“Azad edilmiş bütün torpaqlarda görüləcək bütün işlər ancaq baş planlar əsasında olmalıdır. Baş plandan kənar bir dənə də daş daş üstə qoyulmamalıdır, bir dənə də qanunsuz tikili olmamalıdır”. Bunu Prezident İlham Əliyev Vahid Hacıyevi Prezidentin Şərqi Zəngəzur iqtisadi rayonuna daxil olan Zəngilan rayonunda xüsusi nümayəndəsi təyin olunması ilə əlaqədar videoformatda qəbul edərkən çıxışı zamanı deyib.
Dövlət başçısı qeyd edib ki, azad edilən kəndlər planlı əkildə bərpa ediləcək: “Biz bu prosesi də mərhələlərə böldük. Birinci mərhələdə hansı kəndlər qurulacaq, ikinci mərhələdə və sair. Əlbəttə, kəndlərin qurulması da planlı şəkildə aparılmalıdır. Yəni, kortəbii yox, sistemli şəkildə. Ona görə hər bir yeni yaradılacaq, bərpa ediləcək kəndin baş planı olmalıdır və baş planlar hazırda hazırlanır. Necə ki, şəhərlərin baş planları, o cümlədən Zəngilan şəhərinin, eləcə də kəndlərin baş planları hazırlanacaq. Azad edilmiş bütün torpaqlarda görüləcək bütün işlər ancaq baş planlar əsasında olmalıdır. Baş plandan kənar bir dənə də daş daş üstə qoyulmamalıdır, bir dənə də qanunsuz tikili olmamalıdır. Yəni, biz nümunəvi bir yaşayış məkanını yaradırıq. Həm Azərbaycan üçün, həm dünya üçün nümunəvi bir təcrübə sahibi olacağıq”.
Görünən odur ki, azad olunan ərazilərdə hər şey sıfırdan başladığı üçün, qanunsuz, plandankənar tikililərə imkan verilməyəcək. Üstəlik, sözügedən məsələlərdə səlahiyyətlər icra başçılarından alınır. O baxımdan ekspertlərin bununla bağlı gözləntiləri nədir?
“Xüsusi nümayəndələr də icra başçıları kimi öz yaxın tanış-bilişini irəli çəkərsə, hansısa təsərrüfatı onların adına...”
Məsələyə münasibət bildirən ekspert Rəsul Cahangirlinin fikrincə, müəyyən ümidlər var ki, azad edilmiş ərazilərdə sözügedən tikililər olmayacaq: “Bunu bir sıra faktorlar şərtləndirir. Əvvəla, həmin ərazilərdə hər şey yenidən qurulacaq. Tikinti işləri, məskunlaşma və digər məsələlər dövlətin nəzarətində olduğu üçün ilkin dövrlərdə qanunsuz hansısa tikintinin aparılması ehtimalı çox aşağıdır. Nəzərə almalıyıq ki, məskunlaşma mərhələli şəkildə həyata keçiriləcək. Əhali məskunlaşandan sonra və bir sıra təsərüfat sahələrinin sayı artdıqca, o zaman qanunsuz tikililərlə bağlı müəyyən risqlər olacaq. Prezidentin təyin etdiyi xüsusi nümayəndələr də icra başçıları kimi öz yaxın tanış-bilişini irəli çəkərsə, hansısa təsərrüfatı onun adına keçirib himayədarlıq edərsə, o zaman tikintilər zamanı müəyyən qanunsuzluqların olması qaçılmazdır. Yox əgər xüsusi nümayəndələr fərqli və yeni idarəçilik performansı sərgiləyəcəklərsə, o zaman belə problemlər olmayacaq. Nəticədə qanunsuz tikinti aparmaq “ənənəsi” aradan qalxacaq. Fikrimcə, icra strukturlarında islahatlar dərinləşdikcə və seçkili orqan olan bələdiyyələrin idarəetmədə iştirakçılığı artdıqca bu məsələlər öz həllini tapacaq”.
O üzdən, ekspert hesab edir ki, bütün bunlar bir sıra amillərdən asılı olacaq.
Vidadi ORDAHALLI
