Müşahidələr göstərir ki, hətta Rusiyanın özündə də Vladimir Putinin aqressiv siyasətinə, Ukraynada apardığı müharibəyə qarşı etirazlar səslənir. Halbuki, ölkədə bütün media nəzarət altındadır, amma bu belə, tənqidlərin qarşısını ala bilmir.
Bu arada Rusiyanın “Lenta.ru” nəşri Rusiya prezidenti və Ukraynaya qarşı müharibəni tənqid edən kəskin başlıqlarla məqalələr dərc edib. 9 May paradı ilə bağlı qeyd edilir ki, “tamaşa” müharibənin əleyhdarlarını “fikirlərindən asılı olmayaraq” birləşdirmək məqsədi daşıyır. Adıçəkilən saytda eyni gündə prezident Vladimir Putini və Ukraynaya qarşı müharibəni tənqid edən 10-dan çox məqalə dərc edilib. Özü də kəskin başlıqlarla: "Putin XXI əsrin qanlı müharibələrindən birini başlatdı", "Zelenski Putindən daha soyuqqanlı çıxdı", "Rusiya elitası əhəmiyyətsiz dərəcədə zəif iradəli oldu", "Vladimir Putin - miskin diktator və paranoik”, “Rusiya bütün dünyanı məhv etməklə hədələyir” və s.
Onu da qeyd edək ki, “Lenta.ru”nun baş redaktoru Qalina Timçenkonun rəhbərlik etdiyi bütün redaksiya heyəti 2014-cü ildə Krımın ilhaqı və Ukraynanın şərqindəki hərbi əməliyyatlar fonunda istefa verdi. O vaxtdan sayt Rusiyaa populyar resurs olaraq qaldı.
Yeri gəlmişkən onu da qeyd edək ki, bundan əvvəl mart ayında hakimiyyətin nəzarətində olan Birinci Kanalın əməkdaşı müharibə əleyhinə çıxış edib. Belə ki, Marina Ovsyannikova “Vremya” verilişində canlı yayımda aparıcının arxasına müharibə əleyhinə posterlə çıxdı.
Bütün bunlar onu göstərir ki, Rusiya daxilində artıq parçalanmalar başlayıb. Mətbuatın sərt formada nəzarətdə saxlanılması belə, bu baxımdan nəyəsə yaramır.
“Ciddi mətbuat nümayəndələri bütün çətinlikləri, məhrumiyyətləri gözə alaraq müharibəyə, Putinin idarəçiliyinə etiraz edir”
Məsələyə münasibət bildirən media eksperti Yadigar Məmmədli hesab edir ki, Rusiyada media resurslarının dövlət nəzarətində olması belə, artıq nəyəsə yaramır: “Çünki ortada ciddi uğursuzluq var və bunu gizlətmək mümkün deyil. Bu səbəbdən, nə qədər sərt rejim mövcud olsa da, parçalanma qaçılmazdır. Məsələ ondadır ki, 76 gündür Rusiyanın Ukraynaya təcavüzü davam edir. Ancaq Kreml qarşısına qoyduğu məqsədlərə çata bilmir. Putin fevralın 24 də bunu “xüsusi əməliyyat” adlandırsa da, əslində bu, miqyasına görə əsl dağıdıcı müharibədir. Yəni Rusiya rəhbərliyi bununla əsl məqsədlərini gizlədə bilmədi. Üstəlik, ukraynalılar slavyan xalqı olduğu üçün bu ölkəyə hücum heç cür əsaslandırıla bilməz. Rusiya cəmiyyəti az da olsa bunun fərqinə varır. Baxmayaraq ki, ölkədəki bütün informasiya vasitələri cəmiyyətin beynini yumaqla məşğuldur. Ancaq həqiqəti söyləyənlər hər zaman olub. Putin hakimiyyətə gələndən sonra zamanla çoxsaylı müstəqil media vasitələrinin fəaliyyəti dayandırıldı, hökumətin nəzarətinə keçdi və s. Ancaq nəzərə almalıyıq ki, internet əsrində yaşayırıq. Rus cəmiyyəti daim mütaliə ilə məşğul olduğu üçün alternativ media vasitələrindən informasiya əldə edir. Söhbət dünya media reasurslarından gedir. Belə olan halda davamlı şəkildə cəmiyyəti aldatmaq mümkün deyil. Nə qədər sərt rejim olsa da artıq buna etiraz edənlər var. Rusiya hakimiyyəti nə qədər çalışsa da, budəfəki parad sönük atmosferdə keçdi. Ciddi mətbuat nümayəndələri bütün çətinlikləri, məhrumiyyətləri gözə alaraq müharibəyə, Putinin idarəçiliyinə etiraz edir. “Lenta.ru” nəşrində dərc olunan məqalə buna əyani sübutdur. Müharibə uzandıqca, Rusiyada parçalanma dərinləşəcək”.
Bir sözlə, media eksperti hesab edir ki, proseslərin qarşısını almaq mümkün olmayacaq.
Vidadi ORDAHALLI
