Akif Nağı: "Məsələnin əsl mahiyyətini ört-basdır etmək üçün ortaya yalandan belə bir fikir atırlar ki…"
"Ermənistanda yeni Konstitusiyanın qəbulu prosesi yalnız Ermənistan Respublikasının daxili gündəliyidir". "Armenpress" xəbər verir ki, bunu Ermənistanda yeni Konstitusiyanın qəbulu ilə bağlı müzakirələrə istinadən Milli Assambleyanın "Mülki müqavilə" fraksiyasının rəhbəri Hayk Konjoryan deyib.
"Bunun Azərbaycanın tələbi olduğunu əsas götürərək, mövzunu yayındırmağa çalışırlar. Qətiyyən Azərbaycanın tələbi deyil. Bu, Ermənistan Respublikasının daxili gündəliyidir, Ermənistan vətəndaşlarına, Ermənistan xalqına aiddir. Bu müzakirə özlüyündə dəyərlidir. Düşünürəm ki, bu debatda təbliğat səs-küyünü kəsə bilsək və bizə aid olduğu üçün əsaslı müzakirə apara bilsək, hamımız böyük fayda əldə etmiş olarıq. Konstitusiya, Müstəqillik Bəyannaməsi və Dördüncü Respublika ilə bağlı müzakirələr özümüz haqqında, özümüzü dərk etməyimiz, bugünkü dağılan dünya düzənində qarşımızda duran çağırışlara necə cavab verəcəyimiz haqqındadır", - Konjorian bildirib.
Onun sözlərinə görə, bu məsələnin başlanğıc nöqtəsinin heç bir başqa dövlətlə, Ermənistandan kənarda olan xarici qüvvələrin təzyiqi ilə heç bir əlaqəsi yoxdur. O, eyni zamanda əlavə edib ki, Azərbaycan Ermənistanda daxili vəziyyəti qızışdırmaq istəyir, ona görə də bu diskursa qoşulur.
Qeyd edək ki, Prezident İlham Əliyev fevralın 1-də Parlamentlərarası İttifaqın Baş katibi Martin Çunqonqu qəbul edərkən də Ermənistanın əsas qanununun dəyişməsi məsələsinə toxunub. Prezident Əliyev bildirib ki, İrəvanın Müstəqillik Bəyannaməsində Azərbaycanın Qarabağ bölgəsinin Ermənistanla birləşdirilməsinə və onun ərazi bütövlüyünün pozulmasına birbaşa çağırışlar var və bu sənədə istinadlar da konstitusiyada öz əksini tapıb. Həmçinin qeyd olunub ki, hazırda qonşu ölkədə bu mövzuda müzakirələrin başlanması müsbət addım kimi qiymətləndirilir və bu, sülh prosesinin tezliklə yekunlaşdırılması üçün yaxşı imkan yarada bilər.
Deputatın iddiasına görə, Azərbaycan Ermənistanın konstitusiyasını dəyişməsi ilə bağlı məsələni ona görə ortaya atıb ki, Ermənistanda daxili vəziyyəti qızışdırsın. Guya bu təklif bu məqsədlə ortaya atılıb. Deyir ki, konstitusiyanı özümüz dəyişirik, Azərbaycanın rolu, təsiri yoxdur. Bu öz yerində.
Amma əslində Azərbaycan Prezidentinin, Azərbaycanın bu məsələni aktuallaşdırması daha böyük məsələdən xəbər verir ki, Ermənistan həqiqi şəkildə sülhə gəlsin, çünki Konstitusiyasında ərazi iddiaları ola-ola Azərbaycanla saziş imzalaması mümkünsüzdür.
Ekspertlər hesab edir ki, deputatın Azərbaycanın Ermənistanın daxilini qarışdırmaq məqsədilə bu məsələni gündəmə gətirməsi barədə iddiası əsassızdır, o və ermənilər bu iddianı ortaya atmaqla diqqəti əsas məsələdən yayındırmaq istəyirlər. Məsələnin əsl mahiyyətini gizlətmək istəyirlər ki, bizim konstitutsiyamız indiyə qədər işğalçı konstitusiya deyildi. Azərbaycanın da məqsədini yanlış istiqamətdə göstərirlər ki, guya Azərbaycan Ermənistanın daxilindəki vəziyyəti qarışdırmaq üçün belə deyir. Əslində isə əsl hədəf Ermənistan konstitusiyasını belə irticaçı, işğalçı maddələrdən təmizləməkdir.
