“Səudiyyə Ərəbistanı Krallığı dünyanın nadir ölkələrindəndir ki, Ermənistanla heç bir diplomatik əlaqə qurmayıb”. Bunu Prezident İlham Əliyev Səudiyyə Ərəbistanı Krallığının Baş prokuroru Şeyx Səud bin Abdullah Əl Müacibin başçılıq etdiyi nümayəndə heyətini qəbul edərkən deyib.
Dövlət başçısı ölkələrimizin müxtəlif sahələrdə uğurla əməkdaşlıq etdiyini vurğulayaraq, siyasi əlaqələrimizin yüksək səviyyədə olduğunu qeyd edib. Prezident vurğulayıb ki, Azərbaycanda Səudiyyə Ərəbistanı Krallığına xüsusi rəğbətlə yanaşılır. Çünki Səudiyyə Ərəbistanı Krallığı dünyanın nadir ölkələrindəndir ki, Ermənistanla heç bir diplomatik əlaqə qurmayıb. Bunun səbəbi isə torpaqlarımızın işğal altında olması idi. Prezident İlham Əliyev qeyd etdi ki, biz bu mövqeyi çox yüksək qiymətləndiririk. Dövlət başçısı onu da deyib ki, 44 günlük Vətən müharibəsi nəticəsində torpaqlarımızın işğaldan azad olunması erməni vəhşiliyini, azad edilmiş torpaqlarda hər şeyin, o cümlədən 67 məsciddən 65-nin ermənilər tərəfindən dağıdıldığını bütün dünyaya göstərdi.
Maraqlıdır, Səudiyyənin, necə deyərlər, burnunun dibində yerləşən Birləşmiş Ərəb Əmirliyi, Qətər, İordaniya və digərləri zaman-zaman niyə məhz bu amili nəzərə almayaraq Ermənistanla əlaqələrin qurulmasına xüsusi önəm verib və indi də verir? Adıçəkilən ölkələr Ermənistana münasibətdə niyə Səudiyyə kimi ola bilmir? Bunun səbəbi nə ilə bağlıdır?
“Bir məqamı da nəzərə almaq lazımdır ki, BƏƏ-də əhalinin böyük əksəriyyətini hindlilər təşkil edir”
Sözügedən məsələyə aydınlıq gətirən siyasi ekspert Elşad Həsənov bununla bağlı bir sıra məqamlara toxundu: “Əvvəla, Səudiyyə Ərəbistanı Krallığının işğal səbəbindən Ermənistanla diplomatik əlaqələr qurmaması təqdirəlayiqdir. Bu, digər ərəb ölkələrinə nümunə olmalıdır. Krallığın belə mövqe sərgiləməsinin səbəbi Səudiyyənin müsəlman dünyasının dini mərkəzi olması ilə bağlıdır. Nəzərə almaq lazımdır ki, bu ölkədə Azərbaycana xüsusi rəğbət var. Səudiyyəyə ərəb dünyasında böyük çəkiyə malikdir. Əhalisinin sayı 33 milyon nəfərdən çoxdur. 22 ərəb ölkəsi arasında lider mövqeyə malikdir. Digər ərəb ölkələrinin də Azərbaycanla siyasi-iqtisadi əlaqələri var. Ancaq adıçəkilən ərəb ölkələrinin işğalçı Ermənistanla əlaqələr qurmasının səbəbi orada erməni lobbisinin fəal olması ilə bağlıdır. Xüsusən də Livan, İordaniya və BƏƏ-də erməni icmaları daha fəaldır. Ancaq Səudiyyədə bu amil demək olar mövcud deyil. Bir məqamı da nəzərə almaq lazımdır ki, BƏƏ-də əhalinin böyük əksəriyyətini hindlilər təşkil edir. Ərəblərin çəkisi böyük deyil. O cümlədən, orada digər millətlərin nümayəndələri yaşayır. Əhali əsasən Dubay və Əbu-Dabi şəhərlərində yaşayır. Nəzərə almaq lazımdır ki, son illər Azərbaycanla BƏƏ arasında əlaqələr genişlənir. Bundan əlavə, son illər Azərbaycanla Qətər arasında da əlaqələr genişlənir. Bu ölkə ilə diplomatik əlaqələrimiz 1994-cü ildə qurulsa da, səfirlik 2007-ci ildə açılıb. Xüsusən də Qətərdəki səfirimiz Rəşad İsmayılovun fəaliyyətini qeyd etmək istəyirəm. Onun təşəbbüsü ilə iki ölkə arasında əlaqələrin qurulmasında bir sıra işlər görülüb. İordaniya ilə də əlaqələrimiz genişlənir. Ümumiyyətlə, İslam Əməkdaşlıq Təşkilatının üzvü olan ölkələrin əksəriyyəti Azərbaycanla hərtərəfli əlaqələrə xüsusi önəm verirlər”.
Bir sözlə, siyasi ekspert zamanla bir sıra məsələlərin yoluna düşəcəyi qənaətindədir.
Vidadi ORDAHALLI
