Yaxın tezlikdə postsovet məkanında daha bir qanlı savaş başlayacağına dair xəbərdarlıqların sayı artır. Bunu şərtləndirən səbəb həm də elə Ukrayna olaylarıdır. Məlumatlara əsasən, Rusiya Ukraynanı qərb cəbhəsində sıxışdırmaq üçün Moldovada da hərbi əməliyyatlar keçirmək niyyətindədir.
Ukraynanın “Kanal 24” telekanalı əks-kəşfiyyat mənbələrinə əsasən bildirir ki, Rusiya Moldovanı işğal etmək üçün müfəssəl plan hazırlayıb. Bildirilib ki, Rusiya mayın 9-dək və ya həmin gün Dnestryanı ərazinin müstəqilliyini tanıya bilər: “Bu, ikinci cəbhənin açılması ilə nəticələnəcək. İkinci cəbhənin açılması strateji əhəmiyyət kəsb edir, çünki o, Ukrayna Silahlı Qüvvələrinin canlı qüvvə və texnikasını sıxışdıracaq. Üstəlik, əks-kəşfiyyat rəsmiləri Rusiya qoşunlarının bu regionda olmasının Balkanlarda siyasi vəziyyəti pozacağını deyir”. Ukrayna əks-kəşfiyyatçılarının məlumatına görə, Rusiya Dnestryanıda İl-76 təyyarələri və helikopterləri ilə havadan eniş həyata keçirməyi planlaşdırır. Britaniyanın “The Times” nəşri də bu günlərdə analoji məzmunda məlumat yayıb. Bildirilir ki, Rusiya Moldovaya hücum etmək qərarına gəlib və Kreml artıq hücum üçün aydın planlar hazırlayıb. Nəşrin məlumatına görə, bu həqiqətən də baş verərsə, o zaman Kreml Donbasla bağlı ssenarini təkrarlaya bilər. Qəzetə danışan mənbə bildirib: “Biz Kremlin artıq Moldovaya hücum etmək qərarına gəldiyinə inanırıq. Moldovanın taleyi çox vacibdir. Əgər ruslar nəzarəti ələ almağa başlasa, biz hərbi baxımdan asan hədəfə çevriləcəyik və Ukrayna üçün təhlükə mövcud olacaq. Rusiya Dnestryanı bölgəsinin müstəqilliyini tanıyarsa, bu, Moldovanın ərazi bütövlüyünün pozulması olacaq. Bu, “Donbas ssenarisi”nin təkrarı olacaq”. Kəşfiyyat məlumatlarına əsasən bildirilir ki, artıq Kremlin hücum planlarına işarə edən bir sıra göstəricilər var. Nəşr onu da bildirir ki, Rusiya Federasiyası Moldovanı ələ keçirsə, o zaman onlar Odessaya doğru gedərək qərb tərəfdən Ukrayna ərazisinə girməyə cəhd edəcək. Böyük Britaniyanın müdafiə naziri Ben Uolles də bunlar fonunda etiraf edir ki, Rusiya müharibəni Ukraynadan kənara da çıxara bilər: “Putin çarəsiz halda müharibəni Moldovanın Dnestryanı bölgəsinə qədər genişləndirməyə çalışır. Biz Dnestryanıdakı hücumların təfərrüatını və onların arxasında kimin dayandığını hələ bilmirik. Lakin bu Rusiyadırsa, deməli o, strateji səhv edib”.
Qeyd edək ki, aprelin 25 və 26-da Moldova respublikasının separatçı regionu olan Dnestryanının ərazisində üç terror aktının törədildiyi barədə məlumat yayılıb. Bildirilib ki, Mayak yaşayış məntəqəsində Dnestryanı radio-televiziya mərkəzinin iki antennası partladılıb, Dövlət Təhlükəsizlik Nazirliyinin binası əl qumbaraatanlarından atəşə tutulub, Tiraspoldakı hərbi aerodromun ərazisində də partlayışlar baş verib. Moldova prezidenti Maya Sandu isə terror hücumlarında Dnestryanı daxilində sabitliyi pozmaqda maraqlı olan qüvvələri günahlandırıb: "Moldova hakimiyyəti Dnestryanı bölgədəki terror hücumunun məsuliyyətini tanınmayan “respublika”dakı daxili siyasi qüvvələrin üzərinə qoyur. Regionda sabitliyi pozmaqda maraqlı olan müxtəlif qüvvələr arasındakı münasibət gərginlik yaradıb. Bu, Dnestryanı bölgənin zəifləməsinə və Moldova Respublikası üçün risqlərin yaranmasına səbəb olur. Biz sülhü təhlükə altına alan bütün təxribatları və Moldovanın fəaliyyətə cəlb olunması üçün cəhdləri mühakimə edirik”. Sandu Dnestryanı probleminin Moldovanın ərazi bütövlüyü əsasında dinc yolla həllinin tərəfdarı olduğunu xatırladıb. O, dövlət müəssisələrinin təhlükəsizliyinin gücləndirildiyini və hazırlıq səviyyəsinin artırıldığını deyib. Ukrayna Prezident Ofisi rəhbərinin müşaviri Aleksey Arestoviç isə bunlar fonunda qeyd edir ki, Ukrayna Silahlı Qüvvələri, Moldova müraciət edəcəyi təqdirdə, Dnestryanı ərazisini nəzarət altına ala bilər. Ukrayna Prezident Ofisi rəhbərinin müşaviri Mixaylo Podolyak isə qeyd edir: “Rusiya Dnestryanı regionda sabitliyi pozmaq istəyir. Rusiya işarə edir ki, Moldova “qonaqları” gözləməlidir. Ukrayna sabah uduzsa, Rusiya qoşunları Kişinyovun qapılarında olacaq. Amma Ukrayna bölgənin strateji təhlükəsizliyini mütləq təmin edəcək. Bunun üçün isə həmrəylik lazımdır”. “Ukrayna prizması” analitik mərkəzinin icraçı direktorunun müavini Sergey Gerasimçuk isə vurğulayır ki, Moldova üçün Rusiyanın işğal etdiyi regiondan - Dnestryanıdan təhlükə var, təcavüzkarın dəstəyi ilə Kişinyov ələ keçirilə bilər. O xatırladıb ki, Rusiya tərəfindən işğal edildiyi üçün Moldova Dnestryanıya nəzarət etmir: “Hərbi əməliyyat olarsa, Dnestryanıdan hücum ola bilər. Rusiyanın orada saxladığı qüvvələr və əlavə olaraq Dnestryanıdakı qanunsuz silahlı birləşmələr Moldova üçün ciddi problem yaradır. Məsələn, moldovalı həmkarlarım deyir ki, Kişinyovun müdafiəsi iki saatdan çox olmayacaq - bu, qoşunların Dnestryanı ilə inzibati sərhəddən Kişinyova çatması üçün lazım olan vaxtdır”. Dnestryanı bölgədə baş verənlərdən narahat olan Avropa İttifaqı Moldovaya əlavə hərbi yardım göndərir. Avropa İttifaqı Şurasının rəhbəri Şarl Mişel bu xüsusda bildirib: “Biz bunun üçün imkanlarımızı nəzərdən keçiririk. Həmçinin tanınmamış Dnestryanı bölgədə gərginliyin qarşısını almalıyıq. Bu çox vacibdir”.
Nahid SALAYEV