"Ermənistanın konstitusiyasının dəyişdirilməsi tələbi Azərbaycana aiddir və Ermənistan hökuməti bu tələbə uyğun olaraq konstitutsiyanı dəyişməyə hazırlaşır"
Azad Vətən Partiyasının sədri Akif Nağı "Bakı-Xəbər"ə bildirdi ki, Azərbaycan regionun lider dövlətidir və təkcə Azərbaycanda yox, bütövlükdə bölgədə stabilliyin bərqərar olmasında maraqlıdır. Həm məsuliyyət daşıyır, həm də gücü var ki, təkcə özündə yox, eyni zamanda bütün Cənubi Qafqazda stabilliyi, sabitliyi, normal əməkdaşlığı təmin etsin. Həm də öz maraqları var ki, regionda qarşıdurma olmasın, xarici qüvvələr bu qarşıdurmadan istifadə edə bilməsinlər. Azərbaycan bu funksiyasını yerinə yetirməyə çalışır. Ona görə də Gürcüstana da bu istiqamətdə təsir göstərir, Ermənistanda da proseslərin düzgün yol xəritəsini göstərir. Gürcüstanda bunu başa düşürlər. Gürcüstanın əvvəlki baş naziri Qaribaşvili açıqlama verdi ki, Azərbaycandakı prezident seçkiləri təkcə Azərbaycan üçün yox, region üçün əhəmiyyətlidir. O cümlədən Gürcüstan, regionda stabilliyin bərqərar olması üçün əhəmiyyət daşıyır. Ermənistan da başa düşməlidir ki, çıxış yolu Azərbaycanın dediyi yolla getməkdir, o qaydalara əməl etmək, münasibətləri yaratmaqdır. Azərbaycan da bu stabillik, normal münasibətlər üçün mövqeyini ortaya qoyur ki, Ermənistan Azərbaycana və Türkiyəyə qarşı ərazi iddialarından geri çəkilməlidir, o revanşist maddələri konstitusiyasından çıxarmalıdır. Ermənistanın Müstəqillik Bəyannaməsində Azərbaycanın ərazi bütövlüyünə qəsbkarlıq var, Qarabağın dağlıq hissəsi Ermənistan ərazisi kimi göstərilir və sair. Yəni bunlar 30 il ərzində Azərbaycana qarşı həm işğalçılıq, qəsbkarlıq etdilər, həm də dünya çapında özlərinin bu işğalçılığını guya hansısa "qədim Ermənistanın birləşməsi", "Ermənistana məxsus torpaqların geri qaytarılması" kimi qələmə verirdilər. Onlar bu xəstə təxəyyüldən qurtarmalıdırlar. Hələ bunlar ilk kiçik addıma müqavimət göstərirlər, çünki xəstədilər. Heç cür xəstəlikdən xilas olmaq istəmirlər. Azərbaycan təklif edir ki, siz öz ziyanlı mövqeyinzdən əl çəkin, ictimai rəyi dəyişin, "Böyük Ermənistan" ideyasından geri durun, Azərbaycanla və Türkiyə ilə münasibətləri normallaşdırın, artıq başqa dövlətlərin aləti olmaqdan qurtarın, budur sizin yolunuz. Siz özünüzə bununla bir yol aça bilərsiniz, yoxsa başqa cür mümkün deyil" - deyə qeyd edən A.Nağı qeyd etdi ki, Hayk Konjoryan Paşinyan hökumətinin adamıdır, əsas aparıcı simalarından biridir, parlamentdə hökumət fraksiyasının lideridir.
"Bu da nala-mıxa vurursa, onda onların heç bir nicatı yoxdur. Paşinyan özü bu yolla gedir, məsələni əsaslandırır. Bu nədir, özünüzə bəraət qazandırmaq üçün ictimai rəyə oynayırsınız ki, guya konstitusiya dəyişikliyinin Azərbaycanın tələbinə heç bir dəxli yoxdur, bunu Ermənistan özü edir. Azərbaycanın tələbinə niyə dəxli yoxdur, çox yaxşı var. Özünüz deyirsiz ki, Azərbaycanla sülh istəyiriksə onun tələblərini yerinə yetirməliyik. Normal yol budur. Məsələnin əsl mahiyyətini ört-basdır etmək üçün ortaya yalandan ortaya belə bir fikir atırlar ki, guya Azərbaycan Ermənistanın daxilində vəziyyəti qarışdırmaq istəyir, tezislər ortaya atır. Azərbaycanın Ermənistanda qarışıqlıq yaratmaq istəyi ilə konstitusiya ilə bağlı təklifi irəli sürməsi barədə iddia tamamilə əsassızdır. Azərbaycan Ermənistanı qarışdırmaq istəsəydi o qədər təsir imkanları vardı ki orada vəziyyəti alt-üst etsin. Azərbaycan bunu istəmir, sabitlik istəyir, Ermənistanda da normal hakimiyyətin formalaşmasında maraqlıdır. Azərbaycan davamlı addımlar atır, mövqeyi bəllidir. Ermənistanın bunun üçün nə zaman addım atıb-atmayacağını bilmirəm. Amma məsələ belədir ki, Ermənistanın konstitusiyasının dəyişdirilməsi tələbi Azərbaycana aiddir və Ermənistan hökuməti bu tələbə uyğun olaraq konstitusiyanı dəyişməyə hazırlaşır. Çünki Ermənistanın konstitusiyası dəyişmədən sülhə nail olmaq mümkün deyil. Azərbaycanın şərtləri yerinə yetirilməlidir" - deyə A.Nağı əlavə etdi.
İradə SARIYEVA
