vaxtlar Ermənistan hakimiyyəti daxilində monolotliyin pozulması, əvvəlki birliyin olmaması elementləri özünü göstərir. Təhlükəsizlik Şurası sədri Armen Qriqoryanla parlament spikeri Alen Simonyan arasında qarşıdurmanın yaranması haqda məlumatlar yayılır.
Həm də bu günlərdə A.Simonyanın qardaşının həyat yoldaşı Ani Gevorkyan 2 ay müddətinə həbs olunub. O, vəzifə səlahiyyətlərindən sui-istifadəyə şərait yaratmaqda ittiham edilir. Bu səbəbdən hakim "Mülki Müqavilə" Partiyasından olan deputatlar Simonyanı istefaya göndərməyi tələb edirlər.
Digər tərəfdən Ermənistan İctimai Radio Şirkətinin direktoru Qaregin Xumaryan baş nazir Nikol Paşinyanın verdiyi müsahibəni tənqid edib. Televiziyanın Yayım Şurası direktorla bağlı məsələni müzakirə edir. "İctimai səs" partiyasının "mənəvi ata"sı, bloger Vardan Qukasyan müxalifətə qarşı istintaq işinin aparılmasını əsas gətirərək "Ana Ermənistan" və "Milli Tərəqqi" müxalifət fraksiyalarını İrəvan Ağsaqqallar Şurasının iclaslarında iştirak etməməyə çağırıb. Həmçinin, "Milli Tərəqqi" fraksiyası Ağsaqqallar Şurasının üzvlərinə qarşı repressiyalarla bağlı verilən siqnalla əlaqədar bəyanat yayaraq Şuranın növbədənkənar iclasını boykot etməyə çağırıb.
Bütün bunlar Ermənistanda icra hakimiyyəti ilə qanunverici hakimiyyət arasında yaşanan qarşıdurmalardan xəbər verir. Maraqlıdır, bütün bu sadalananlar Ermənistanda nədən xəbər verir? Bununla Ermənistanın guya demokratik olmasına oynayırlar, yoxsa hakimiyyətdə xaosdur?
"Proses belə davam edərsə, mərkəzdənqaçma meylləri güclənəcək"
Məsələ ilə bağlı "Bakı-Xəbər"ə açıqlama verən AMİP funksioneri Əli Orucov hesab edir ki, Paşinyan komandası əvvəlki kimi monolit görünmür: "Çünki 6 ilə yaxındır ki, hakimiyyətdədilər. Bu müddət ərzində verdikləri bir sıra vədləri yerinə yetirə bilməyiblər. Bu günlərdə keçirilən rəy sorğuları da göstərdi ki, Paşinyanın reytinqi aşağı düşüb və əvvəlki populyarlığını itirib. Əslində bir neçə erməni eksperti bəyan edir ki, 2018-ci ildə naçarlıqdan ermənilər Paşinyanı seçdilər. Çünki 20 il ölkəni çapıb-talayan quldur "Qarabağ klanı"ndan qurtulmaq istəyirdilər. Onların idarəçiliyindən təngə gəlmişdilər. 44 günlük müharibədən sonra Paşinyana ona görə stavka etdilər ki, revanşistlər yenidən hakimiyyətə gəlməsin. Digər alternativ qüvvə olsaydı, əminəm ki, onu seçəcəkdilər. Ancaq bu da bir yerə qədər. Düzdür, ümumən Paşinyanın reytinqi revanşist müxalifətdən güclüdür. Ancaq Alen Simonyanın populist açıqlamaları, bəzi korrupsiya faktlarının ortaya çıxması, hərbi elita daxilində qarşıdırmalar, Rusiyaya bağlı hərbçilərin hakimiyyətə yönəlik kəskin ittihamları bir sıra məsələlərdən xəbər verir. Görünən odur ki, hakim qüvvənin monolitliyi pozulur. Proses belə davam edərsə, mərkəzdənqaçma meylləri güclənəcək".
Vidadi ORDAHALLI
