Prezident İlham Əliyevin yürütdüyü siyasətin əsasında vətəndaşın maraqları, sosial rifahının yüksək səviyyədə təmin edilməsi dayanır. Cəmiyyətin bütün həssas təbəqələri, xüsusən də şəhid ailələri, müharibə əlilləri Prezidentin qayğı və diqqəti ilə əhatə olunub. Əhalinin həssas qruplarının, xüsusilə şəhid ailələri və müharibə əlillərinin sosial müdafiəsinin gücləndirilməsi Prezident İlham Əliyevin siyasətinin ana xəttini təşkil edir.
Prezident İlham Əliyev, ötən dövrlərdə olduğu kimi, bu gün də şəhid ailələrinin və əlillərin sosial müdafiəsinin gücləndirilməsi istiqamətində böyük qayğı siyasəti həyata keçirir, onların sosial müdafiəsinin gücləndirilməsi istiqamətində müxtəlif işlər görür.
Mayın 2-də şəhid ailələri və müharibə əlillərinə 200 mənzil və 50 avtomobil təqdim olunub. Ramazan bayramında şəhid ailələrinə sosial dəstəyin göstərilməsi təsadüfi deyil. Humanizm, sosial qayğıya ehtiyacı olan ailələrə xüsusi diqqət və islam dəyərlərinə sadiqlik Azərbaycan Prezidentinin idarəçilik konsepsiyasının mühüm tərkib hissələrindəndir.
Qeyd etdiyimiz kimi, Prezident İlham Əliyev Bakının Sabunçu rayonunda şəhid ailələri və müharibə əlilləri üçün yeni yaşayış kompleksinin açılışında iştirak edib. Prezident İ.Əliyev qeyd edib ki, şəhidlərimizin yaxınlarına diqqət göstərmək hər bir dövlət məmurunun borcudur və cəmiyyətdə bu məsələ ilə bağlı tam həmrəylik var: “Nəinki dövlət qurumları, istənilən insan çalışır ki, şəhid ailəsinə hansısa bir kömək göstərsin. Bizim qazilərimiz də çox olub. On mindən çox yaralı əsgər-zabitimiz olub. Onların da sağalması prosesi gedir. Onlar üçün artıq son model olan iki yüz protez təşkil edilib və onlar normal həyata qayıdıblar. Dövlət öz üzərinə nə düşürsə etməlidir və edəcək”.
Dövlət başçısı şəhid ailələri ilə görüşən zaman qeyd edib ki, biz bütün şəhidlərimizin məişət problemlərini həll etməyə çalışırıq və çalışacağıq: “Bu, bizim borcumuzdur. Prezident kimi mənim və dövlətimizin borcudur. Birinci və İkinci Qarabağ müharibələrinin şəhidlərinin ailələrinə bu günə qədər 12 mindən çox mənzil verilib. Bu, yenə də bizim borcumuzdur”.
Məlumat üçün bildirək ki, postmüharibə dövründə icra olunan sosial dəstək paketi 100 min şəxsi əhatə edib, onlara 166 min xidmət göstərilib. Bu dövr ərzində şəhid ailə üzvləri və müharibə iştirakçılarından ibarət 93 min nəfərə 103 min sosial ödəniş təyin olunub. Mənzil proqramı 5 dəfə genişləndirilib, 2021-ci ildə 3000, postmüharibə dövründə 3500 mənzil verilib. Beləliklə, ümumilikdə 12500 şəhid ailəsi və müharibə əlili mənzil və fərdi evlə, 7400 müharibə əlili avtomobillə təmin olunub.
Millət vəkili Rüfət Quliyev qeyd etdi ki, əhalinin həssas qruplarının, xüsusilə şəhid ailələri və müharibə əlillərinin sosial müdafiəsinin gücləndirilməsi Prezident İlham Əliyevin siyasətinin ana xəttini təşkil edir: “Şəhid ailələri və müharibə əlilləri Prezidentin diqqət mərkəzindədir. Müxtəlif ərazilərdəki yeni yaşayış komplekslərində də bu kateqoriyalardan olan şəxslərin mənzillə təminatı işləri davam edir. Dövlət başçısının tapşırığı ilə müharibə əlillərinin avtomobillə təminatı tədbirləri də uğurla davam edir”.
Həmsöhbətimiz onu da əlavə etdi ki, şəhid ailələri, müharibə veteranlarına dövlətin maddi dəstəyi ilə yanaşı mənəvi dəstəyi də ən yüksək səviyyədədir. Həm cənab Prezident İlham Əliyev, həm də Birinci vitse-prezident Mehriban xanım Əliyeva tez-tez şəhid ailələri, müharibə iştirakçıları, müharibə əlilləri ilə görüşür, onların problemləri ilə maraqlanır.
Günel CƏLİLOVA
