Bu gün Azərbaycanın dövlət müstəqilliyinə düşmən olan və onun ərazi bütövlüyünü şübhə altına alan fikirlər səsləndirən, 2018-ci ildə Gəncədə iğtişaşlar, terror törədən bəzi şəxslərin ölkədən qaçaraq İran İslam Respublikasına getdiyi məlumdur.
İranda sığınacaq tapan və Azərbaycan əleyhinə YouTube və başqa kanallar vasitəsi təbliğat aparan bəzi şəxslər - Tohid İbrahimbəyli, Əli Qumi, Əkrəm Hacızadə, Orxan Məmmədov və başqaları son çıxışlarında özlərini vacib “persona” saymaqda davam edirlər. İrana sığınan anti-Azərbaycan qüvvələrindən olan həmin şəxslər belə zənn ediblər ki, Azərbaycan Prezidenti İlham Əliyevin vaxtilə İran İslam Respublikasının sabiq prezidenti Həsən Ruhanidən tələb etdiyi 20 nəfər terrorçu arasında onlar da var, guya onların varlığı Azərbaycan hökumətini “qorxuya” salıb və s.
Bildiyimiz kimi, Prezident İlham Əliyev ADA Universitetində “Cənubi Qafqaz: İnkişaf və əməkdaşlıq” mövzusunda beynəlxalq konfransda çıxışı zamanı konkret şəxs adı çəkmədi.
Amma adlarını qeyd etdiyimiz və etmədiyimiz bu şəxslər daha çox farspərəst olduqlarını, molla rejimi üçün hər cür oyuna hazır olduqlarını sübut etməyə çalışırlar və anti-Azərbaycan ruhlu verilişlərinin sayını artırırlar.
“İranda bu cür şəxslərin “əzizlənərək” ortaya çıxarılması təsadüfi deyil”
İlahiyyatçı Tural İrfan “Bakı-Xəbər”ə şərhində ilk növbədə qeyd etdi ki, İran İslam Respublikası həqiqətən də uzun illərdir Azərbaycana qarşı yönələn məlum təxribatların banisi sayılır. “Bu ölkə həmişə Azərbaycana qarşı təzyiq, təhdid nümayiş etdirib, Azərbaycanın güclənməsinə süni maneələr yaradıb. İranın təkcə Azərbaycana deyil, dünyada olan başqa müsəlman dövlətlərinə qarşı da bu cür mənfi münasibəti onların heç də islam dövləti kimi səmimi olmadığını, islam dini adından sui-istifadə etdiklərini göstərir. Quranda əsla belə şeylər yoxdur ki, müsəlmanı qoyub gedib kafirin yanında durasan. Məsələnin ikinci tərəfinə gəlincə, bilirsiz ki, bunun siyasi səbəbləri var. Ortada Cənubi Azərbaycan, Azərbaycanın birləşməsi söhbəti var və sair. Digər tərəfdən də bu, türk dünyasına qarşı farsların milli düşmənçiliyinin nəticəsidir ki, bunu da faktiki olaraq özləri etiraf edirlər. Türk dünyasının birləşməməsi üçün Zəngəzur dəhlizinin reallaşmasının qarşısının alınması da buna xidmət edir. Yəni bunlar açıq-aşkar ermənilərin tərəfindədirlər. Həmçinin də İranda 1979-cu ildə inqilab baş verəndən sonra bunların məqsədlərindən biri islam inqilabını Azərbaycana ixrac etməkdi. Dünyanın başqa ölkələrində də bunu yaymaq istəyirdilər. Hətta İran-İraq müharibəsinin səbəblərindən biri də orada islam dövləti qurmaq istəkləri ilə bağlıdır. İndi də Yəməndə, Suriyada bunu etmək istəyirlər. O cümlədən də Azərbaycana qarşı bu niyyətdədirlər ki, gələcəkdə Azərbaycanda da islam dövləti quracaqlar. Bu gün sığınacaq verdikləri o terrorçulardan da öz çirkin niyyətlərini reallaşdırmaq üçün istifadə etməyi planlaşdırırlar. Tohid İbrahimbəyli, Əli Qumi, Əkrəm Hacızadə və başqaları belələrindəndir. Özü də onlar çalışırlar ki, bu adamların tərkibini etnik azlıqlardan seçirlər. Məqsədləri də odur ki, lazım gələndə etnik vəziyyəti qızışdıra bilsinlər. Bildiyim qədər, Tohid İbrahimbəyli milli mənsubiyyət baxımından talışdır, Əkrəm Hacızadənin isə erməni qarışığı olması məlumdur. Orxan Məmmədov tat millətinə məxsusdur. Şübhəsiz ki, Azərbaycanda heç zaman milli-dini ayrıseçkilik olmayıb. Hər birimiz azərbaycanlıyıq. Amma İranda bu cür şəxslərin “əzizlənərək” ortaya çıxarılması təsadüfi deyil. Hətta mən Orxan Məmmədovun dilindən dəfələrlə milli zəmində separatçılığı qızışdıran fikirlər eşitmişəm, bu onun videolarında var. Guya Azərbaycanda tatlara yaşayış üçün şərait yaradılmır, Qarabağ müharibəsində tatlar, talışlar “qabağa verilib”. Yəni bu, təbii ki, cəfəngiyyatdır. Bu adamları İran ona görə bəsləyir ki, lazım gələndə prosesləri qızışdıra bilsin. İrana sığınan həmin şəxslər birbaşa potensial terrorçudular. İlanın başını gərək əjdaha olmamış əzəsən. Gözləmək lazım deyil ki, bunlar Usamə bin Laden olsun, bunlarla bağlı vaxtında tədbir görülməlidir”.
T.İrfan qeyd etdi ki, T.İbrahimbəyli bizim gənclərimizi İran vasitəsilə yığıb Suriyaya aparıb, orada onlara təlim keçib döyüşdürüb: “Hətta onlardan biri də o vaxt gəlib Gəncədəki məlum terror aktını törətdi. Bu adamlar həmçinin Nardaranda da iğtişaşlar törətdilər. Bunlar iki qrupa bölünürlər. Bunların fəlsəfəsində belə bir şey var. Üzdə olan radikal qruplar və özünə qısılan qruplar... Cənab Prezident dediyi o məsələdə birmənalı olaraq haqlıdır. Doğrudan da İran bizə qarşı bu cür insanları yetişdirməklə Azərbaycana təzyiq göstərmək istəyir. Əslində, cənab Prezidentin sözündən onlar özləri vəlvələyə düşüblər. Cənab Prezident söhbət arası sadəcə bir ifadə işlətdi ki, Ruhaniyə müraciət etmişdik. Həmin o şəxslər özləri indi qorxuya düşüblər və təşviş içində molla təfəkkürlü verilişlərində bu məsələni müzakirə edirlər. Əslində müzakirə etməyə başqa mövzu da yoxdur. Xüsusən də Azərbaycanın 44 günlük müharibədəki qələbəsi, günü-gündən qüdrətlənməsi, Türkiyə ilə sıxlaşması İranı əməlli-başlı qarın ağrısına salıb. Bu da onların birbaşa islamın, əhli-beytin, dövlətin, millətin, insanlığın və bəşəriyyətin əleyhinə olduğunu göstərir”...
İradə SARIYEVA
