“Şuşa ili”nin ilk böyük tədbiri "Xarıbülbül" Beynəlxalq Folklor Festivalının keçiriləcəyi tarix dəqiqləşib. Mədəniyyət Nazirliyindən Milli.Az-a bildirilib ki, festivalın 12-14 may tarixində keçirilməsi nəzərdə tutulur.
Tədbir Mədəniyyət Nazirliyi, Heydər Əliyev Fondu və Şuşa Şəhər Dövlət Qoruğu İdarəsinin təşkilatçılığı ilə baş tutacaq.
Xatırladaq ki, 2021-ci il mayın 12-i və 13-də Şuşa işğaldan azad olunandan sonra ilk dəfə "Xarıbülbül" festivalı keçirilib.
Danılmaz faktdır ki, Şuşa işğaldan azad olunduqdan dərhal sonra mədəniyyət paytaxtımızda sürətli quruculuq-bərpa işlərinə start verilib, bütün sahələr üzrə kompleks layihələr həyata keçirilib. Azərbaycanın mədəniyyət paytaxtı elan edilən Şuşada bu gün şəhərin əsl tarixi simasının bərpası yönündə nəhəng layihələr gerçəkləşdirilir. 32 ildən sonra Şuşada, Cıdır düzündə fond tərəfindən təşkil olunan "Xarıbülbül" Musiqi Festivalı və digər layihələrin keçirilməsi Azərbaycan xalqının mənəvi, tarixi, mədəni irsinin dünyada tanıdılmasına, qorunaraq gələcək nəsillərə ötürülməsinə misilsiz töhfədir.
Qeyd etdiyimiz kimi, festivalın 2022-ci il 12-14 may tarixlərində Azərbaycanın mədəniyyət paytaxtı olan Şuşa şəhərində keçirilməsi nəzərdə tutulub.
Məlumat üçün bildirək ki, ilk dəfə 1989-cu ildə keçirilmiş və Seyid Şuşinskinin 100 illik yubileyinə həsr edilmiş festival II Qarabağ müharibəsində qazanılmış parlaq zəfər nəticəsində 30 illik fasilədən sonra 2021-ci ilin 12-13 may tarixlərində Şuşada Cıdır düzündə Heydər Əliyev Fondunun təşkilatçılığı ilə yenidən keçirilib.
Sayca beşinci festivalda 10 ölkədən müxtəlif folklor üslublarında çıxış edən musiqiçilərin, rəqs kollektivlərinin, həmçinin Azərbaycanın müxtəlif regionlarından folklor kollektivlərinin iştirakı nəzərdə tutulur.
Musa Qasımlı: “Şuşada keçiriləcək “Xarı bülbül” festivalı öz əhəmiyyətinin miqyasına görə Azərbaycan sərhədlərini aşır, regiona və dünyaya böyük mesajlar verir”
Şuşada keçiriləcək “Xarı Bülbül” festivalının əhəmiyyəti haqqında danışan millət vəkili, professor Musa Qasımlı “Bakı-Xəbər”ə açıqlamasında qeyd etdi ki, Şuşada keçiriləcək “Xarı bülbül” festivalı öz əhəmiyyətinin miqyasına görə Azərbaycan sərhədlərini aşır, regiona və dünyaya böyük mesajlar verir: “İlk dəfə keçirilən festivalda Azərbaycanda yaşayan bütün etnik qrupların kültürü təmsil olundu. Bu o anlama gəlir ki, ölkəmizdə bütün vətəndaşlara etnik kökündən asılı olmayaraq hər kəsə bərabər münasibət bəslənilir. Bu il keçiriləcək festivalda isə dünyanın müxtəlif ölkələrindən qruplar gələcək. Bununla bütün dünya bir daha anlayacaq ki, Şuşa bütün dünya xalqlarının mədəniyyətini birləşdirən bir məkandır. Bu səbəbdən də cənab Prezident İlham Əliyevin məlum ideyasının çox böyük tarixi əhəmiyyəti olacaq”.
