Ukraynada qanlı müharibənin davam etməsinə baxmayaraq, Rusiyada bu il 9 May faşizm üzərində Qələbə günü hərbi paradla qeyd olundu. Parad paytaxt Moskva ilə yanaşı, Rusiyanın bir sıra şəhərlərində də keçirildi. Ancaq ölkə hakimiyyətinin bütün səylərinə rəğmən, parad ümumən sönük atmosferdə keçirildi. Bunun başlıca səbəbi Rusiyanın Ukraynaya hücumunun dünyada yaratdığı etiraz və qarşıya qoyulan hədəflərə Moskvanın çata bilməməsi ilə əlaqədardır.
Bununla yanaşı, Rusiya hərbçiləri 9 Mayda bəzi separatçı bölgələrdə də hərbi parad təşkil etdilər. Məsələn, separatçı Cənubi Osetiyada, Dnesteryanı bölgələrdə hərbi parad və buna bənzər keçidlər təşkil olundu. Diqqəti çəkən məqam odur ki, bu dəfə Qarabağdakı rus sülhməramlıları 9 Mayla əlaqədar xüsusi təntənəli keçid, tədbir keçirmədilər. Xüsusən mayın 9-da Qarabağdakı sülhməramlıların timsalında bu baş vermədi. Hansı ki, ötən ilin mayın 9-da Xocalıda sülhməramlılar bununla bağı xüsusi tədbir keçirdi. Erməni mediası bundan təbliğat məqsədi üçün gen-bol istifadə etdi. O vaxt Rusiyanın bu addımı Azərbaycanda birmənalı qarşılanmadı. Bununla bağlı ciddi tənqidi fikirlər səsləndi.
Maraqlıdır, rus sülhməramlılarının bu dəfə Qarabağda mayın 9-da parad keçirməməsi nə ilə bağlıdır?
“O üzdən, bu dəfə sülhməramlılar qıcıqlandırıcı xarakterli tədbir keçirməyiblər”
Məsələyə münasibət bildirən hərbi ekspert Ramil Məmmədlinin fikrincə, bu, bir sıra amillərlə bağlı ola bilər: “Bunun başlıca səbəbi odur ki, Rusiya bir il əvvəlki dövlət deyil. Ukraynaya hücumla əlaqədar Rusiya geosiyasi təcridlə üzləşib. Qərb ölkələri bir sıra güclü sanksiyalar qəbul edib və edir. Hava məkanlarını Rusiyanın üzünə bağlayıblar. Dəniz limanlarına Rusiya gəmiləri buraxılmır və s. Müharibə ilə əlaqədar Ukraynaya hərbi yardımlar davam edir. Azərbaycan az sayda ölkələrdəndir ki, Rusiyaya qarşı sanksiyalarda, beynəlxalq qurumlarda aparılan müzakirələrdə iştirak etmir. Üstəlik, Türkiyə də Rusiyaya qarşı sanksiyalara qoşulmayıb. Belə bir vəziyyətdə sülhməramlılar hansısa tədbir keçirib Azərbaycanı Rusiyadan incik salmaq istəməyib. Zatən Qarabağdakı sülhməramlıların fəaliyyəti ilə bağlı çoxsaylı suallar var. Dəfələrlə Azərbaycan sülhməramlıların neqativ fəaliyyəti ilə bağlı öz iradlarını qarşı tərəfə bildirib. O üzdən, Rusiya indiki vəziyyətdə Azərbaycanda narazılıqla qarşılanacaq addımlar atmaq istəmir. Onsuz da ictimai rəydə Rusiyanın Qarabağ siyasəti ilə bağlı narazılıq var. O da ondan ibarətdir ki, cəmiyyət Rusiyanın Qarabağ məsələsinin birdəfəlik həllində maraqlı olmadığının fərqindədir. Erməni separatçılarına dəstək xarakterli hansısa addım Azərbaycanda Rusiya əleyhinə antipatiyanı daha da gücləndirə bilər. Bütün bunlardan çıxış edərək hesab edirəm ki, bu dəfə sülhməramlılar qıcıqlandırıcı xarakterli tədbir keçirməyiblər”.
Bununla belə, hərbi ekspert hesab edir ki, Rusiyaya arxayın olmaq olmaz.
Vidadi ORDAHALLI
