Ermənistan parlamentində “Hayastan” fraksiyasının deputatı Armen Rüstəmyan Baş nazir Nikol Paşinyanın istefasını tələb edən bəyanatı oxuyub. Paşinyan müxalifətçi deputatın bəyanatda səsləndirdiyi ittihamlara cavab verib. Ermənistan baş naziri deyib:
“İcazə verin, bəyanatınıza bənd-bənd istinad edim. Serj Sarkisyan danışıqlar prosesini iflasa uğratdı, o, 2018-ci il aprelin 17-də parlamentin tribunasında verdiyi açıqlamada etiraf edib ki, danışıqlar prosesi nikbinlik yaratmır, proses dayanıb, çünki Azərbaycanın tələbləri bizim üçün qəbuledilməzdir. Yəni Serj Sarkisyan bu tribunadan gələcək müharibənin anonsunu verdi.
2020-ci il sentyabrın 27-də mən Milli Məclisin tribunasından dedim ki, müharibəni indi dayandıra bilərəm, ancaq bir şərtlə ki, Dağlıq Qarabağın “Dağlıq Qarabağ Respublikası”na bənzər bir statusa malik olması şərti ilə, yəni Azərbaycanın tərkibində. Bunu Serj Sarkisyanın irəli sürdüyü məntiqlə birləşdirsək, məlum olacaq ki, müharibənin qarşısını almaq üçün Azərbaycanın qəbuledilməz tələblərini qəbul etmək lazım idi”.
Baş nazirə cavabında Rüstəmyan bildirib ki, Paşinyan danışıqlar prosesini bilmir.
Nikol Paşinyan ona belə cavab verib: “Mən indi çox vacib və açıq bir söz deyəcəyəm”.
Baş nazirin açıqlamasından sonra müxalifət nümayəndələri onu dinləmək istəmədiklərini qeyd edərək iclas zalını tərk ediblər.
Buna cavab olaraq Paşinyan bildirib: “Açıq danışacağam, deyən kimi qaçdılar. Eşitmək istəmirsiniz, deyin ki, eşitmək istəmirik, necə ki, həmişə qaçmısınız, yenə də qaçacaqsınız. Mən ifşa olunacaqlarını deyən kimi qaçdılar”.
Paşinyan bununla Sarkisyanın ona qədər Qarabağı verməyə razı olduğunu bildirmək istəyirmi?
Politoloq Yeganə Hacıyeva “Bakı-Xəbər”ə açıqlamasında bildirdi ki, Nikol Paşinyan müharibədən sonrakı dönəmdə Ermənistanın düçar olduğu biabırçı məğlubiyyətdəki rolunu öz üzərindən atmaq istəyib: “Biz bunu, hətta müharibənin getdiyi dönəmdə də hiss etdik. O demək istəyir ki, nə müharibənin başlanması, nə də oradakı məğlubiyyətdə bunun rolu olub. Bununla məğlubiyyətin əvvəlki hakimiyyətlərdən ona miras qaldığını təbliğ edir. 44 günlük müharibədən sonra cəmiyyət məğlubiyyətdə əsasən Paşinyanı təqsirkar bilirdi. Ancaq sonra müharibənin başlanmasında onu günahkar saydılar. Belə fikirlər səsləndi ki, onsuz da bu nəticəni Ermənistan danışıqlar yolu ilə də həll edə bilərdi. Hətta Paşinyanın özü də bənzər fikir işlədib və bu yöndə olan açıqlamasına görə onunla bağlı prokurorluqda cinayət işi də açıblar. Ancaq müharibənin əsl təşəbbüskarı elə Paşinyan oldu. Onun verdiyi məsuliyyətsiz bəyanatlar və Tovuz üzərindən başladığı təxribat nəticəsində Azərbaycanın Polad Həşimov kimi generalının öldürülməsi müharibənin başlanmasında başlıca rolu oynadı. O elə bilirdi ki, Azərbaycan belə genişmiqyaslı cavab verməyəcək. Serj Sarkisyanın dönəmində Yenilənmiş Madrid Prinsipləri adll sənəd gündəmdə olub. Orada söhbət Azərbaycanın tərkibində Qarabağa verilə biləcək yüksək muxtariyyətdən gedirdi. Bu anlamda Paşinyan haqlıdır. Hətta qaniçən Köçəryan belə bu prinsiplə bağlı razılıqlarını ifadə edib. Ancaq Paşinyan hakimiyyətə gələndən sonra dəfələrlə təxribatlara əl atdı. Yəni sülhün bərqərar olması istiqamətində heç bir addım atmadı. Bu da müharibəyə səbəb oldu. Post-müharibə dönəmində də biz bənzər davranış görürük. Belə getsə, Paşinyanın başçılıq etdiyi Etmənistan ikinci dəfə dəmir yumruğu dadmalı olacaq”.
Məhəmmədəli QƏRİBLİ
