Qarabağdakı separatçılar durub-dayanmaq istəmirlər, əllərinə keçən hər bir fürsətdən təxribat məqsədilə istifadə edirlər. Bu gün də qanunsuz əməllərini davam etdirən erməni separatçılarının başçısı Araik Arutunyan Ermənistandan gələn ziyalılarla görüşdə “Qarabağda 17 yeraltı istehkam tikirik” - deyib.
Azərbaycan mediası “Hraparak” qəzetinə istinadən xəbər verir ki, A.Artunyan “2-ci Qarabağ savaşından əvvəl yeraltı istehkamlar, bunkerlər tikmək qərarına gəldik, çünki müharibənin qaçılmaz olduğunu bilirdik. Düşmənin hücumu zamanı güclü müdafiəni təmin edəcək 100 belə müdafiə strukturunun tikilməsi nəzərdə tutulmuşdu. Onlardan 17-nin tikintisinə artıq başlanılıb, birində isə işlər başa çatmaq üzrədir. Bu bunkerdən müharibə zamanı da istifadə olunub. 44 gün ərzində bu mövqedə heç bir itki olmayıb” - deyə separatçıbaşı sərsəmləyib.
Araik Arutunyan iddia edib ki, əgər müharibə altı ay sonra başlasaydı, bu yeraltı istehkamlar tikiləcəkdi və qurbanların sayı az olacaqdı, çünki sentyabrın 28-də artıq bütün tikinti işləri dayandırıldı: “Şənbə cümədən tez gəldi”.
Ekspertlər qeyd edirlər ki, separatçıbaşının yeni istehkamlar haqda danışması müharibə ab-havasından xəbər verir, amma bu davranışları orada onların sonunu yaxınlaşdırır. Ekspertlərin sözlərinə görə, son dövrlər Rusiyanın separatçılara dəstək verməsi Araiki və onun quldur dəstəsini həvəsləndirib, amma bu həvəslənmə boşunadır. Araikin iddiasının, xəstə təxəyyülünün heç zaman gerçəkləşməyəcəyini deyən ekspertlərin fikrincə, çox az vaxtdan sonra o bu hərəkətlərinin cəzasını çəkəcək.
Tərlan Eyvazov: “Separatçılar öz varlıqlarını “sübut etmək” istəyirlər”
Hərbi ekspert Tərlan Eyvazov bizimlə söhbətində bildirdi ki, separatçıların niyyəti bəllidir: “Bu məsələnin bitdiyini düşünənlərə həmişə “siz erməniləri yaxşı tanımırsız” demişəm. Həm Ermənistandakı revanşistlər, həm də Rusiya bu problemin həllində maraqlı deyil. Separatçılar öz varlıqlarını “sübut etmək” istəyirlər. Ona görə də nə qədər ki orada o qondarma qurum var, belə sürprizlərlə həmişə qarşılaşacağıq. Yalnız bu faşist qurum ləğv olunduqdan, separatçılar məhv edildikdən və ordakı insanlar bunların əlindən qurtulub normal seçiklər keçirib, Azərbaycanın tərkibində yaşamağa razılıq verdikdən sonra buna son qoyulacaq. Qarabağdakı sadə ermənilər xunta, separatçı “rejimin” əlindən xilas olub Azərbaycan vətəndaşı kimi yaşamaq istəyir. Separatçılar isə yenə də öz məkrli niyyətlərini davam etdirdiklərini və bunun üçün də güc aldıqları ünvanların olduğunu ortaya qoyurlar”.
Akif Nağı: “Araikin orada 17 istehkam tikdiklərinə dair dedikləri blef xarakteri daşıyır”
Qarabağ Azadlıq Təşkilatının (QAT) sədri Akif Nağı bizimlə söhbətində bildirdi ki, Qarabağın ermənilər yaşayan hissəsində müxtəlif hadisələr cərəyan edir və oradakı separatşı “quruma” himayədarlıq edənlər, onlara ümid verənlər var. “Onlara Qərbdən də, Rusiyadan da müəyyən dairələr ümid verir. İstər Rusiya, istər ABŞ, istərsə də Fransa öz maraqlarını düşünərək orada özləri üçün əl yeri saxlayırlar. Burada Rusiyanın da məkrli planları var, ABŞ-ın da müəyyən maraqları yox deyil. Bunu bilməliyik və nəzərdə saxlamalıyıq. Özünüz də izləyirsiz ki, son zamanlar diplomatik müstəvidə ciddi fəallaşma hiss olunur. ABŞ-ın regiona bu qədər diqqət ayırdığı son 20 ildə olmamaşdı. İndi dövlət katibi səviyyəsində müəyyən açıqlamalar verilir, Ermənistanın xarici işlər naziri ora dəvət olunur görüşlər keçirilir. Həm dövlət katibi, həm də digər rəsmi şəxslərlə görüşülür, müəyyən məsələlər müzakirə olunur.
Ola bilsin ki, onlar o quldur dəstənin əli ilə özlərinin hansısa məkrli niyyətlərini həyata keçirmək istəyir. Bəlkə Rusiya Cənubi Osetiya, Abxaziya, Krım planlarına uyğun planları da var. Biz bunların hamısını nəzərə almalıyıq. Çünki İkinci Qarabağ Müharibəsindən sonra separatçıların orada özlərini saxlaması öz güclərinə deyil. Siz də bilirsiz ki, İrəvanla Xankəndi arasında qarşıdurma olduğu barədə görüntü yaradırlar. Bu məsələlərdə İrəvan məsuliyyəti Xankəndinin üzərinə atır, guya onların “müstəqil qərar” qəbul etdiklərini diqqətə çatdırmaq istəyir. Amma orada məsələlər Ermənistandan idarə olur. Bütün tapşırıqlar rəsmi İrəvandan gəlir, yoxsa separatçılar orada heç nəyi özbaşlarına etmirlər. Əgər ona göstəriş gəlməsəydi Araik Artunyan özbaşına heç nə edə bilməzdi, heç buna onun qüvvəsi də yoxdur. Araikin orada 17 istehkam tikdiklərinə dair dedikləri blef xarakteri daşıyır.
Guya separatçılar orada hansısa istehkamlar qururlar, hansısa hazırlıq, müdafiə işləri aparırlar. Çox böyük ehtimalla, orada heç bir ciddi iş gedə bilməz, getsə də bu onların öz gücü hesabına ola bilməz. Yəni Rusiya sülhməramlıları özləri orada bu işləri həyata keçirə bilərlər. Orada separatçıların özlərinin öz güclərinə hansısa istehkamlar tikməsi mümkün deyil. Bunu sülhməramlıların öz niyyətlərini həyata keçirmək üçün edə bilərlər. Yəni bunu onlar edə bilər, Araik yox. Araikin heç bir imkanı yoxdur...”
A.Nağının sözlərinə görə, Ermənistan seçim qarşısındadır, ya Qarabağla bağlı əvvəlki avatüranı davam etdirəcəklər, ya da düzgün yol tutub yollarına davam etəcəklər. “Onlar başa düşməlidirlər ki, Azərbaycan ordusunun qarşısında onların məşhur “Ohanyan istehkamları” heç dayana bilmədi. İndi qurduqları nə ola bilər ki, o dayansın. Heç hərbi baxımdan da əldə edəcəkləri bir şey yoxdur. Çünki bütün strateji yüksəkliklər də Azərbaycan ordusunun ixtiyarındadır” - deyə müsahibimiz bildirdi.
İradə SARIYEVA
