Qulamhüseyn Əlibəyli: "Erməni cəmiyyətində mövcud olan biganəlikdən çıxış edərək arxayınlaşa bilmərik"
"Diqqət etmisinizmi ki, biz ictimaiyyət olaraq "Artsax respublikasının" işğal olunmuş ərazisində indi baş verənlərlə heç maraqlanmırıq?" Bunu erməni iranşünas Vardan Voskanyan yazıb.
O etiraf edib ki, Ermənistanda Qarabağ məsələsi unudulub: "Bu arada, məncə, geri qayıtmağın şərtlərindən biri də vəziyyəti xatırlamaq və izləməkdir. Ona görə də hesab edirəm ki, mediada ən azı bununla bağlı xüsusi xəbər bölməsi ola bilər".
Burada diqqəti çəkən məqam odur ki, Qarabağ məsələsinin artıq Ermənistanda unudulduğunu, əhalinin yadından çıxdığını erməni tərəfi etiraf edir. Hətta vəziyyət o yerə gəlib çatıb ki, öz aləmlərində çıxış yolunu "Arsaxla" bağlı gündəlik xəbər büllütenlərinin hazırlanmasında görürlər. Bütün bunlar o deməkdir ki, Ermənistanda ictimaiyyət açıq şəkildə bu mövzudan, iddialardan imtina edib. Ən azından Qarabağa əvvəlki maraq yoxdur.
"Bugünkü erməni cəmiyyətinin böyük əksəriyyəti Qarabağ erməniləri ilə bağlı məsələyə o qədər də diqqət göstərmir"
Məsələ ilə bağlı "Bakı-Xəbər"ə açıqlama verən sabiq millət vəkili, hüquqşünas Qulamhüseyn Əlibəyli buna birmənalı yanaşmadı: "Voskanyanın qaldırdığı məsələlər o demək deyil ki, Qarabağ məsələsi və separatçı qurumun yox olması Ermənistanda tamamilə unudulub. Biz bu kimi məsələlərdə son dərəcə diqqətli olmalı və prosesləri hərtərəfli təhlil etməliyik. Bəli, bu gün Ermənistan cəmiyyətində Qarabağ erməniləri ilə bağlı məsələni ön plana çıxarmaq istəyən adamların sayı azdır. Otuz il əvvəlki vəziyyət deyil. Halbuki, erməni şovinizmi bütün Ermənistana yayılmışdı. Ancaq sonrakı proseslər göstərdi ki, ərazilərimizin işğalı ermənilərə xoşbəxtlik gətirmədi. Bundan əsasən bir qrup terrorçu xislətə malik hakimiyyət üzvü bəhrələndi. Ancaq bütün bunlar o demək deyil ki, erməni cəmiyyətində Qarabağla bağlı iddialar tamamilə məhv olub. Erməni cəmiyyəti xəstədir və revanşist qüvvələr, kilsə hər vasitə ilə bunu körükləməyə çalışır. Sadəcə imkanları məhdud olduğuna görə, kütləvi şəkildə bu məsələni qabarda bilmirlər. Əminəm ki, əvvəlki imkan yaransa ermənilər öz mənfur istəklərini həyata keçirməyə cəhd edəcəklər. Bəli, bugünkü geosiyasi reallıqlarda Qarabağ erməniləri ilə bağlı Ermənistan heç bir real işlər görmək imkanına malik deyil. Lakin müəyyən qüvvələr hər vasitə ilə çalışırlar ki, Qarabağla bağlı iddialar yaddan çıxmasın. Görəndə ki, erməni cəmiyyətində buna maraq getdikcə sönür, həmin qüvvələr bundan narahat olmağa başlayırlar. Çünki o da faktdır ki, bugünkü erməni cəmiyyətinin böyük əksəriyyəti Qarabağ erməniləri ilə bağlı məsələyə o qədər də diqqət göstərmir. Ancaq erməni kilsəsi, revanşistlər hər zaman çalışacaqlar ki, məsələni gündəmdə saxlasınlar. O üzdən, biz erməni cəmiyyətində mövcud olan biganəlikdən çıxış edərək arxayınlaşa bilmərik. Çünki bunda böyük güclərin geosiyasi maraqları da var".
Vidadi ORDAHALLI
