Prezident İlham Əliyevin ADA Universitetindəki beynəlxalq konfransda çıxış və cavablandırmaları öz real xarakteri, şəraitə uyğunluğu və konkret nəticələr doğurmaq gücünə malik olması ilə seçilir.
Ermənistanın müharibəyə qədərki və ondan sonrakı dövrdə apardığı siyasətlərin mahiyyətini dünyanın tanınmış düşüncə sahiblərinə çatdırmaq çox vacib və əhəmiyyətli idi və ölkəmizin Prezidenti bunu yüksək səviyyədə etməyi bacardı. Prezident İlham Əliyev bu çətin vəzifəni özünün geniş məlumatlara sahib olması, regional və beynəlxalq siyasətə dərin bələdçiliyi, savadlı auditoriya ilə işləmək və Azərbaycanın vəziyyətini hər tərəfdən dəqiq görmək qabiliyyəti sayəsində icra edə bildi.
Prezident Ermənistanın işğal, qanunsuz məskunlaşdırma, coğrafi adları dəyişdirmə və etnik təmizləmə siyasətinin əsl vandal mahiyyətini xarici düşüncə adamlarına böyük məharətlə çatdıra bildi. Belə mötəbər konfrans auditoriyasına izah etmək çox vacib idi ki, Ermənistan Azərbaycanın rayonlarını birinci Qarabağ müharibəsində yox, ondan sonra düz 30 il davam etmiş vəhşi işğal dövründə darmadağın edib. Prezident Əliyevin bu taktikası Ermənistanın bu dağıntıları guya birinci Qarabağ müharibəsinin hərbi əməliyyatlarının labüd nəticəsi kimi qələmə vermək siyasətini alt-üst edir. Prezident Əliyev sübut edir ki, Ermənistan rayonlarımızı məqsədli, qisas, talan və iyrənc qazanc naminə dağıdıb.
Prezident Əliyev 44 günlük müharibədəki hərbi-siyasi qələbəmizlə yanaşı postmüharibə reallıqlarını Ermənistana və daha geniş dairələrə qəbul etdirmək yönündə siyasətimizin uğurlarını da əla təqdim etdi. Xarici qonaqlar bir daha gördülər ki, Ermənistan bu gün sülh gündəmini məhz Azərbaycanın düzgün və təsirli siyasəti altında qəbul edib. Dünya rəsmilərinin bilməsi və məhz Əliyevdən eşitmələri çox əhəmiyyətlidir ki, Azərbaycanın 5 sülh təklifini bu gün Ermənistan da gec də olsa qəbul edib.
Azərbaycan Prezidenti 5 sülh təklifini regionda davamlı və möhkəm sülhün müstəsna əhəmiyyətli şərti kimi təqdim etdi. Dünyanın rəsmi və analitik dairələri bizim Prezidentin çıxışındakı bu məqama hələ bundan sonra da çox müraciətlər edəcəklər. Çünki İlham Əliyev regionda möhkəm və davamlı sülhün tutarsız alternativlərini yaratmaq istəyənlərin mövqeyini alt-üst etdi. Konfrans iştirakçıları gördülər ki, davamlı sülhün şərti heç də hansısa mifik həmsədrliklərin vasitəçiliyində və ya danışıqların uzadılmasında yox, məhz Əliyevin məlum 5 sülh təklifindədir.
Çox maraqlı məqamlardan biri də Ermənistanın həqiqətən müstəqil ölkəyə çevrilməsini təmin edən siyasət gündəminin təqdim edilməsidir. Azərbaycan Prezidenti Ermənistanın özündən güclü qonşulara qarşı ərazi iddiaları, təcavüz niyyətləri ilə yaşamasını onun özünün bütün uğursuzluqlarının və iflasının əsas səbəbi kimi təqdim etdi. Prezident Əliyev əslində Ermənistana rifah və sülh içində yaşamaq gündəliyi təqdim etdi ki, bunun da həlledici şərti Azərbaycanla sülhdən keçir.
Azərbaycan Prezidenti Ermənistanın postmüharibə reallıqlarını qəbul etməkdə pozucu və ləngidici siyasətini inandırıcı məntiq və faktlarla sübut etdi. Dünya alimləri və siyasətçilər bir daha gördülər ki, Ermənistan saziş və delimitasiya prosesinin başlanmasına yenə mane olur və bu prosesə hazır deyil. Ermənistanın tək Azərbaycanla yox, regionda üçtərəfli əməkdaşlıq formatlarına da hazır olmadığı nümayiş etdirildi. Azərbaycan Prezidenti Ermənistanın Gürcüstan da daxil üçtərəfli əməkdaşlığa nə yüksək siyasi, nə ekspertlər, nə də ictimai nümayəndəlik səviyyəsində hazır və maraqlı olmadığını sübut etdi.
Ermənistanın məhz təcavüzkar və antihumanist minalar siyasətinin ifşa edilməsində konfrans materialları müstəsna rol oynayır. Prezident Ermənistanın Azərbaycan ərazilərində minalama siyasətini son günlərə, son saatlara qədər davam etdirdiyini də ifşa etdi. Dünyaya bəyan edildi ki, Ermənistan hətta Kəlbəcərdən çıxmaq üçün 2020-ci ildə xahişlə aldığı əlavə 10 günlük müddəti də cinayətkarcasına minaların basdırılmasına sərf edib.
Azərbaycan Prezidentinin mülahizə və cavabları Azərbaycanın postmüharibə sülh siyasətinin əsaslarını və böyük perspektivlərini təqdim etməkdə çox məzmunlu və dəyərlidir.
Aydın QULİYEV