Fatimə Hacıbəyli: “Şuşada Cıdır düzündə “Xarıbülbül” musiqi festivalının keçirilməsi olduqca mühüm tarixi hadisədir”
“Vəfa” Sosial Problemlərə Dəstək İctimai Birliyinin rəhbəri Fatimə Hacıbəyli qeyd etdi ki, 30 illik fasilədən sonra Şuşada keçirilən “Xarıbülbül” musiqi festivalının bir çox aspektlər üzrə böyük əhəmiyyəti var: “44 günlük Vətən müharibəsindən az sonra Şuşada belə bir festivalın təşkili və Şuşanın mədəniyyət paytaxtı elan edilməsi ilə dünyaya bir sıra mesajlar verdi. Dünya başa düşür ki, Şuşanın əsl sakinləri bizik. Biz Ali Baş Komandanımız İlham Əliyevin rəhbərliyi altında uğurlu hərbi əməliyyatlar keçirərək torpaqlarımızı erməni işğalçılarından təmizlədik. Bunun üçün biz qəhrəman hərbçilərimizə, Azərbaycan xalqına borcluyuq. İndi isə Qarabağda vaxtı ilə mövcud olmuş ənənələrimizi bərpa edirik. İndi Şuşada çox böyük quruculuq işləri aparılır. Bütün bunlar dünyanın anlayan kəsimi üçün mühüm mesajdır”.
Həmsöhbətimiz onu da əlavə etdi ki, artıq dünya Azərbaycanın mədəniyyət paytaxtının öz sahiblərinə qaytarıldıqdan sonra necə möhtəşəm şəkildə dəyişildiyini görür. Azərbaycan bu torpaqlara yenidən həyat qaytarır, dağıdılmış şəhərlərə ruh və can verir: “Ulu Öndər Heydər Əliyev Azərbaycanın qədim mədəniyyət mərkəzi olan Şuşa şəhərinə böyük qayğı göstərərək onun inkişafına çalışırdı. Ulu Öndər Şuşaya adi bir şəhər deyil, zəngin tarixi abidə, Azərbaycan xalqının qəhrəmanlıq rəmzi kimi baxırdı. 1970-ci illərin ikinci yarısında Heydər Əliyevin bilavasitə təşəbbüsü və rəhbərliyi ilə Şuşanın inkişafı məqsədilə bir neçə xüsusi qərar qəbul edildi. Ümummilli Lider Heydər Əliyev Şuşanın Azərbaycan üçün müstəsna əhəmiyyətini yüksək qiymətləndirərək bildirmişdi ki, Şuşasız Qarabağ, Qarabağsız isə Azərbaycan yoxdur. Heydər Əliyevin siyasi kursunu uğurla davam etdirərək Azərbaycanın milli və dövlətçilik maraqlarını daim uca tutan Prezident İlham Əliyev də Vətən savaşı zamanı müsahibələrinin birində “Şuşasız bizim işimiz yarımçıq olar” demişdi. Prezident İlham Əliyev bu vədini də yerinə yetirdi. Və xalqımızın tarixində, mədəniyyətində, qəlbində xüsusi yeri olan, Qarabağın tacı sayılan Şuşa şəhərini Şanlı Azərbaycan Ordusunun rəşadəti sayəsində 28 ildən sonra yenidən öz doğmalarına qovuşdurdu.
Qarabağın incisi, Azərbaycanın mədəniyyət beşiyi olan Şuşa ölkəmizin qədim tarixini özündə yaşadır. Bu şəhər milli mədəniyyətimizin mərkəzi, poeziyamızın və musiqimizin beşiyidir. Əbəs yerə Şuşanı Qarabağın döyünən qəlbi adlandırmırlar. Şuşanın bərpası, dirçəldilməsi, tarixi simasının qaytarılması Qarabağın döyünən ürəyinin, regionun mədəniyyət mərkəzinin yenidən dirçəldilməsi deməkdir. Bu həm də milli qürurumuzun, mənliyimizin, mədəniyyətimizin, incəsənətimizin, tariximizin bərpa edilməsi, yenidən yüksəliş mərhələsinə daxil olmasıdır. Bu mənada, Şuşada Cıdır düzündə “Xarıbülbül” musiqi festivalının keçirilməsi olduqca mühüm tarixi hadisədir”.
Günel CƏLİLOVA
