Rauf Zeyni: “BQXK də ermənilərin məqsədli şəkildə yaydıqları dezinformasiyaları təkzib edir”
Hərbi cinayətlər törətməkdə təqsirləndirilən 15 erməniəsilli şəxsin cinayət işi üzrə məhkəmə prosesinin keçirilməsi Ermənistanı və onun xarici havadarlarını ciddi narahat edir.
Xüsusən də, artıq məhv edilmiş cinayətkar və separatçı rejimin sabiq “dövlət naziri” Ruben Vardanyanın ədalət məhkəməsi qarşısına çıxarılması həmin qüvvələri əndişəyə salır. Bu baxımdan da, mühakimə olunan şəxslər ətrafında uydurma məlumatlar yayırlar. Ermənistan və onların havadarları indiyədək yüz yalan danışıblar ki, Vardanyanı guya təkadamlıq kamerada ac saxlayırlar, yemək vermirlər, o aclıq aksiyası keçirir və sair. Guya Vardanyan aclıq aksiyasına başlayandan bir həftə sonra vəziyyətinin “kəskin pisləşməsinə” baxmayaraq, o, məhkəməyə gəlməyə məcbur edilib. Bu dezinformasiyanın da müəllifi Vardanyanın vəkili Jared Censerdir və o, erməni mediasında yalan məlumatlar yayır, həqiqətə uyğun olmayan fikirlər səsləndirir. O, diqqəti Bakıdakı məhkəmə prosesinə yönəltmək və çirkin nioyyətlərinə nail olmaq üçün hər cür yalan-palan danışır.
Bu arada Beynəlxalq Qızıl Xaç Komitəsinin (BQXK) nümayəndələri fevral ayında Bakıda saxlanılan erməni məhbuslara yenidən baş çəkib və onların vəziyyəti, şəraiti ilə yaxından tanış olub. Ermənistan Qırmızı Xaç İdarəsinin kommunikasiya proqramlarının rəhbəri Zara Amatuni bildirib ki, məhbuslara yaxınları ilə əlaqə saxlamaq imkanı verilib. “Beynəlxalq Qızıl Xaç Komitəsinin əməkdaşları Bakıda həbsdə olan və adları Azərbaycan hakimiyyəti tərəfindən təsdiqlənən bütün ermənilərlə növbəti görüş keçirib. Standart prosedurlarımıza uyğun olaraq, məhbuslara ailə üzvləri ilə əlaqə saxlamaq imkanı verilib”, - deyə Zara Amatuni bildirib.
BQXK-nin yaydığı məlumat bir daha ermənilərin yaydıqları məlumatların yalan olduğunu təsdiqləyir. BQXK-nın nümayəndələri gedib onları yoxlayıblar və ermənilərin iddiaları öz əksini tapmayıb. Əgər komitənin nümayəndələri hansısa bir mənfi şey görsəydilər mütləq onu erməni mediası çoxdan yazardı. Amma gördüyünüz kimi, BQXK Bakıda mühakimə edilən ermənilər barədə deyilən iddiaların hamısını yalanladı.
“Mütəmadi olaraq bu məhkəmə prosesi barədə dünya ictimaiyyətini məlumatlandırmalıyıq”
Müstəqil ekspert Rauf Zeyni “Bakı-Xəbər”ə şərhində bildirdi ki, müəyyən mənbələr, erməni mediası və onları dəstəkləyənlər erməni əsilli şəxslərin Bakı məhkəməsinə kölgə salmaq və bu prosesdən yararlanmaq üçün dezinformasiya yayırlar. “Gördüyünüz kimi, BQXK də ermənilərin məqsədli şəkildə yaydıqları dezinformasiyaları təkzib edir, yalanlayır. Mühakimə olunanların, istintaqa cəlb edilənlərin məhkəmə prosesi şəffaf, beynəlxalq standartlara uyğun, ədalərli bir proses kimi davam edir. Düşünürəm ki, bundan sonra da maraqlı qüvvəllər, media subyektləri və maraqlı şəxslər bununla əlaqədar dezinformasiyalar yaya bilərlər. Yaxşıdır ki, BQXK erməni tərəfin iddialarını, yanlış bəyanatlarını yalanlayır və doğru olmadığını qeyd edir. Biz də bu məsələlərdə diqqətli olmalıyıq və mütəmadi olaraq bu məhkəmə prosesi barədə dünya ictimaiyyətini məlumatlandırmalıyıq. Bakı “Nürnberq prosesi”ndə ədalətin bərpa olunması, ədalətin təntənəsi üçün nə lazımdırsa edilməlidir ki, əvvəla, dünya ictimaiyyəti Qarabağda bu şəxslər tərəfindən törədilən dəhşətli cinayətlər haqda obyektiv, dəqiq məlumat alsın. Təbii ki, bu məhkəmə prosesi tarixdə ədalətin bərpa olunması yönündə öz xidmətlərini göstərəcək”.
R.Zeyninin fikrincə, mütəmadi olaraq dünya ictimaiyyətini bu məhkəmə prosesi ilə bağlı məlumatlandırmalıyıq ki, erməni deinformasiyası, bəzi maraqlı qüvvələrin yalanları ayaq tutub yeriməsin.
İradə SARIYEVA
